1 “አሮንነ እያ ናይት ካህነተꬃን ታዉ ሀጋዛና መላ ኔኒ ኤንታ ዱማያናዉ ሀይሳዳ ኦꬃ፤ ቦረይ ባይና ዎፋኖነ ናምኡ ማራዘ ኤካ። 2 ጌሻ ግስተ ꬊለ ኤካዳ፥ እርሾ የጎና ሻማሆ ዛይተራ ግንዳዳ ኡይꬁ ኡካ። ቃስ ዛይተይ ገሎና ሀራ ኡይꬁ ኡካ፤ ሄሳዳካ፥ ሌኦ ኡይꬁ ኡካዳ ዛይተን ትያ። 3 ዎፋኑዋነ ናምኡ ማራዘታ ያርሽያ ዎደ ሄ ኡይꬃ ኡባ ጋይታን ዎꬃዳ ታዉ ሺሻ።

4 “ያታዳ አሮናነ እያ ናይታ ጌሻ ዱንካንያ ፐንገ ኤሀዳ ሃꬃን ኤንቲ ሜጨታና መላ ኦዳ። 5 ሄሳፈ ጉየ፥ ካህነተꬃ ማኦታ፥ ሻምዝያ፥ ኤፉድያ፥ ኤፉድያ ቦላራ ማእያ አዱሳ ማኡዋነ ትራን ማኤትያ ማኡዋ አሮና ማይዛ፤ ዳንጩዋካ ዳንጭሳ። 6 ቃጭያ ቃጭሳ፤ እያ ቦላ፥ ‘ጎዳስ ዱማትስ’ ጌተትድ ፃፈትዳ ዎርቃ አሌቁዋ ዎꬃ። 7 ትሻ ዛይትያ ኤካዳ እያ ሁጵያን ትጋዳ ትያ። 8 እያ ናይታ ኤሀዳ ሻምዝያ ማይዛ። 9 ኤንታ ፄሳ ዳንጭሳ፤ ኤንታ ሁጵያንካ ቆበ ዎꬃ። አሮናነ እያ ናይታ ያታዳ ካህነተꬃን ሹማ። ሄስካ፥ ኤንታዉ መርና ዎጋ ግዶ።

10 “ዎፋኑዋ ጌሻ ዱንካንያ ስን ኤሀዳ፥ አሮንነ እያ ናይት እያ ሁጵያን ባንታ ኩሽያ ዎꬃና መላ ኦꬃ። 11 ዎፋኑዋ ጌሻ ዱንካንያ ፐንግያን ጎዳ ስንꬃን ሹካ። 12 ዎፋኑዋ ሱꬃፈ ጉꬁ ኤካዳ ነ ብራꬍያን፥ ያርሾ በሳ ቦላ ደእያ ካጨታ ትያ። አትዳይሳ ያርሾ በሳፈ ጋርሳን ጉሳ። 13 ሄሳፈ ጉየ፥ ኡሎ አሹዋ ካምዳ ሞꬉዋ ኡባ፥ ትርያስ ሎኦ ባጋ፥ ናምኡ ክላሆታነ ኤንታ ካምዳ ሞꬉዋ ኤካዳ፥ ያርሾ በሳ ቦላ ዎꬃዳ ፁጋ። 14 ሽን ዎፋኑዋ ኡሎ አሹዋ፥ እያ ጋልባነ ማራጭያ ጉታፐ ጋፃ ከሳዳ ፁጋ። ሄስ ካህነታ ናጋራ ቁችያ ያርሾ።

15 “ናምኡ ማራዘታፐ እሱዋ ኤካዳ፥ አሮንነ እያ ናይት ባንታ ኩሽያ እያ ሁጰን ዎꬃና መላ ኦꬃ። 16 ሄ ማራዝያ ሹካዳ፥ ሱꬃ ያርሾ በሳን ኦይዱ ማዛነታን ዉርፃ። 17 እያ አሹዋ ቃንፀረꬃዳ፥ ኡሎ አሹዋነ ገዳ ሜጫዳ፥ ሁጵያ ሀራ ቆሞ አሾታራ እስፈ ያርሾ በሳን ዎꬃ። 18 ሄሳፈ ጉየ፥ ኩመꬃ አሹዋ ያርሾ በሳን ፁጋ። ሄስካ ጎዳስ ፁሳ ያርሾ። ሄ ያርሹዋ ሳዎይ ጎዳ ኡፋይሴስ።

19 “ቃስ ካህነተꬃ ዎጋስ ኤከትዳ ሀንኮ ማራዝያ ኤካዳ አሮንነ እያ ናይት ባንታ ኩሽያ እያ ሁጰን ዎꬃና መላ ኦዳ። 20 እያ ሹካዳ፥ ሱꬃፈ ጉꬁ ኤካዳ፥ አሮናስነ እያ ናይታስ ኡሻቻ ሀይꬃታስ ጋፃ፥ ኤንታ ኡሻቻ ኩሽያስነ ቶሁዋስ ዎጋ ብራታ ትያ። አትዳ ሱꬃ ያርሾ በሳ ኦይዱ ማዛነታን ዉርፃ። 21 ያርሾ በሳን ደእያ ሱꬃፈነ ትይያ ዛይትያፐ ጉꬁ ኤካዳ፥ አሮና ቦላነ እያ ማኡዋ ቦላ፥ ቃስካ እያ ናይታ ቦላነ ኤንታ ማኡዋ ቦላ ዉርፃ። ሄሳን አሮንነ እያ ናይት ባንታ ማኡዋራ ታዉ ዱማትዳይሳታ ግዳና።

22 “ሄ ማራዘይ ካህነታ ሹማ ዎጋስ ኤከትያ ግሾ፥ ጎይና ሞꬉዋ፥ ኡሎ አሹዋ ካምዳ ሞꬉዋ፥ ትርያ ካምዳ ሞꬍያ፥ ናምኡ ክላሆታ፥ ኤንታ ካምዳ ሞꬍያነ ኡሻቻ ጉየ ገዳ ቃንፃዳ ሻካ። 23 ጎዳ ስንꬃን ዎꬅዳ ኡይꬃታፐ፥ ዛይተይ ገልቦና ኡይꬃ፥ ዛይተራ ኡክዳ ኡይꬃነ ሌኦ ኡይꬃፈ እሱዋ ኤካ። 24 ኔኒ ሀ ካꬃ ኡባ አሮና ኩሽያንነ እያ ናይታ ኩሽያን ዎꬃ። ኤንቲ እያ ዩሾ ያርሾ ኦꬅድ ጎዳስ እምያ ያርሾ ኦꬅድ ጎዳ ስንꬃን ሺሾ። 25 ሄሳፈ ጉየ፥ ኤንታ ኩሸፐ ኤካዳ ያርሾ በሳ ቦላ ዎꬃ፤ ፁሳ ያርሹዋራ ጋꬃዳ፥ ጎዳ ሳዋና መላ ያርሾ በሳ ቦላ ታማን ፁጋ። 26 አሮን ካህነ ግድድ ሹመትያ ዎደ ሹክዳ ማራዝያ አንጋሱዋ ኤካዳ፥ ጎዳ ስንꬃን ዩሾ ያርሾ ኦꬃ። ሄስ ህንተና ጋክያ ግሾ ግዳና።

27 “ካህነይ ሹመትያ ዎደ፥ አሮናነ እያ ናይታ ካህነተꬃን ሹማናዉ ኤከትዳ አንጋሱዋነ ቶሆ አሹዋ ታዉ ዱማያ። ሄስካ፥ ካህነታ ጋክያ ግሾ ግዶ። 28 እስራኤለት ኡባይ ካህነ ሹማናዉ ዎይኮ አንጀታናዉ ጎዳስ አንጋሶነ ጉየ ቶሆ ያርሾ እምያ ዎደ አሾይ ታዉ ዱማትዳይሳ ግዶ። ሽን ግሾይ አሮናስነ እያ ናይታስ ጋኮ፤ ሄ ዎጋይ ላመቶፎ።

29 “አሮን ሀይቅዳ ዎደ እያ ናይት እያ ካህነተꬃ ማኡዋ ላቶ። ኤንቲ ካህነተꬃን ሹመትዳፐ ጉየ ሄ ማኡዋ ማኦ። 30 እያ ናይታፐ እያ በሳን ካህነ ግድድ፥ ጌሻ በሳን ሀጋዛናዉ ጌሻ ዱንካንያ ይያ ናእ ሄ ማኡዋ ላፑን ጋላስ ማኦ።

31 “አሮንነ እያ ናይት ካህነ ግድድ ሹመትያ ዎደ ሹከትዳ ማራዝያ አሹዋ ኤካዳ፥ ጌሻ በሳን ካꬃ። 32 አሮንነ እያ ናይት ማራዝያ አሹዋ ጋይታን አትዳ ኡይꬃራ ጌሻ ዱንካንያ ፐንገን ሞ። 33 ኤንቲ ካህነ ግድድ ሹመትያ ዎደ ናጋራ አቶተꬃስ ያርሸትዳ ሄ አሹዋ ሞና። ሽን ሄ ካꬃይ ጌሽ ግድዳ ግሾ፥ ካህነታ ፃላል ሞ፤ ሀራ አስ ኦንካ ሞፖ። 34 አሹዋፐነ ካꬃፈ ምሽን አትድ አቅኮ፥ ታማን ፁገቶ፤ ጌሽ ግድዳ ግሾ ሜተቶፎ።

35 “አሮንነ እያ ናይት ካህነ ግድድ ሹመትያ ዎደ፥ ታ ነና ኪትዳ ኡባ ኦꬃ፤ ባለይ ላፑን ጋላሳን ፖለቶ። 36 ናጋራ አቶተꬃስ እስ እስ ጋላሳን እስ ዎፋኖ ሹካዳ ያርሻ። ሄስ ያርሾ በሳ ጌሼስ። ያታዳ ያርሾ በሳ ፖሎ ጌሻናዉ ሻማሆ ዛይተ ትያ። 37 ሄሳ ላፑን ጋላስ ጋካናዉ ጋላስ ጋላስ ኦꬃ። ያትኮ ያርሾ በሳይ ፖሎ ጌሽ ግዳና። እ ፖሎ ጌሽ ግድዳ ግሾ፥ እያ ቦችያ አስ ዎይኮ ሀራባ ኡባይ ጌያና።

38 “ላይꬃን ላይꬃን ያርሾ በሳን ጋላስ ጋላስ እስ ላይꬅ ግድዳ ናምኡ ማራዘታ ያርሻ። 39 ማራዘታፐ እሱዋ ዎንታ፥ ቃስ ሀንኩዋ ኦማርስ ያርሻ። 40 ኮይሮ ማራዝያራ እስ ክሎ ግራመ ግድያ ጌሻ ሎኦ ግስተ ꬊለ፥ እስ ልትሮ ሻማሆ ዛይተራ ግንዳዳ ያርሻ። እስ ልትሮ ዎይነ ኡሻ ያርሾ ኦꬃዳ ጉሳ። 41 ሀንኮ ማራዝያ ኦማርስ ያርሻሸ ዎንታ ያርሾይሳ መላ ꬊለ፥ ዛይተነ ዎይነ ኡሻ ሺሻ። ሄስ ታዉ ያርሸትያ ካꬃ ያርሾ፤ እያ ሳዎይ ታና ኡፋይሰይሳ ግዳና።

42 “ላይꬃን ላይꬃን ሄ ፁሳ ያርሾይ ጌሻ ዱንካንያ ፐንገን፥ ጎዳ ስንꬃን ፓጭ ባይና ያሸታናዉ በሴስ። ሄ በሳን ታኒ ታ ደርያራ ጋሄታና፤ ኔራካ ያን ኦደታና። 43 ያን ታኒ እስራኤለታራ ጋሄታና፤ ታ ቦንቾይ ሄ በሳ ዱማያና። 44 ታኒ ጌሻ ዱንካንያነ ያርሾ በሳ ዱማያና፤ ኤንቲ ታዉ ካህነ ግድድ ሀጋዛና መላ አሮናነ እያ ናይታ ዱማያና። 45 ያታዳ፥ ታኒ እስራኤለታ ግዶን ዳና፤ ኤንታ ፆሳ ግዳና። 46 ኤንታ ግዶን ዳናዉ ግብፀፈ ኤንታ ከስዳ ጎዳይ፥ ኤንታ ፆሳይ ታና ግደይሳ ኤንቲ ኤራና። ታኒ ጎዳ፥ ኤንታ ፆሳ።