1 እስራኤለ አሳይ ግብፀፈ ከይዳ ሄꬓንꬆ አጌናስ ኮይሮ ጋላሳን ሲና መላ ቢታ ጋክዶሶና። 2 ኤንቲ ራፍድማፐ ደንድድ ብድ፥ ሲና ዙማ ስንꬃን ደእያ መላ ቢታን ኡትዶሶና።

3 ሙሰይ ፆሳራ ጋሄታናዉ ዙማ ቦላ ከይስ። ጎዳይ ዙማ ሁጰፐ እያ ፄግድ፥ “ያይቆባ ሼሽ ግድዳ እስራኤለታስ ሀይሳዳ ያጋ፤ 4 ‘ታኒ ግብፀታ ቦላ ኦꬅዳባነ አርጋንꬅ ባ ናአ ባ ቀፍያን ቶከይስዳ ታ ህንተና ዋታ ቶካዳ ታኮ ኤህዳኮ ህንተ ህንተ ሁጰን በእደታ። 5 ሀእ ህንተ ታዉ ኪተትኮነ ታ ጫቁዋ ናግኮ፥ ቢታ ኩመꬃይ ታባ ግድኮካ ህንተ ታዉ ዶረትዳ ደረ ግዳና። 6 ህንተ ታዉ ጌሻ ደረ ግዳና፤ ህንተ ካዎተꬃን ካህነ ግድድ ታና ሀጋዛና።’ ኔኒ እስራኤለታስ ኦዳና ቃላይ ሀይሳ” ያግስ።

7 ሙሰይ ጉየ ብድ፥ ዙማኮ ጭማታ ፄግ ሺሽድ፥ ጎዳይ ኦድዳ ቃላ ኡባ ኤንታዉ ኦድስ። 8 ኤንቲ፥ “ጎዳይ ግዳባ ኡባ ኑኒ ኦꬃና” ያግዶሶና። ሙሰይ ኤንቲ ግዳይሳ ጎዳስ ኦድስ።

9 ጎዳይ ሙሰኮ “ታኒ ኔራ ሃሳይሽን አሳይ ስአናዳነ ኤንቲ ነና ኡባ ዎደ አማናናዳ ታኒ ሙምዳ ሻራራ ኔኮ ያና” ያግስ። ሄሳፈ ጉየ ሙሰይ አሳይ ግዳይሳ ጎዳስ ኦድስ።

10 ጎዳይ ሙሰኮ “ኔኒ አሳኮ ባዳ ሀችነ ዎንቶ ታራ ጋሄታናዉ ባንታና ጌሻና መላ ኤንታዉ ኦዳ። ኤንቲ ባንታ ማኡዋ ሜጭድ፥ 11 ሄꬓንꬆ ጋላሳስ ጊገቶ። ሄ ጋላስ አሳ ኡባይ ታና በእሽን ታኒ ሲና ዙማ ቦላ ዎꬋና። 12 ኔኒ ሀ ዙማ ዩሹዋን ዛዋ ዎꬃ። አሳይ ዙማ ከዮና ቦላ መላ ዎይኮ ዙማ ፃጱዋ ቦቾና መላ ኤንታዉ ኦዳ። ዙማ ቦችዳ ኦንካ ሀይቃና። 13 ሄ ኡራይ ሹቻን ጫደትድ ዎይኮ ዶንገን ዱከትድ ሀይቆ፤ እያ ኩሸን ኦንካ ቦቾፎ። መሄይ ዎይኮ አስ ሄሳዳ ሀይቆ። ሞይዘይ ፑነትያ ዎደ ኤንቲ ዙማ ቦላ ከያናዉ ዳንዳኦሶና” ያግስ።

14 ሙሰይ ዙማ ቦላፈ ዎꬍድ፥ አሳይ ፆሳ ጎይናናዉ ባንታና ጊግሳና መላ ኦድስ። ኤንትካ ባንታ ማኡዋ ሜጭዶሶና። 15 ሙሰይ አሳኮ፥ “ሄꬓንꬆ ጋላሳስ ጊገትተ፤ ህንተ ማቸታራ አቆፕተ” ያግስ።

16 ሄꬓንꬆ ጋላስ ዎንታ ጉራ ደሾይ ደችስ። ዎልአንꬅነ ሳካና ሻር ዙማ ማእድ በንትስ። ዎልቃማ ሞይዘ ዋሶይ ስኤትስ። አሳይ ዱንካንዳ በሳ ኡባን ያሻን ኮኮርዶሶና። 17 ሄሳፈ ጉየ፥ ሙሰይ አሳ ፆሳራ ጋꬃናዉ ኤንታና ዱንካንያፐ ከስድ ኤፍስ፤ ኤንቲ ዙማ ፃጶን ኤቅዶሶና። 18 ጎዳይ ሲና ዙማ ቦላ ታማ ላጮራ ዎꬍዳ ግሾ ሲና ደረይ ጩያን ካመትስ። ግታ ጮጨፐ ጩይ ከየይሳዳ እያፐ ጩይያ ዙለይ ሱረ ከይስ። አሳ ኡባይ ዳሮ ኮኮርዶሶና። 19 ሞይዝያ ዋሶይ ዳር ዳር ብዳ ዎደ ሙሰይ ኦድን፥ ፆሳይ ደሾን እያዉ ዛርስ። 20 ጎዳይ ሲና ዙማ ሁጰ ቦላ ዎꬍድ፥ ሙሰ ፑደ ዙማ ቦላ ፄግስ። ሙሰይ ዙማ ቦላ ከይስ። 21 ጎዳይ እያኮ፥ “ኔኒ ዱገ ባዳ አሳይ ታና በአና ግድ፥ ዛዋ አꬎና መላነ ኤንታፈ ዳሮይ ሀይቆና መላ ኤንታዉ ኦዳ። 22 ሀር አቶ ጎዳ ማት ሺቅያ ካህነትካ ባንታና ጌሾ። ኤንቲ ሄሳ ኦꬆና እꬅኮ ታ ኤንታ ሀንቃና” ያግስ።

23 ሙሰይ ጎዳኮ፥ “ኔኒ ዙማ ዱማይዳ ግሾነ ዛዋ እምዳ ግሾ አሳይ ዙማ ሁጰ ከያናዉ ዳንዳኦኮና” ያግስ።

24 ጎዳይ እያኮ፥ “ኔኒ ዱገ ባዳ አሮና ኔራ ኤካዳ ያ። ካህነትነ አሳይ ዛዋ ካንꬅድ ታኮ ይሸ ꬋዮና መላ ኤንታዉ ኦዳ” ያግስ። 25 ሄሳ ግሾ ሙሰይ አሳኮ ዎꬍድ ጎዳይ ግዳይሳ ኤንታዉ ኦድስ።