1 “ዱንካንያ ጋꬃ ባጋስ አልኦ ሊኖፐ ኦሰትዳ፥ ታሙ ገሸ ጊግሳ። ኤንታ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስልያራ አሌቅሳ። 2 ገሸት ኡባይ እስ ልከ ግዶ፤ አዱሳተꬃይ ላታማነ ኦይዳ፥ ጎምፓይ ቃስ ኦይዱ ዋꬋ ግዶ። 3 እቻሹ ገሸታ እስፈ ጋꬃዳ ስካ፤ ሀንኮ አትዳ እቻሻታ ሄሳዳ ኦꬃ። 4 እስፈ ጋሄትድ ስከትዳ ናምኡ ገሸታስ እሱዋ እሱዋ ጋፃን ካሎሰ አፍላፐ ኦሰትዳ ሳጋዮታ ኦꬃ። 5 እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ ኦꬃ፤ ሄሳዳካ ናምአንꬆ ማጋራጁዋ ቦላ ዉርሰꬃ ጋፃን እሻታሙ ሳጋዮታ ኦꬃ። 6 ጌሻ ዱንካነይ እስኖ ግዳና መላ ናምኡን ሻከት ስከትዳ ገሸታ ዎል ጋꬅድ ኦይሰꬃናዉ፥ እሻታሙ ዎርቃፈ ኦሰትዳ ኦይክያባታ ኦꬃ።

7 “ጌሻ ዱንካንያ ቦላራ ካማና መላ ታማነ እስ ገሸታ ዴሻ እክሰፐ ኦꬃ። 8 ታማነ እስ ገሸት እስ ግና ግዶ፤ እስ እስ ማጋራጁዋ አዱሳተꬃይ ሀስታሙ ዋꬋ፥ ጎምፓይ ኦይዱ ዋꬋ ግዶ። 9 እቻሹ ገሸታ እስ ባጋራ፥ ኡሱፑን ገሸታ ሀንኮ ባጋራ ጋꬃዳ ስካ። ኡሱፑንꬆ ማጋራጆይ ዳኮየትድ፥ ዱንካንያስ ስንꬃ ባጋራ ዳቡለቶ። 10 ዎል ጋꬅ ስክዳ ገሸታፐ እስ ማጋራጁዋስ ማጫራ ቦላ እሻታሙ ሳጋዮታ ኦꬃ፤ ቃስ ሀንኮ ማጋራጁዋስ ማጫራ ቦላ እሻታሙ ሳጋዮታ ኦꬃ። 11 ናምኡን ሻከት ስከትዳ ገሸት እስ ካማ ግዳና መላ እሻታሙ ናሰ ብራታፐ ኦሰትዳ ኦይክያባታ ኦꬃ። 12 ሄ ዱንካንያ ገሸታፐ ፓላህዳ ባጋ ኤካዳ ጌሻ ዱንካንያስ ጉየ ባጋራ ካቃ። 13 ዱንካንያ ገሸታፐ አዱሳተꬃ ባጋራ ፓላህዳ ጎምፓይ እስ እስ ዋꬋ ግድዳ ገሸታ ጌሻ ዱንካንያስ ናምኡ ባጋራ ካቃ።

14 “ዱንካንያስ ቦላ ባጋራ ዳቡልድ ካማናዉ ዞኦ ቃላመን ትየትዳ ማራዘ እተነ ሎኦ ዶአ እተ ኦꬃ። 15 ጌሻ ዱንካንያ ቱቀታ ሶቃላ ምꬃፈ ኦꬃ። 16 እስ እስ ቱቅያ አዱሳተꬃይ ታሙ ዋꬋ፥ ጎምፓይ እስ ዋꬋነ ባጋ ግዶ። 17 ናምኡ ቱቀት እስፈ ኦይከታና መላ እስ እስ ቱቅያስ ኦይሰꬅያባይ ደኦ። ጌሻ ዱንካንያ ቱቀታ ኡባ ሄሳዳ ኦꬃ። 18 ጌሻ ዱንካንያ ዉሎሀ ባጋራ ላታሙ ቱቀታ ኦꬃ። 19 ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦꬃ። እስ እስ ቱቅያስ ናምኡ ናምኡ ቶሆ ከሳ። 20 ጌሻ ዱንካንያ ፑደሀ ባጋራ ላታሙ ቱቀታ ኦꬃ። 21 ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦꬃ። እስ እስ ቱቅያስ ናምኡ ናምኡ ቶሆ ከሳ። 22 ጌሻ ዱንካንያስ ጉየራ ዉሎሀ ባጋራ ኡሱፑን ቱቀታ ኦꬃ። 23 ጉየ ባጋራ ደእያ ማዛነታስ ናምኡ ቱቀታ ኦꬃ። 24 ሄ ማዛንያን ደእያ ቱቀት ቶሆፐ ሁጰ ጋካናዉ ኦይከቶ። ናምኡ ማዛነታ መꬍያ ናምኡ ቱቀታ ሄሳꬆ ኦሰታናዉ በሴስ። 25 ሄሳዳካ ናምኡ ናምኡ ቶሆይ ደእያ ሆስፑን ቱቀታ ኦꬃዳ፥ ኤንታዉ ብራ ብራታፐ ኦሰትዳ ታማነ ኡሱፑን ሉሆይ ደእያ ቶሆታ ኦꬃ።

26 “ቱኡቀታ ሳꬅድ ኦይꬅያ ሶቃላ ምꬃፈ ኦሰትዳ ታማነ እቻሹ ልዮታ ከሳ። ኤንታፈ እቻሻታ ጌሻ ዱንካንያስ እስ ባጋ ምየን ደእያ ቱቀታስ፥ 27 ቃስ እቻሻታ ሀንኮ ባጋ ምየን ደእያ ቱቀታስ፥ ሄሳዳካ አትዳ እቻሻታ ዉሎሀ ባጋን ደእያ ቱቀታስ ኦꬃ። 28 ሀ ጋፃ ቱቅያፐነ ያ ጋፃ ቱቅያፐ ይያ ልዮት ግዶ ቱቅያራ ኦይከቶ። 29 ቱኡቀታ ዎርቃን ላንፃ፤ ልዮታ ኦይካናዉ ማድያ ሳጋዮታ ዎርቃፈ ኦꬃ፤ ቃስ ልዮታ ዎርቃን ላንፃ። 30 ጌሻ ዱንካንያ ዙማ ቦላ ታ ነና በስዳይሳዳ ኦꬃ።

31 “አልኦ ሊኖፐ እስ ማጋራጆ ኦꬃዳ፥ እያ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስለን አሌቅሳ። 32 እያ ሶቃላ ምꬃፈ ኦꬃዳ፥ ዎርቃን ሜሸትዳ ኮጫታንነ ብራ ብራታፐ ኦሰትዳ ኦይዱ ቶሆይ ደእያ ቱሳታ ቦላ ካቃ። 33 ሄ ማጋራጁዋ ጌሻ ዱንካንያስ ካራን ደእያ ቃጰታፐ ጋርሳን ካቃ። ያታዳ ህገይ ፃፈትዳ ናምኡ ሎቸ ሹቻታ ኦይክዳ ጫቆ ታቦትያ ማጋራጁዋስ ጉየ ባጋን ዎꬃ። ሄ ገሸይ፥ ጌሻ በሳነ ኡባፈ ጌሻ በሳፈ ሻኬስ። 34 ናጋራ አቶተꬃ ካማን ጫቆ ታቦትያ ካማ። 35 ፃርጴዛ፥ ኡባፈ ጌሻ በሳፈ ካረራ፥ ጌሻ ዱንካንያፐ ፑደሀ ባጋን ዎꬃ፤ ፆምፐ ዎꬅያ ኮጫ ዱገሀ ባጋራ ዎꬃ።

36 “ዱንካንያ ፐንገ ማጋራጁዋ፥ አልኦ ሊኖፐ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ። 37 ማጋራጁዋስ እቻሹ ቱሳታ ሶቃላ ምꬃፈ ኦꬃዳ ዎርቃን ላንፃ፤ ኮጫትካ ዎርቃፈ ኦሰትዳይሳታ ግዶ። ቱሳታስ ናሰ ብራታፐ እቻሹ ቶሆታ ጊግሳ።”