1 ጎዳይ ሙሰኮ ሀይሳዳ ያግስ፤ 2 “ታዉ እሞታ ኤሀና መላ እስራኤለታስ ኦዳ። እያ ዎዛን እያ እማ እማ ግዳባ እምያ እሞታ አሳ ኡባፈ ታዉ ኤካ። 3 ህንተ ኤንታፈ ኤካና እሞታይ፥ ዎርቃ፥ ብራ፥ ናሰ ብራታ፥ 4 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ፥ ዴሻ እክሰ፥ 5 ሃሸትድ ዞኦ ቃላመን ትየትዳ ዶርሳ እተ፥ ሎኦ ዶአ እተ፥ ሶቃላ ምꬅ፥ 6 ፆምፐስ ማድያ ሻማሆ ዛይተ፥ ሹማተꬃ ዛይትያንነ እፃንያን ጉዠትያ ሳዎታ፥ 7 ካህነ ሀላቃይ ማእያ ኤፉደ ጌተትያ ማኡዋ ቦላነ እያ ትራን ዎሰትያ ማርግደ ጌተትያ አልኦ ሹቻነ ሀራ አሌቆ ሹቻታ ኤሆ። 8 ታኒ ኤንታ ግዶን ዳና መላ ኤንቲ ታና ጎይንያ በሲ ጊግሶ።” 9 ዱንካንያነ እያ ግዶን ደእያ ሚሸታ ኡባ ታ ነና በሲያ ማራን ኦꬃ።

10 “ሶቃላ ምꬃፈ፥ አዱሳተꬃይ ናምኡ ዋꬋነ ታካꬎ፥ ጎምፓይ እስ ዋꬋነ ታካꬎ፥ ጌሳይ እስ ዋꬋነ ታካꬎ ግድያ ሳፅነ ኦꬅተ። 11 ጋꬃነ ካርያ ዋላህ ባይና ዎርቃን ካማ፤ እያ ዩሹዋካ ዎርቃን ላንፃ። 12 ሄ ታቦትያስ ኦይዱ ዎርቃ ሳጋዮታ ኦꬃዳ፤ ኦይዱ ገዳታ ቦላ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አꬃዳ ጋሰꬃ። 13 ታቦትያ ቶክያ ካሶ ምꬃታ ሶቃላ ምꬃፈ ከሳዳ ዎርቃን ላንፃ። 14 ታቦትያ ቶካናዉ እያ ምየን ደእያ ሳጋዮታን ካሶ ምꬃታ አꬃ። 15 ቶክያ ካሶ ምꬃት ታቦትያ ሳጋዮታ ግዶን ደኦ፤ ኤንቲ ያፐ ከዮፖ። 16 ታቦትያ ግዶን ታኒ ነዉ እምያ፥ ታሙ ኪታት ፃፈትዳ ናምኡ ሎቸ ሹቻታ ዎꬃ።

17 “ዋላህ ባይና ዎርቃፈ አዱሳተꬃይ ናምኡ ዋꬋነ ታካꬎ፥ ጎምፓይ እስ ዋꬋነ ታካꬎ ግድያ ናጋራ አቶተꬃ ካማ ኦꬃ። 18 ቀፈራ ደእያ ናምኡ ክሩበታ ዎርቃፈ ቆፃዳ ኦꬃ። 19 እስ ክሩብያ እስ ባጋ ጋፃን፥ ናምአንꬆ ክሩብያ ሀንኮ ባጋ ጋፃን ዎꬃዳ ናምኣ ታቦትያ ጉጵያራ ኦይꬃዳ ኦꬃ። 20 ክሩበት ዎልኮ ስም ኡትድ፥ ባንታ ቀፍያ ደንꬅድ፥ አቶተꬃ ካማ ካሞ። 21 ታኒ ነዉ እምያ ሎቸ ሹቻ ቦላ ፃፈትዳ ታሙ ኪታታ ታቦትያ ግዶን ዎꬃ። ያታዳ፥ ጉጵያ ታቦትያ ቦላ ዎꬃ። 22 ታቦትያ ጉጵያ ቦላ ደእያ ናምኡ ክሩበታፐ ግዶን ግዳዳ ታኒ ኔራ ጋሄታና። እስራኤለ አሳስ እምያ ኪታ ኡባ ታኒ ያን ነዉ እማና።”

23 “ሶቃላ ምꬃፈ አዱሳተꬃይ ናምኡ ዋꬋ፥ ጎምፓይ እስ ዋꬋ፥ ጌሳይ እስ ዋꬋነ ታካꬎ ግድያ እስ ፃርጴዛ ኦꬃ። 24 ያታዳ፥ ዋላህ ባይና ዎርቃን ላንፃ፤ እያ ዩሹዋካ ዎርቃን ላንፃ። 25 ሄሳዳካ፥ ጎምፓይ ታካꬎ ግድያ ጎሳ እያ ቦላ ዩሻ አꬃ። ያታዳ፥ እያ ዩሹዋ ዎርቃን ላንፃ። 26 ሄ ፃርጴዛስ ኦይዱ ዎርቃ ሳጋዮታ ኦꬃዳ፥ ፃርጴዛ ኦይዱ ቶሆታራ ኦይꬃ። 27 ፃርጴዛ ቶካናዉ ካሶ ምꬃታ አꬅያ ሳጋዮት ፃርጴዛ ጎሳ ማታን ሺቅድ ደኦ። 28 ሄ ቶክያ ካሶታ ሶቃላ ምꬃፈ ከሳዳ፥ ዎርቃን ላንፃ። 29 ሄሳዳካ፥ ሻተታነ ጭልፓታ፥ ዎይነ ያርሹዋ ዱቅያ ሚሸታነ ፁአታ ዋላህ ባይና ዎርቃፈ ኦꬃ። 30 ፃርጴዛይ ታቦትያስ ስንꬃ ባጋራ ኡቶ። ታ ስንꬃን ኡትያ ጌሻ ኡይꬃይ ኡባ ዎደ ፃርጴዛ ቦላፈ ꬋዮፖ።”

31 “ፆምፐ ዎꬅያ ኮጫ ዋላህ ባይና ዎርቃፈ ኦꬃ። ሄ ኮጫይ ኤቅያ ቶሁዋነ ቶማ ዎርቃፈ ቆፃዳ ኦꬃ። አሌቆስ ኦሰትያ ዋላፃት፥ ጋምቡꬃትነ ጪሻት ኡባይ እስኖ ግድድ ኦሰታናዉ በሴስ። 32 ናምኡ ባጋራ፥ ሄꬑ ሄꬑ ታሸታ እያዉ ከሳ። 33 ኡሱፑን ታሸታስ ፄራን ፄራን ሄꬑ ሄꬑ አሌቆ ጋምቡꬃትነ ጪሻት ደእያ ላውዘ ምꬃ ጪሸ ዳንያባይ ደኦ። 34 ፆምፕያ ዎꬅያ ኮጫ ግዶን ደእያ ቶማ ፄራን ኦይዱ አሌቆ ጋምቡꬃትነ ጪሻት ደእያ ላዉዘ ምꬃ ጪሸ ዳንያባይ ደኦ። 35 ታሸታፐ ጋርሳን፥ ናምኡ ታሸት ጋሄትያ በሳን እስ እስ ጋምቡꬅ ደኦ። 36 ጋምቡꬃይ፥ ታሸይነ ፆምፕያ ዎꬅያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰቶ።

37 “ፆምፐ ዎꬅያ ኮጫ ቦላ ላፑን ፆምፐታ ጊግሳዳ፥ ኤንቲ ስን ፖአና መላ ꬎቁ ኦꬃዳ ዎꬃ። 38 ፆምፕያ ናጋናዉ ማድያ ቃጰታነ ኤንታ ዎꬅያባታ ዋላህ ባይና ዎርቃፈ ኦꬃ። 39 ፆምፐ ዎꬅያ ኮጫይነ እያ ሚሸት ኡባይ ሀስታማነ እቻሹ ክሎ ግራመ ግድያ ዋላህ ባይና ዎርቃፈ ኦሰቶ። 40 ታኒ ነና ዙማ ቦላ በስዳ ሌምሱዋ ካላዳ፥ አኬካዳ ኦꬃ።”