1 “ነ እሻ አሮናነ እያ ናይታ ናዳባ፥ አብዮዳ፥ አላዛራነ እታማራ ኔኮ ፄጋ። ኤንቲ ካህነ ግድድ ታዉ ሀጋዛና መላ እስራኤለ አሳ ግዶፈ ኤንታ ዱማያ። 2 እያዉ ቦንቾነ ቴማ እማና መላ ነ እሻ አሮናስ ቦንቾ ማኦታ ጊግሳ። 3 አሮን ካህነተꬃን ዱማትድ ታዉ ሀጋዛናዳ፥ ታኒ ሂላተꬅ እምዳ ኦሳንቾታ ኡባ ፄጋዳ፥ አሮናስ ማኦታ ጊግሳና መላ ኦዳ። 4 ኤንቲ ጊግሳና ማኦትካ ሀይሳታ፤ ትራን ማኤትያ ማኦ፥ ኤፉደ፥ አዱሳ ቃምሰ፥ አሌቀትድ ዳደትዳ ሻምዘ፥ ቃጨነ ዳንጮ። ነ እሻይ አሮንነ እያ ናይት ካህነ ግድድ ታዉ ሀጋዝሸ ማአና መላ ጌሻ ማኦታ ኤንታዉ ጊግሶ። 5 ኩሸ ሂላንቾት ሄ ማኦታ ዎርቃ ጫቻፈ፥ ካሎሰፐ፥ ኦቻ ቴራ ዳነይሳፈ ዞኦ ቃጭናፐነ አልኦ ሊኖፐ ጊግሶ።

6 “ኤፉደ ጌተትያ ማኡዋ ዎርቃ ጫቻ ቃጭናፐ፥ ካሎሰፐ፥ ኦቻ ቴራ ዳነይሳፈ፥ ዞኦ ቃጭናፐነ አልኦ ሊኖፐ ኩሸ ሂላንቾት አሌቅስድ ጊግሶ። 7 ናምኡ ሀሽያራ ዎꬍድ፥ ናምኡ ባጋ ዎል ጋꬅድ ቃቻናዉ ማድያ ቃንጎት ደኦ። 8 ኤፉደይ ኦሰትዳባፐ ሂላን ኦሰትዳ ዳንጮይ ኤፉድያራ ዎላ ኦሰትዳባ ግድድ እስፈ ኦይከቶ። 9 ማርግደ ጌተትያ ናምኡ ሹቻታ ኤካዳ፥ ታማነ ናምኡ ያይቆባ ናይታ ሱንꬃ ኤንታ ቦላ ዎጫዳ ፃፋ። 10 ኤንታ የለታ ማራዳ እስ ሹቻ ቦላ ኡሱፑን ሱንꬃታ፥ ሀንኮ ሹቻ ቦላ አትዳ ኡሱፑን ሱንꬃታ ዎጫዳ ፃፋ። 11 ሀ ናምኡ ሹቻታ ቦላ ታማነ ናምኡ ያይቆባ ናይታ ሱንꬃ ዎጫድ ፃፋናዉ ሂላንቾ ደማ፤ ሄ ፃፈትዳ ሹቻታ ኤፉድያ ቦላ ኦይꬃናዉ እያ ዩሹዋ ዎርቃን ላንፃ። 12 ያታዳ ታማነ ናምኡ እስራኤለ ሼሻ ቆፍስያባ ግዳና መላ ሀ ናምኡ ሹቻታ ኤፉድያራ ኦይꬃዳ ሀሽያራ አꬍያ ቃንጉዋ ቦላ ዎꬃ። ታኒ፥ ጎዳይ፥ ታ አሳ ኡባ ዎደ ሀሳያና መላ አሮን ኤንታ ሱንꬃ ባ ሀሽያን ቶኮ። 13 ሄ ሹቻታ ኦይከይሳ ዎርቃፈ ኦꬃ። 14 ቃስ ዋላህ ባይና ዎርቃፈ ዎዶሮዳ ዶቀትዳ ናምኡ ሳንꬃላታ ሀሽያራ አꬍያ ቃንጉዋራ ኦይከታና መላ ኦꬃ።

15 “ጎዳ ሸንያ ኦይችድ ኤራናዉ፥ ትራን ማኤትያ ማኡዋ ኩሸ ሂላንቾን ኦስሳ። ሄ ትራን ማኤትያ ማኡዋ ዎርቃ ጫቻ ቃጭናፐ፥ ካሎሰፐ፥ ኦቻ ቴራ ዳነይሳፈ፥ ዞኦ ቃጭናፐነ አልኦ ሊኖፐ ኤፉድያዳ አሌቅስድ ጊግሶ። ካሎሰፐ ኦሰትዳባፐ ኦꬃዳ አሌቅሳ። 16 እያዉ ጌሳይነ ጎምፓይ እስ እስ ታካꬎ ግድድ ኦይዱ ማዛነይ ደኦ። 17 እያዉ ኦይዱ ማራን አልኦ ሹቻታ ዎꬃ። ኮይሮ ማራን ሳርድዮነ፥ ቶጳዘነ ጶልያ አልኦ ሹቻታ ዎꬃ። 18 ናምአንꬆ ማራን ባሉረ፥ ሳንፐረነ አልማዘ ጌተትያ አልኦ ሹቻታ ዎꬃ። 19 ሄꬓንꬆ ማራን ያክንተ፥ ከልቀዶነነ አመተስፅኖሳ ጌተትያ አልኦ ሹቻታ ዎꬃ። 20 ኦይዳንꬆ ማራን ብረለ፥ ማርግደ፥ ያስጵደ ጌተትያ አልኦ ሹቻታ ዎꬃ። ሀይሳቲ ኡባይ ዎርቃ ካቁዋ ቦላ ዎሰቶ። 21 እስራኤለ ናይታስ ቆፍሶ ግዳና መላ ሀ ታማነ ናምኡ አልኦ ሹቻታ፥ እስ እስ ያይቆባ ናይታ ሱንꬃይ፥ እስ እስ ሹቻ ቦላ ዎጨትድ ፃፈቶ።

22 “ትራን ማኤትያ ማኡዋስ ዋላህ ባይና ዎርቃፈ ዎዶሮዳ ዶቃዳ ሳንꬃላታ ኦꬃ። 23 ናምኡ ዎርቃ ምግዶታ ኦꬃዳ፥ ትራን ማኤትያ ማኡዋስ ቆሞ ጋፃ ማዛንያን ጋꬃዳ ኦይꬃ። 24 ሄ ናምኡ ዎርቃ ሳንꬃላታታ ምግዶታራ ጋꬃዳ ኦይꬃ። 25 ሀንኮ ባጋን ደእያ ናምኡ ሳንꬃላታ ጋፃ ናምኡ ቃንጎታራ ጋሰꬃ። ሄሳዳ ኦꬃዳ ስንꬃ ባጋራ፥ ሀሽያራ ዎꬍያ ኤፉድያ ቃንጉዋራ ጋሰꬃ። 26 ቃስ ናምኡ ዎርቃ ሳጋዮታ ኦꬃዳ፥ ኤፉድያፐ ጋꬃ ባጋራ ካልድ ደእያ ትራን ማኤትያ ማኡዋስ ናምኡ ማዛነታ ፄራን አꬃ። 27 ሄሳዳካ፥ ዎርቃፈ ሀራ ናምኡ ምግዶታ ኦꬃዳ፥ ኤፉድያስ ስንꬃ ባጋ ሀሽያራ ዎꬍያ ቃንጉዋስ ጋርሳ ባጋራ ጋሰꬃ። ኤፉድያ ስኩዋ ማታን ዳንጩዋፈ ቆሞ ባጋራ ኤንታ ጋሰꬃናዉ በሴስ። 28 ትራን ማኤትያ ማኡዋን ደእያ ምግዶታ ኤፉድያን ደእያ ምግዶታራ ጋꬃዳ ካሎሰ ቃጭናን ቃቻ። ሄሳዳ ኦꬅኮ፥ ትራን ማኤትያ ማኦይ ፄሳፈ ቆሞን ደእያ ግሾ፥ ቃሾይ ዶልኤና።

29 “አሮን ጌሻ በሳ ገልያ ዎደ እስራኤለ ማይዛታ ሱንꬃ ኦይክዳ፥ ትራን ማኤትያ ማኡዋ ማኦ። ያንያ ግሾ፥ ታኒ፥ ጎዳይ ኡባ ዎደ ታ አሳ ቆፓና። 30 ቃስ ሳማ የግያ ናምኡ ጌሻ ሹቻታ ትራን ማኤትያ ማኡዋን የጋ። ታይቦ 27:21፤ ዛረ 33:8፤ እዝ 2:63፤ ናህ 7:65. አሮን ጌሻ ዱንካንያ ገልያ ዎደ ባ ትራን ኤንታ ቶክድ ገሎ። ታ ሸንያ እስራኤለ አሳ ኤርሳናዉ ታ ስን ገልያ ዎደ ኡባን ትራ ኪስያፐ ꬋይሶፎ።

31 “ኤፉድያፐ ቦላራ ማእያ አዱሳ ማኡዋ ኩመꬅ ካሎሰ አፍላፐ ጊግሳ። 32 ሄ አዱሰ ማኡዋስ ሁጰ አꬅያ ሉሆ መꬋ። ሄ ሉሆይ ፔቶና መላ ጉየ ቃላምአዳ ዩሻ አꬃዳ ስካ። 33 አዱሳ ማኡዋስ ዱገ ባጋ ማጫራ ዩሹዋን ካሎሰ፥ ኦቻ ቴራ ዳነይሳንነ ዞኦ ቃጭናፐ፥ ኦሮማነ ቴራ ምስለ መꬋ። ያታዳ ኤንታ ግዶን አꬃ አꬃ ዎርቃፈ ኦሰትዳ ዳላታ ኦꬃ። 34 ዎርቃ ዳላትነ ኦሮማነ ቴራ ምስለት ሄ አዱሰ ማኡዋስ ዱገ ባጋ ማጫራ ዩሹዋን አꬎ። 35 አሮን ካህነተꬃን ኦꬅያ ዎደ ሀ አዱሳ ማኡዋ ማኦ። ጎዳ ስን፥ ጌሻ በሳ ገልያ ዎደነ ከይያ ዎደ፥ ዳላይ ጊራና፤ እካ ሀይቀና። 36 ዋላህ ባይና ዎርቃፈ እስ አሌቆ ኦꬃዳ፥ እያ ቦላ ‘ጎዳስ ዱማትስ’ ያጋዳ ዎጫዳ ፃፋ። 37 ያታዳ ሁጵያ ቃጭያ ቦላ ካሎሰ ቃጭናራ ቃቻ። 38 አሮን እያ ባ ሶምኡዋን ዎꬆ። ሄሳን እስራኤለ አሳይ ጎዳስ እሞታ እምሸ ባልዳባይ ደእኮ፥ ሄ ባላ አሮን ቶኬስ። አሳይ ኤህያባ ጎዳይ ኤካና መላ እ ሄሳ ኡባ ዎደ ባ ሶምኡዋን ዎꬃናዉ ኮሼስ።

39 “አሮና ሻምዝያነ ቃጭያ አልኦ ሊኖፐ ዳዳ። ቃስ ዳንጩዋካ አልኦ ሊኖፐ ዳዳዳ አሌቅሳ። 40 አሮና ናይታስ ቦንቾነ ፑላ እማና መላ ሻምዘታ፥ ዳንጮታነ ሁጰን ዎꬅያ ቆበታ ጊግሳ። 41 ኔኒ ሀ ማኦታ ነ እሻ አሮናነ እያ ናይታ ማይዛ። ኤንቲ ካህነተꬃን ታዉ ሀጋዛና መላ ኤንታ ሻማሆ ዛይተን ትያዳ ታዉ ዱማያ። 42 ኤንታ ካሎይ ካመታና መላ ጋርሳን ማእያ ማኡዋ ፄሳፈ ብድ ዎድረ ጋካናዉ ካምያባ አልኦ ሊኖፐ ጫርቀፈ ሱረ ጊግሳ። 43 አሮንነ እያ ናይት ጌሻ ዱንካንያ ገልያ ዎደ ዎይኮ ጌሻ በሳን ካህነተꬃን ሀጋዛናዉ ያርሾ በሲ ሺቅያ ዎደ ሀ ማኦታ ማኦ። ሄሳዳ ሀንኮ፥ ኤንቲ ባንታ ቦላ ሀይቆ ኤሆኮና። ሄስ አሮናስነ እያ ሼሻታስ መርና ዎጋ ግዶ።