1 “ሶቃላ ምꬃፈ ያርሾ በሲ ኦꬃ። አዱሳተꬃይነ ጎምፓይ ኦይዱ ዋꬋነ ታካꬎ፥ ጌሳይ ሄꬑ ዋꬋ ግድዳ ኦይዱ ማዛነራ ደእያ ያርሾ በሲ ኦꬃ። 2 ኦይዱ ማዛነታ ቦላ ካጨ ዳንያባ ከሳ፤ ካጨት ያርሾ በሳራ እስኖ ግድድ ኦሰቶ። ያታዳ፥ ያርሾ በሳ ኡባ ናሰ ብራታን ላፃ። 3 እያዉ ጎኤትያ ሚሸታ፤ ብዶ ከስያ ከረታ፥ አካፋታ፥ ባልደታ፥ አሾ ቃጰታነ ጮጨታ ኡባ ናሰ ብራታፐ ኦꬃ። 4 ያታዳ፥ ናሰ ብራታፐ ዛርዛረ ዳንያባ ኦꬃዳ፥ እያዉ ኦይዱ ማዛነታ ቦላ ኦይዱ ሳጋዮታ ጊግሳ። 5 ሄ ዛርዛርያ ያርሾ በሳ ጎሳፈ ጋርሳን ያርሾ በሳስ ባጋ ዛዋ ጋꬃዳ ዎꬃ። 6 ሶቃላ ምꬃፈ ያርሾ በሳ ቶክያ ካሶ ምꬃታ ከሳዳ፥ ናሰ ብራታን ላንፃ። 7 ያርሾ በሳ ቶክያ ዎደ ማዳና መላ ሄ ካሶ ምꬃታ ናምኡ ምየራ ደእያ ሳጋዮታን አꬃ። 8 ታኒ ነና ዙማ ቦላ በስዳይሳዳ ያርሾ በሲ ፃዉላፐ ኦꬃዳ፥ ግዱዋ ካይስ ኦꬃ።”

9 “ጌሻ ዱንካንያ ዳባባ ገቻናዉ አልኦ ሊኖፐ ማጋራጆ ጊግሳ። ገሸታስ አዱሳተꬃይ ዱገሀ ባጋራ ፄቱ ዋꬋ ግዶ። 10 እያዉ ካተ ግዳና መላ ናሰ ብራታፐ ኦሰትዳ ላታሙ ቱሳታነ ላታሙ ቶሆታ ኦꬃ። ኤንታ ቦላ ብራ ብራታፐ ኦሰትዳ ፃምአታነ ካጨታ ኦꬃ። 11 ዳባባስ ፑደሀ ባጋራካ ሄሳዳ ኦꬃ።

12 “ዳባባስ ዉሎሀ ባጋ አዱሳተꬃይ እሻታሙ ዋꬋ ግድዳ ገሸት ኦሰትድ፥ ኤንታዉ ታሙ ቶሆይ ደእያ ቱሳት ደኦ። 13 ገልያ ዉላይ ደእያ፥ ዶሎሀ ባጋ ዳባባ ጎምፓይ እሻታሙ ዋꬋ ግዶ። 14 ዳባባ ፐንግያፈ እስ ባጋራ አዱሳተꬃይ ታማነ እቻሹ ዋꬋ ግድያ ገሸት ደኦ፤ ኤንታዉ ሄꬑ ቶሆይ ደእያ ሄꬑ ቱሳት ደኦ። 15 ሀንኮ ባጋራ ደእያ ገሸትካ ሄሳዳ ኦሰቶ።

16 “ዳባባ ገልያ ዉላስ አዱሳተꬃይ ላታሙ ዋꬋ ግድያ፥ አልኦ ሊኖፐ ማጋራጆ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ። ኤንቲ እያን ዘምፓና መላ ኦይዱ ቶሆራ ደእያ ኦይዱ ቱሳታ ጊግሳ። 17 ዳባባ ዩሹዋን ደእያ ቱሳት ኡባይ ብራ ብራታፐ ኦሰትዳ ፃምአታን ኦይከቶ፤ ኤንታ ካጨት ብራ ብራታፐ፥ ኤንታ ቶሆት ናሰ ብራታፐ ኦሰቶ። 18 ዳባባ አዱሳተꬃይ ፄቱ ዋꬋ፥ ጎምፓይ ኦይታሙ ዋꬋ፥ ጌሳይ እቻሹ ዋꬋ ግዶ። ማጋራጆት አልኦ ሊኖፐ፥ ኤንታ ቶሆትካ ናሰ ብራታፐ ኦሰቶ።

19 “ጌሻ ዱንካንያን ጎኤትያ ሚሸ ኡባይ፥ ዱንካንያነ ዳባባ ꬍሸት ኡባይ ናሰ ብራታፐ ኦሰቶ።

20 “ፆምፐይ ቃማ ፖእሸ አቃና መላ ጉምእ ፅልስዳ ሻማሆ ዛይተ ነዉ ኤሀና መላ እስራኤለ አሳ ኪታ። 21 አሮንነ እያ ናይት፥ ፖኦይ፥ ጎዳ ስንꬃን ኦማርሳፈ ዎንታ ጋካናዉ ፖአና መላ ጌሻ ዱንካንያ ግዶን፥ ማርካ ታቦትያ ስንꬃን ደእያ ማጋራጁዋፈ ካረ ባጋራ ኤꬆ። ሄስ እስራኤለ አሳስ መርና ዎጋ ግድድ ደኦ።