1 “እፃነ ጩይስያ በሳ ሶቃላ ምꬃፈ መꬋ። 2 እያዉ ኦይዱ ማዛነይ ደኦ። አዱሳተꬃይነ ጎምፓይ እስ እስ ዋꬋ፥ ጌሳይ ናምኡ ዋꬋ ግዶ። ኦይዱ ማዛንያን ደእያ ካጨት እያራ ኦይከትድ ኦሰቶና። 3 እያዉ ቦላ ባጋ፥ እያ ኦይዱ ማዛነታነ እያ ካጨታ ዋላህ ባይና ዎርቃን ላንፃ። እያ ዩሹዋካ ዎርቃን ላንፃ። 4 ናምኡ ዎርቃ ሳጋዮታ ኦꬃዳ፥ ፃርጴዛ ቶካናዉ ማድያ ካሶ ምꬃታ አꬃናዉ ጎሳስ ናምኡ ባጋራ ኦይꬃ። 5 ካሶ ምꬃታ ሶቃላ ምꬃፈ ከሳዳ፥ ኤንታ ዎርቃን ላንፃ። 6 ሄ እፃነ ያርሾ ፃርጴዛ፥ ጫቆ ታቦትያ ስንꬃን ካቀትዳ ማጋራጁዋፈ ካረ ባጋራ ዎꬃ። ያን ታኒ ኔራ ጋሄታና።

7 “አሮን ዎንታ ዎንታ ፆምፐታ ጊግሳናዉ ይያ ዎደ፥ ሳውያ እፃነ ያርሽያ በሳን ጩይሶ። 8 ሄሳዳ፥ አሮን ኦማርስ ፆምፐታ ፆምፕያ ዎደካ እፃነ ጩይሶ። ሄ እፃንያ ያርሾይ ያና ላይꬃ ኡባን ጎዳ ስንꬃን ጩዮ። 9 ሀ ያርሾ በሳን ሀራ ድገትዳ እፃነ፥ ካꬃ ያርሾ፥ መሄ ያርሾነ ዎይነ ያርሾ ያርሾፋ። 10 አሮን፥ ናጋራ አቶተꬃስ ላይꬃፈ እስ ቶሆ ሹከትያ መህያ ሱꬃፈ ኤክድ፥ ሄ ያርሾ በሳ ማዛነታ ቦላ ደእያ ካጨታ ዎꬅድ ጌሾ ዎጋ ፖሎ። ሀ ዎጋይ ስንꬃራ ያና ዎደ ኡባን ላይꬃን ላይꬃን ፖለቶ። ሄ ያርሾ በሳይ ጌሽ ግድያ ግሾ ጎዳስ ዱማትስ” ያግስ።

11 ሄሳፈ ጉየ፥ ጎዳይ ሙሰኮ ሀይሳዳ ያግስ፤ 12 “ኔኒ እስራኤለ አሳ ታይብያ ዎደ፥ እስ እስ አስ ባ ሸምፑዋ ዎዛናዉ ጎዳስ ሚሸ ቃንፆ። ያትኮ ኔኒ ኤንታ ታይብያ ዎደ ጋዶይ ኤንታ ቦላ ዬና። 13 ታይቦን ገልያ አስ ኦንካ ሁጰን ሁጰን ጌሻ ዱንካነን ኤረትዳ ምዛነ ግናን ብራ ጭጎ። እስ እስ አስ ሄሳ ታዉ ያርሾ ኦꬅድ እሞ። 14 ታይቦን ገልያ አስ ኦንካ ላይꬅ ላታማነ እያፐ ቦላ ግድዳ ኡባይ ጎዳስ ሄሳ ኤሆ። 15 ኤንቲ ባንታ ሸምፑዋ ዎዛናዉ ጎዳስ እሞታ እምያ ዎደ፥ ዱረይካ ማንቆይካ እስ ግና እሞፈ አትሽን፥ ዱረይ ዳርስድ ዎይኮ ማንቆይ ጉꬅድ እሞፎ። 16 ሄ ሚሽያ እስራኤለ አሳፐ ኤካዳ፥ ጌሻ ዱንካንያ ናጋናዉ ፔሻ። ሄ ሚሸይ ኤንታ ሸምፑዋ ዎዛናዉነ ታ ኤንታ ናጋና መላ ቆፍስያባ ግዳና” ያግስ።

17 ጎዳይ ሙሰኮ ሀይሳዳ ያግስ፤ 18 “ሜቻ ከርያነ እያ ቶሁዋ ናሰ ብራታፐ መꬋ። እያን ሃ ትጋዳ ጌሻ ዱንካንያፐነ ያርሾ በሳፈ ግዶን ዎꬃ።ከሳ 38:8. 19 አሮንነ እያ ናይት ባንታ ኩሽያነ ባንታ ቶሁዋ ያን ሜጨቶ። 20 ኤንቲ ጌሻ ዱንካንያ ገላናፐነ ያርሾ ያርሻናፐ ስን ሄሳ ኦꬃናዉ በሴስ። ሄሳ ኤንቲ ኦꬅኮ ሀይቆፐ አቶሶና። 21 ኤንቲ ሀይቆና መላ፥ ባንታ ኩሽያነ ባንታ ቶሁዋ ሜጨታናዉ በሴስ። ሄስ አሮናስነ እያ ሼሻታስ፥ ይያ የለተꬃ ኡባስ መርና ዎጋ ግዳና” ያግስ።

22 ጎዳይ ሙሰኮ ሀይሳዳ ያግስ፤ 23 “ጌሻ ሳዎታ፥ ሄሳትካ፤ ኡሱፑን ክሎ ግራመ ጉክያ ካርበ፥ ሄꬑ ክሎ ግራመ ሳውያ ቃራፋ፥ ሄꬑ ክሎ ግራመ ሳውያ ማታ፥ 24 ኡሱፑን ክሎ ግራመ ቡርጉደ ኤካ። ሄ ኡባይካ ጌሻ ዱንካነን ኤረትዳ ምዛንያ ግና ግዶ። ሄሳታ ቦላ ኦይዱ ልትሮ ዛይተ ጉጃ። 25 ሄሳታ ሽቶዳ ዋላካዳ፥ ሳውያ ጌሻ ዛይተ ኦꬃዳ፥ 26 ጌሻ ዱንካንያነ ጫቆ ታቦትያ ትያ። 27 ፃርጴዛነ እያ ሚሸታ፥ ፆምፐ ዎꬅያ ኮጫነ እያ ሚሸታ፥ እፃነ ጩይስያ ፃርጴዛ፥ 28 ፁሳ ያርሾ በስነ እያን ቦላ ደእያ ሚሸታ ኡባ፥ ሜቻ ከርያነ እያ ቶሁዋ ትያ። 29 ኤንቲ ፖሎ ጌሽ ግዳና መላ ኤንታ ዱማያ። ኤንታ ቦችያ ኦንካ ጌሽ ግዳና።

30 “ሄሳፈ ጉየ፥ አሮንነ እያ ናይት ካህነ ግድድ ታዉ ሀጋዛና መላ ኤንታ ትያዳ ዱማያ። 31 እስራኤለ አሳስ፥ ‘ሀይስ ጌሻ ሹማተꬃ ዛይተይ ይያ የለተꬃስ ታና ሀጋዛናዉ ማድያ ዛይተ ግዶ። 32 ሄ ዛይትያ ጮ አሳ ቦላ ጉሶፋ፤ ቃስ አይ ዛይተካ እያ ኦꬅዳ ኦግያን ኦꬆፋ። ዛይተይ ጌሽ ግድዳ ግሾ፥ ህንተካ እያ ጌሻተꬃ ኤርተ። 33 ሄ ሽቱዋ ጊግስያ አስ፥ ዎይኮ ካህነ ግዶና ሀራ አስ ትይያ ኦንካ ታ አሳ ግዶፈ ህለቶ’ ያጋ” ያግስ።

34 ጎዳይ ሙሰኮ ሀይሳዳ ያግስ፤ “ጌሻ ሳዎታ፥ ፆክያ ምꬃ ማደ፥ ꬋ ኬꬃን ደእያ ሽቶ፥ ሳውያ ማደነ ሳውያ እፃነ ኤካ፤ ኤንታ ኡባ ምዛነይ እስ ግና ግዶ። 35 ሽቶዳ ዋላሄትዳ እፃነ ኦꬃዳ ኤንታ ጎኤታ። ዋላህ ባይናነ ጌሽ ግዳና መላ እያን ማፅነ የጋ። 36 እያፐ ጉꬃራ ኤካዳ ሊቅሳ ጫዳዳ፥ ታኒ ኔራ ጋሄትያ ጌሻ ዱንካንያ ግዶን፥ ጫቆ ታቦትያ ስንꬃን ዉርፃ። ሄ እፃነይ ነዉ ፖሎ ጌሽ ግዶ። 37 ህንተዉ ጎኤታናዉ ሄ እፃንያ አይ ኦገንካ ጊግሶፕተ። ሄስ ታዉ ዱማትዳይሳ ግደይሳ ኤርተ። 38 ሄሳꬆ ኦꬅድ፥ እያ ሳዉዋ ስንግድ ኡፋይታናዉ ኮይያ ኦንካ፥ ታ አሳ ግዶፈ ꬋያና” ያግስ።