1 “እስ አስ ቦር ዎይኮ ዶርሰ ካይስድ ሹክኮ፥ ዎይኮ ባይዝኮ፥ ቦራ ግሾ እቻሹ ቦራታ፥ ዶርሳ ግሾ ኦይዱ ዶርሳታ ጭጎ።

2 “ካይሶይ ኬ ቦክሸ ኦይከትድ ሾጨትድ ሀይቅኮ፥ ሾጭ ዎꬍዳይስ ኦይሸተና። 3 ሽን ሄስ ሀንዳይ ጋላስ ግድኮ፥ እ ሄ ጉስዳ ሱꬃ አጩዋን ኦይሸቴስ። ካይሶይ ባ ካይስዳይሳ ዛሮ፥ ሽን እያዉ ዛራናባይ ꬋይኮ ባ ሁጰን አይለተꬃስ ባይዘቶ። 4 እ ካይስዳ መሄይ ፓፃ ደእሸ እያ ኩሸን በንትኮ፥ ቦር ዎይኮ ሀረ ዎይኮ ዶርሰ ግድኮ፥ እ ካይስዳይሳስ ናምኡ ኩሸ ጭጎ።

5 “እስ አስ ባ መህያ ደንባን ዎይኮ ዎይነ ጋደን ሄምሽን፥ መሄይ ሀራ አሳ ካꬅ ሚኮ፥ እ ባ ካꬃፈ ዎይኮ ባ ዎይንያፐ ሎኡዋ አጫ ቃንፆ።

6 “እስ አስ ባ ጋደን ታማ ፁግሽን ታማይ ቡርያ ካንꬅድ ሀራ አሳ ጋደን ድጭያ ካꬃነ ዶርያ ሚኮ፥ ታማ ኦይꬅዳ ኡራይ አጮ ቃንፆ።

7 “እስ አስ ብራ ዎይኮ ሀራ አልኦ ሚሸ ባ ሾሩዋስ ሀዳራ እምን፥ ሄ ሾሩዋ ሶፐ ካይሶይ ሄ ሚሽያ ኤክኮነ ሄ ካይሶይ ኦይከትኮ፥ ሄ ካይሶይ ሚሽያ ናምኡ ኩሸ ጭጎ። 8 ሽን ካይሶይ በንቶና እፅኮ፥ ኡራይ ፆሳ ስን ሺቅድ፥ ባ ሾሩዋ ሚሽያ፥ እ ኤኮናይሳ ኤርሳናዉ ጫቆ።

9 “ናምኡ አሳት ቦራ ጋሶን ዎይኮ ሀረ ጋሶን ዎይኮ ዶርሳ ጋሶን ዎይኮ ማኦ ጋሶን ዎይኮ ሀራ ꬋይዳባ ጋሶን ሞተትድ፥ ፆሳ ስን ሺቅኮ፥ ፆሳይ እያ ቦላ ፕርድዳይስ ናምኡ ኩሸ ጭጎ።

10 “እስ አስ ሀረ ዎይኮ ቦር ዎይኮ ዶርሰ ዎይኮ ሀራ መሄ ሀዳራ እምዳሱዋን ሀይቅኮ ዎይኮ መእኮ ዎይኮ ኦንካ በኦና ካይሶተትኮ፥ 11 ሀዳራ ኤክዳይስ ባ ላግያ መህያ ካይሶቶናይሳ ጎዳ ስንꬃን ጫቆ። ሄ መህያ ጎዳይ ጫቁዋ ኤኮ፤ መሄይ እያፐ ꬋይዳ ኡራይ ጭጋናዉ ኮሸና። 12 ሽን መሄይ ካይሶተትዳባ ግድኮ፥ መህያ ጎዳስ ጭጎ። 13 ሄ መህያ ዶእ ምዳባ ግድኮ፥ ማርካ ግዳናዳ ጋዉፃ ኤሆ፤ ዶእ ምዳባ ግድኮ እያዉ ጭጎፎ።

14 “አስ ባ ሾሩዋፐ መሄ ዎስ ኤክኮ እያ ጎዳይ ባይና በሳን ሄ መሄይ ደሸትኮ ዎይኮ ሀይቅኮ፥ ሄ መህያስ ጭጋ እሞ። 15 ሽን እያ ጎዳይ እያራ ደእሽን ሄስ ሀንዳባ ግድኮ አጫ ቃንፆፎ። ሀሸ ኤክዳባ ግድኮ፥ ሄ ሀሸ ሚሸይ አጮ ጋተ ግዶ።

16 “እስ አስ እስ ጌላእዉ ጭምድ፥ ኢራ ዝንኤትያባ ግድኮ፥ እዉ አጫ እምድ፥ ባዉ ማቾ ኦꬆ። 17 እ አዋይ እዮ እያዉ እማናዉ ኮዮና እፅኮ፥ ጌላኦ ኤክያ ኡራይ አጫ እምያ ሚሸ መላ እ አዋስ እምድ አጮ።

18 “ብታ ብትያ ማጫስ ሀይቆ። ዛረ 18:10-11.

19 “መሄራ ቱንያ ኦንካ ሀይቆ። ሌወ 18:23፤ 20:15.

20 “ፆሳፈ ሀራ ጎዳታስ ያርሽያ ኦንካ ሀይቆ። 21 ህንተ ግብፀ ቢታን በተ አስ ግድድ፥ ደእዳ ግሾ፥ በተ አስ ቆሆፕተ ዎይኮ ኡንኤꬆፍተ። 22 አምኤታነ ይኦታ ኡንኤꬆፍተ። 23 ህንተ ኤንታ ኡንኤꬅኮ፥ ኤንቲ ታኮ ዋሳና፤ 24 ታኒ ኤንታ ዋሱዋ ስአና። ሄ ዎደ ታ ህንተ ቦላ ሀንቀታዳ ህንተና ኦላን ዉርሳና። ህንተ ማቸት አምኦ፥ ህንተ ናይትካ አዉ ባይናይሳታ ግዳና።

25 “ህንተ ግዶን ደእያ ማንቆ ግድዳ ታ አሳፐ ኦደስካ ሚሸ ታልእኮ፥ የሎን ታልእያ አሳዳ የሎ ኦይቾፍተ። 26 ኔኒ እስባ ግሾ፥ እያ ማኡዋ ኦይክዳ አስ ደእኮ፥ አው ዉሎና ደእሽን እያ ማኡዋ ዛራ። 27 እ ማእድ አቀይ እ ፃላላ። እ ሀራ አይ ማእድ አቃናዉ ዳንዳኢ? ታኒ ቃትያ ፆሲ ግድያ ግሾ፥ እ ታኮ ዋስያ ዎደ ስአና።

28 “ፆሳ ቦላ *ፆሳ ቦላ: “ዳይናታ ቦላ” ጫሻ ቃላ ሃሳዮፓ፥ ዎይኮ ነ ደርያ አይሰይሳ ባዶፋ። 29 ነ ካꬃፈ፥ ነ ዎይነ ኡሻፈነ ነ ሻማሆ ዛይትያፐ ታዉ ያርሾ ያርሻ።

“ባይራ ግድድ የለትዳ አደ ናኣ ታዉ እማ። 30 ነ ሚዛፐነ ነ ዶርሳፈ ባይራ የለትዳይሳ ታዉ እማ። ኤንቲ ላፑን ጋላስ ጋካናዉ፥ ባንታ አየታራ ጋምኦ፤ ሆስፑንꬆ ጋላሳን ኤንታ ታዉ እማ።

31 “ህንተ ታዉ ጌሻ አስ ግዳናዉ ኮሼስ። ሄሳ ግሾ፥ ዶእ መንꬅድ ዎꬍዳ መሄ አሾ ሞፕተ፤ ሄሳ ካናስ የግተ።”