1 ጎዳይ ሙሰኮ ሀይሳዳ ያግስ፤ 2 “ታኒ ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤላ ዶራስ። 3 ታኒ እያ ታ አያናን ኩንꬃስ፤ ታኒ ሂላ፥ አኬካነ ኦሶ ኡባ ኦꬅያ ኤራ እያዉ እማስ። 4 ሄስካ፥ ሂላን ኦꬃና ኦሶታ ሀልችድ ዎርቃፈ፥ ብራፐነ ናሰ ብራታፐ ዱማ ዱማባ ከስድ ኦꬃናሳ። 5 ሄሳዳካ፥ አልኦ ሹቹ ማስድ ጊግሰይሳ፥ ምꬅ ማሰይሳነ ሀራ ኦሶ ኡባ ኦꬃና መላ ጭንጫተꬅ እማስ። 6 ቃስ እያ ማዳና መላ ዳነ ሼሽ ግድዳ አህሳማካ ናኣ ኤልያባ ዶራስ። ታኒ ነና ኪትዳባ ኡባ ኤንቲ ኦꬃና መላ ኩሸ ሂላ ኤርያ ሀራታ ኡባስ ግታ ኤራተꬅ እማስ። 7 ኤንቲ ኦꬃናባት፥ ጌሻ ዱንካንያ፥ ጫቆ ታቦትያ፥ እያ ቦላ ዎꬅያ ናጋራ አቶተꬃ ካማ፥ ዱንካንያ ግዶን ጎኤትያ ሚሸ ኡባ፥ 8 ፃርጴዛነ እያ ሚሸታ፥ ዋላህ ባይና ዎርቃፈ ኦሰትዳ ፆምፐ ዎꬅያ ኮጫነ እያ ሚሸ ኡባ፥ እፃነ ጩይስያ ፃርጴዛ፥ 9 ፁሳ ያርሾ በስነ እያ ሚሸ ኡባ፥ ሜቻ ከርያነ እያ ቶሁዋ፥ 10 አሮንነ እያ ናይት ካህነተꬃን ሀጋዝሸ ማእያ ካህነተꬃ ማኡዋ፥ 11 ሹማተꬃ ዛይትያነ ጌሻ በሳስ ሀንያ ሳውያ እፃንያ፥ ታኒ ነና ኪትዳይሳዳ ኤንቲ ኦꬃና” ያግስ።

12 ጎዳይ ሙሰ ሀይሳዳ ያግድ ኪትስ፤ 13 “እስራኤለ አሳ፥ ‘ታ ሳምባታ ናግተ። ሄስ ታኒ፥ ጎዳይ፥ ህንተና ታዉ ጌሻ ደረ ኦꬃዳ ዶርዳይሳ በሲያ ማላ ግድድ፥ ያና የለተꬃ ኡባስ ታፐነ ህንተፈ ግዶን ደኦ። 14 ሄ ጋላሳይ ጌሽ ግድያ ግሾ፥ እያ ቦንችተ። ሳምባታ ቦንቾናይነ ሄ ጋላሳን ኦሶ ኦꬅያ ኦንካ ታ አሳ ግዶፈ ꬋዮ ዎይኮ ሀይቆ። 15 ህንተ ኦሶ ኦꬃናዉ በሲያ ኡሱፑን ጋላሳት ደኦሶና። ሽን ላፑንꬃ ጋላሳይ ጎዳስ ዱማትዳ፥ ሸምፖ ጋላስ። ሳምባታ ጋላሳን ኦሶ ኦꬅያ ኦንካ ሀይቆ። 16 እስራኤለ የለተꬃ ኡባይ ሀ ሳምባታ ጋላሳ መርና ጫቆ ማላ ኦꬅድ ቦንቾ። 17 ታኒ ኡሱፑን ጋላሳን ሳሉዋነ ሳኣ መꬍዳ ግሾነ ላፑንꬃ ጋላሳን ኦሶ አጋዳ ሸምፕዳ ግሾ፥ ታ ግዶንነ እስራኤለታ ግዶን ሄስ መርናዉ ኤቅድ ደእያ ማላ ግዳና’ ያጋ” ያግስ።

18 ጎዳይ ሙሰ ሲና ዙማ ቦላ ኦድሰይሳ ኦንግዳ ዎደ፥ እ ባ ብራን ፃፍዳ ታሙ ኪታታ ኦይክዳ ናምኡ ሎቸ ሹቻታ ሙሰስ እሚስ።