1 “ዎርዶ ኦዳ ጋሰꬆፋ፤ ዎርዶ ማርካታዳ ባላ አስ ማዶፋ። 2 ኢታባ ኦꬃናዉ ዳሮ አሳ ካሎፋ። ፕርዳ ዎብሳናዉ ዳሮ አሳራ እስፋዳ ማርካቶፋ። 3 ማንቆይ ፕርዳስ ሺቅያ ዎደ እያ ማንቆተꬃ በአዳ ማዶፋ።

4 “ነ ሞርክያ ቦራይ ዎይኮ ሀረይ ꬋይን ደምኮ፥ ዛራዳ እያዉ ኤፋ። 5 ነና እፅያ ኡራ ሀረይ ጫናራ ኩንድን በአዳ፥ ኡራ ማዳዳ ደንꬆና አጋዳ አꬎፋ።ዛረ 22:1-4.

6 “ፕርዳ ዳባባን ማንቆይ ፕርዳስ ሺቅያ ዎደ እያ ፕርዳ ዎቢሶፓ። 7 ኦናካ ማልተን ሞቶፓ፤ ፅሉዋ ዎꬎፓ። ሄሳ መላባ ኦꬅዳይሳ ታኒ ፕርዶና አግከ። 8 ዎꬋፈ ኤኮፋ፤ ዎꬋፈይ ሱረ ፄልያ አሳ አይፈ ቆቅሴስ፥ ፅሎታ ፕርዳ ምርቄስ።

9 “በታንቹዋ ናቆፋ። ህንተ ግብፀ ቢታን በተ አስ ግድድ ደእዳ ግሾ፥ አሳ ጋደ አስ ግዶይ አይ መላ ስኤትያኮ ኤሬታ።

10 “ኔኒ ነ ጋድያ ኡሱፑን ላይꬅ ጎያዳ ማ። 11 ላፑንꬃ ላይꬃን ጋድያ ጎዮና ሻቻ፤ እያን ዶልድ ካፅያባ ሺሾፓ። ነ አሳ ግዶን ደእያ ማንቆት እያፐ ሞ፤ ቃስ ኤንታፈ አትዳይሳ ዶአት ሞ። ነ ዎይነ ጋድያነ ነ ሻማሆ ጋድያ ሄሳዳ ኦꬃ።

12 “ኔኒ ኡሱፑን ጋላስ ኦሶ ኦꬃ። ነ ቦራይነ ነ ሀረይ ሸምፓና መላነ ነ ሶን የለትዳ አይለይነ በተ አስ ሸምፓና መላ ላፑንꬃ ጋላሳን ኦሶ ኦꬆፋ። 13 ታኒ ህንተዉ ኦድዳባ ኡባ ምንꬅድ ኦꬅተ። ሀራ ፆሳታ ሱንꬃ ፄግድ ዎሶፍተ፤ ኤንታ ሱንꬃ ደንꬆፍተ።

14 “ታና ቦንቻናዉ ላይꬃን ሄꬑ ባኣለ ጋላሳት ህንተዉ ደኦ። 15 ህንተ ግብፀፈ ከይዳ አቢባ ጌተትያ አጌናን፥ ታኒ ህንተና ኪትዳይሳዳ ኡይꬃ ባኣለ ቦንችተ። ላፑን ጋላስ እርሾ የግድ ኡክዳ ኡይꬅ ሞፕተ። ታና ጎይናናዉ ይሸ መላ ኩሸ ዮፕተ።

16 “ቃስ ህንተ፥ ህንተ ጋደን ዘርን፥ ኮይሮ ጋክዳ ካꬃ ጫክያ ዎደ ካꬃ ጫኮ ባኣለ ቦንችተ።

“ላይꬃ ዉርሰꬃን፥ ዎይንያነ ሄሳ መላ ምꬃታ አይፍያ ህንተ ጋደፐ ማፅያ ዎደ ሻቃራ ባኣለ ቦንችተ። 17 ላይꬃን ላይꬃን ቦንቸትያ ሀ ሄꬑ ባለታን አደ ኡባይ ታና፥ ህንተ ጎዳ ጎይናናዉ ዮ።

18 “ኔኒ ታዉ መሄ ያርሽያ ዎደ እርሾ የግድ ኡክዳ ኡይꬃራ ታዉ ያርሾፋ። ባኣለ ቦንችያ ጋላስ ያርሸትዳ ሞꬉዋፈ ዎንታስ አይብካ አቶፎ። 19 ህንተ ጋደን ባይራ ካፅዳ ካꬃ ኡባፈ ሎኡዋ ጎዳ፥ ህንተ ፆሳ ሶ ኤህተ። ዴሻ ማር ዎይኮ ዶርሳ ማር እያ አየ ማꬃን ዶይሶፓ።

20 “ነ ኦግያን ነና ናጋና ማላነ ታኒ ነዉ ጊግስዳ በሳ ነና ኤፋና መላ ታኒ ኪታንቾ ነ ስንꬃን ኪታና። 21 እ ኦድያባ ስአዳ እያዉ ኪተታ፤ እያ ቦላ ማካሎፋ። ታ እያዉ ማታ እምዳ ግሾ፥ ህንተ ናጋራ ኦꬅያባ ግድኮ፥ ህንተ ናጋራ ማረና። 22 ህንተ እያዉ ኪተትኮነ ታ ኪታ ኡባ ፖልኮ፥ ህንተ ሞርከታ ኡባ ሞርካና፤ ህንተራ ኤቀተይሳታ ታኒ ኦላና። 23 ታ ኪታንቾይ ህንተ ስንꬃን ብድ፥ ህንተና አሞረታ፥ ህተታ፥ ፓርዘታ፥ ካናነታ፥ ህወታነ ያቡሰታ ቢታ ኤሀና። ታኒ ኤንታ ꬋይሳና። 24 ኤንታ ፆሳታስ ዝጎፍተ ዎይኮ ጎይኖፍተ፥ ዎይኮ ኤንታ አማኖ ዎጋ ካሎፍተ። ኤንታ ፆሳታ ꬋይስተ፥ ኤንታ ኤቃ ሹቻታ መንረꬅተ። 25 ጎዳ፥ ህንተ ፆሳ ታና፥ ጎይንተ። ሄሳዳ ህንተ ኦꬅኮ፥ ታኒ ህንተ ካꬃነ ህንተ ሃꬃ አንጃና፤ ሀርግያካ ህንተ ግዶፈ ድጋና። 26 ህንተ ቢታን ማጫሳይ ቦሸተና፤ ማይነና። ታኒ ህንተ ላይꬃ አዱሳና።

27 “ታኒ ነ ሞርከታ ቦላ ታ ያሻ የዳና። ህንተራ ኤቀትያ ካዎተꬃታ ኡባ ዳጋንꬃና። ህንተ ሞርከት ኡባይ ህንተዉ ዞኮ ዛሪድ ባቃታና መላ ኦꬃና። 28 ታኒ ህንተ ሞርከታ ቦላ ካዠ የዳዳ ህወታ፥ ካናነታነ ህተታ ህንተ ስንꬃፈ ጎዳ ከሳና። 29 ሽን ቢታይ መላ አቶናዳነ ባዞ ዶእ ህንተና ዋይሶናዳ እስ ላይꬃን ኤንታ ጎድከ። 30 ሽን ህንተ ታይቦን ዳርድ፥ ምንድ፥ ሄ ቢታ ላታና ጋካናዉ ኤንታ ጉꬃራ ጉꬃራ ጎዳ ከሳና። 31 ታኒ ህንተ ዛዋ ዞኦ አባፈ ፍልስፄመ አባ፥ መላ ቢታፈ ብድ ኤፍራፂሳ ሻፋ ጋካናዉ ዳልግሳና። ሄ ቢታን ደእያ ኡባ ታኒ ህንተ ኩሸን አꬃዳ እማና፤ ህንተካ ኤንታ ጎድድ ከሳና። 32 ኤንታራ ዎይኮ ኤንታ ፆሳታራ ጫቆ ኦꬆፍተ። 33 ኤንታ ህንተ ቢታን ዎꬆፍተ። ሀንኮደ ኤንቲ ህንተና ታ ቦላ ናጋራ ኦስሳና። ኤንታ ፆሳታ ህንተ ጎይንኮ ህንተዉ ፅሄ ግዳና” ያግስ።