1 አሳይ፥ ሙሰይ ዙማ ቦላፈ ዎꬋናዉ ጋምእዳይሳ በእዳ ዎደ አሮናኮ ይድ፥ “ኑና ካለꬅሸ ናጋና ፆሳታ ኑስ ኦꬃ። ግብፀ ቢታፈ ኑና ከስዳ ሙሰይ ዋንዳኮ ኤሮኮ” ያግዶሶና። 2 አሮን ኤንታኮ፥ “ህንተ ማቸታ፥ ህንተ አደ ናይታነ ህንተ ማጫ ናይታ ሀይꬃን ደእያ ዎርቃ ከስድ፥ ታዉ ሃ ኤክድ ዪተ” ያግስ። 3 አሳ ኡባይ ባንታ ሀይꬃ ዎርቃ ከስድ፥ አሮናስ ኤህዶሶና። 4 እ ሄሳ ኤንታፈ ኤክድ፥ ታማን ሼሽዳፐ ጉየ፥ ቆፅድ፥ ዎርቃ ማራ ምስለ ኦꬅድ መꬍስ።

ኤንቲ፥ “እስራኤለቶ፥ ኑና ግብፀ ቢታፈ ካለꬅድ ከስዳ ኑ ፆሳት ሀይሳታ” ያግዶሶና። 5 አሮን ሄሳ በእዳ ዎደ፥ ሄ ማራ ስንꬃን ያርሾ በሰ ጊግስድ፥ “ዎንቶ ጎዳ ቦንችያ ባኣለ ጋላስ ግዳና” ያግድ ኤርስስ። 6 ዎንተꬃ ጋላስ ጉራ አሳይ ደንድድ፥ ፁሳ ያርሾነ እስፈተꬃ ያርሾ ያርሽዶሶና። ያትድ፥ አሳይ ማናዉነ ኡያናዉ ኡትዶሶና። ም ኡይ ስሚድ፥ ዱራናዉነ ፖኮባ ሀናናዉ ደንድዶሶና።

7 ጎዳይ ሙሰኮ፥ “ኔኒ ግብፀፈ ከሳዳ፥ ኤህዳ ነ አሳይ ናጋራ ኦꬅድ፥ ባንታና ቱንስዳ ግሾ ኤለሳዳ ዱገ ዎꬋ። 8 ታኒ ኤንታ ኪትዳ ኦግያፐ ኤንቲ ኤለስድ ሽረትዶሶና። ዎርቃ ሼሽድ ማራ ምስለ ኦꬅድ፥ ባንታዉ ኤቃ መꬍድ እያ ጎይንዶሶና። እያዉ ያርሽድ፥ ‘ኑና ግብፀ ቢታፈ ከስዳ ኑ ፆሳይ ሀይሳ’ ያግዶሶና። 9 ጎዳይ ሙሰኮ፥ ሀ አሳይ አይ መላ ዎዛና ሙመኮ ታ በአስ። 10 ሀእ ታ ሀንቆይ ኤንታ ቦላ ኤፅን፥ ታኒ ኤንታ ꬋይሳናዉ ጊገትዳ ግሾ፥ ኔኒ ታና ድጎፋ። ያታዳ፥ ታኒ ነና ግታ ደረ ኦꬃና” ያግስ።

11 ሽን ሙሰይ ባ ጎዳ፥ ፆሳ ሀይሳዳ ያግድ ዎስስ፤ “አቤት ጎዳዉ፥ ኔኒ ነ ግታ ዎልቃንነ ነ ምኖ ኩሽያን ግብፀፈ ከሳዳ ኤህዳ ነ አሳ ቦላ ነ ሀንቆይ አይስ ኤፂ?ታይቦ 14:13-19. 12 ነ ሄሳ ኦꬅያባ ግድኮ፥ ግብፀት፥ ‘ጎዳይ ኤንታና ደረታ ቦላ ዎꬋናዉነ ቢታፈ ፕትድ ꬋይሳናዉ ከስስ’ አይስ ጋኔ? ነ ያሽያ ሀንቁዋፈ ስማ። ነ አሳ ꬋይሳናዉ ቆፕዳይሳ አጋ። 13 ነ አይለታ አብራሃመ፥ ይሳቃነ ያይቆባ ሀሳያ። ኔኒ ኤንታዉ፥ ‘ታኒ ህንተ ሼሻ ሳሎ ፆልንቶዳ ዳርሳና፤ ታኒ ህንተዉ እማና ግዳ ሀ ቢታ ኡባ ህንተ ሼሻታስ እማና፤ ኤንቲ ሄ ቢታ መርናዉ ላታና’ ጋዳ ነ ሁጰን ነ ጫቅዳ ጫቁዋ ቆፓ” ያግስ። 14 ሄሳ ግሾ፥ ጎዳይ ባ ደርያ ቦላ ኢታባ ኤሀናዉ ቆፕዳይሳ አግድ፥ ኤንታ ማርስ።

15 ሙሰይ ናምኡ ባጋራ ፃፈትዳ፥ ታሙ ኪታት ደእያ ናምኡ ሎቸ ሹቻታ ባ ኩሸን ኦይክድ፥ ዙማፐ ዱገ ዎꬍስ። 16 ሄ ማሰትዳ ሹቻታ ጊግስዳይ ፆሳ፤ ሹቻታ ቦላ ዎጭድ ፃፍዳይካ ፆሳ።

17 እያሱይ አሳ ኮሽንቻ ስእዳ ዎደ፥ ሙሰኮ፥ “አሳይ ሲራትዳ በሳን ኦላ ዋሶይ ስኤቴስ” ያግስ።

18 ሙሰይ ዛሪድ፥ “ሀይስ ፆንዳ አሳ ጬቆ ዎይኮ ፆነትዳ አሳ ዬሆ ግዶናሽን፥ የꬃ ዋሶ” ያግስ።

19 ሙሰይ ጉታኮ ማትዳ ዎደ ማራነ ዱርሳ በእድ ዳሮ ሀንቀትስ። ሄ ዎደ ባ ኩሸን ኦይክድ ይዳ፥ ማሰትዳ ሹቻታ ዙማ ፃጶን ሆልድ መንረꬅስ። 20 ኤንቲ መꬍዳ ማራ ኤክድ፥ ታማን ፁግስ። ሄሳፈ ጉየ፥ ሊቃና ጋካናዉ ጋጭድ ሃꬃራ ማꬍድ፥ እስራኤለ አሳይ ኡያናዳ ኦꬅስ።

21 ሙሰይ አሮናኮ፥ “ሀ አሳይ ነዉ አይ ኦꬅን፥ ኤንታ ሀይሳ መላ ኢታ ናጋራ ባንታ ቦላ ኦꬃና መላ ኦꬃዲ?” ያግስ።

22 አሮን ዛሪድ፥ “ታ ጎዳዉ፥ ታና ሀንቀቶፋ። ሀ አሳይ ኢታባ ኦꬃናዉ አይ መላ ኮያኮ ነ ኤራሳ። 23 ኤንቲ፥ ‘ኑና ግብፀፈ ከስድ ኤህዳ፥ ሙሰይ ዋንዳኮ ኑ ኤሮኮ። ሄሳ ግሾ፥ ካለꬅያ ፆሳታ ኑስ ኦꬃ’ ያግዶሶና። 24 ታኒ ኤንታኮ፥ ‘ህንተ ሀይꬃን ደእያ ዎርቃ ከስድ፥ ሀምተ’ ያጋስ። ኤንቲ ታዉ እምዳ ዎርቃ ታኒ ታማን የግን፥ ሀ ማራ ምስለይ ከይስ” ያግስ።

25 አሮን አሳ ጮ የድ አግን፥ አሳይ ባ ሞርከታ ስንꬃን ካዉይድ፥ ካትዳይሳ ሙሰይ በእስ። 26 ሄሳ ግሾ፥ ሙሰይ ጉታ ገልያ ፐንግያን ኤቅድ፥ “ጎዳ ባጋ ግድያ አስ ኦንካ ታኮ ዮ” ያግስ። ሄ ዎደ ሌወት ኡባይ እያኮ ሺቅዶሶና።

27 እ፥ ኤንታኮ፥ “ጎዳይ፥ እስራኤለ ፆሳይ፥ ህንተ እሶይ እሶይ ህንተ ማሻ ሾድድ፥ ጉታስ ሀ ፐንገፈ ህን ፐንገ ጋካናዉ ብድ፥ ህንተ እሻታ፥ ህንተ ላገታነ ህንተ ሾሮታ ዎꬍተ” ያግስ። 28 ሌወት ሙሰይ ኪትዳይሳዳ ኦꬅድ፥ ሄ ጋላስ ሄꬑ ሙኩሉ ግድያ አሳ ዎꬍዶሶና። 29 ሙሰይ ሌወታኮ፥ “ሀች ህንተ፥ ህንተ ናይታነ ህንተ እሻታ ዎꬋናዉ ኪተትድ ህንተና ጎዳስ ዱማይደታ። ጎዳይ ህንተና አንጅስ” ያግስ።

30 ዎንተꬃ ጋላስ ሙሰይ አሳኮ፥ “ህንተ ኢታ ናጋራ ኦꬅደታ፤ ሽን ሀእ ታኒ ጎዳኮ ዙማ ቦላ ከያዳ፥ ኦን ኤር ህንተ ናጋራስ አቶተꬅ ደሞና አግከ” ያግስ። 31 ያትን ሙሰይ ጎዳኮ ስሚድ ብድ፥ “ሀ አሳይ ኢታ ናጋራ ኦꬅዶሶና፤ ኤንቲ ባንታዉ ዎርቃፈ ፆሰ መꬍዶሶና። 32 ሽን ሀያና፥ ሀእ ኤንታ ናጋራ አቶ ያጋ። ሄስ ሀኖናባ ጊኮ፥ ነ አሳ ነ ፃፍዳ ማዝጋብያፐ ታ ሱንꬃ ቁቻ” ያግስ።

33 ጎዳይ ዛሪድ ሙሰኮ፥ “ታኒ ታ ማዝጋብያፐ ቁቻና አሳ ሱንꬃይ፥ ታ ቦላ ናጋራ ኦꬅዳይሳታ ሱንꬃ። 34 ሀእ ባዳ፥ ሀ አሳ ታኒ ነዉ ኦድዳ በሳ ካለꬃ። ታ ኪታንቾይካ ነና ካለꬃናይሳ አኬካ፥ ሽን ታኒ ሀ አሳ ኤንታ ናጋራ ግሾ ሴራና ዎደይ ያናይስ አተና” ያግስ።

35 አሮን ዎርቃፈ ማራ ምስልያ መꬋናዳ ኦꬅዳይ አሳ ግድያ ግሾ፥ ጎዳይ አሳ ቦላ ዎልቃማ ጋዶ የድስ።