1 ጎዳይ ሙሰኮ፥ “ኮይሮይሳታ ዳንያ ናምኡ ሎቸ ሹቻታ ማሳዳ ጊግሳ። ታኒ ሄ ሹቻታ ቦላ ካሰ ኔኒ መንꬅዳ ሹቻታ ቦላ ደእያ ቃላታ ፃፋና። 2 ዎንቶ ዎንታ ጉራ ታራ ጋሄታናዉ ሲና ዙማ ሁጵያ ከያ። 3 ኔራ ኦንካ ከዮፖ ዎይኮ ዙማ ቦላ አዉንካ በንቶፎ። ሀር አቶሽን ዶርሳ ዎይኮ መሄ ዉደይ ዙማ ፃጶን ሄመቶፎ ዎይኮ ሞፖ” ያግስ።

4 ሄሳ ግሾ፥ ሙሰይ ኮይሮ ሹቻታ ዳንያ ናምኡ ሹቻታ ማስድ፥ ጎዳይ ኪትዳይሳዳ፥ ሹቻታ ኦይክድ ዎንታ ጉራ ሲና ዙማ ቦላ ከይስ። 5 ጎዳይ ሻራራ ዎꬍድ፥ እያራ ያን ኤቅድ፥ “ታኒ ጎዳ” ያግድ ባ ጌሻ ሱንꬃ አዋጅስ። 6 ጎዳይ ሙሰ ስንꬃራ አꬍሸ ሀይሳዳ ያግድ አዋጅስ፤ “ታኒ ፆሳ፥ ታ ሱንꬃይ ጎዳ። ታኒ፥ ቃይነ ማሮታይ ኩምዳ ፆሳ። ታኒ ዳንዳአንነ መርና ሲቆን ኩምዳይሳነ ዳሮ አማንይሳ። 7 ታኒ፥ ታ አሳስ ገልያ ቃላ ሙኩሉ የለተꬅ ጋካናዉ ናገይሳነ ኢታተꬃ፥ ማካላነ ናጋራ አቶ ገይሳ። ሽን ሄꬓንꬆነ ኦይዳንꬆ የለተꬅ ጋካናዉ አዋታ ናጋራ ግሾ ናይታ ሴሮና አግከ” ያግስ።

8 ሙሰይ ኤለስድ ቢታን ጉፋንድ ጎይንስ። 9 እ ዛሪድ፥ “አቤት ጎዳዉ፥ ኔኒ ታናን ኡፋይትያባ ግድኮ፥ ኑራ እስፈ የꬋ። ሀይስ አሳይ ስኦና አስ፤ ኑ ኢታተꬃነ ኑ ናጋራ አቶ ያጋዳ፥ ኑና ነ አሰ ኦꬃ” ያግስ።

10 ጎዳይ ሙሰኮ፥ “ታኒ እስራኤለ አሳራ ጫቃና። ሀይሳፈ ካሰ ቢታ ቦላ አዉንካ ሀን ኤሮና ማላልስያባ ነ አሳ ስንꬃን ኦꬃና። ታኒ ጎዳይ፥ አይ መላ ማላልስያባ ኦꬅያኮ፥ ኔኒ ኤንታ ግዶን ደእያ አሳይ በአና። 11 ሀች ታኒ ህንተና ኪትያ ኪታ ናግተ። ህንተ ስንꬃፈ አሞረታ፥ ካናነታ፥ ህተታ፥ ፓርዘታ፥ ህወታነ ያቡሰታ ታኒ ጎዳና። 12 ኤንቲ ህንተዉ ፅሄ ግዶና መላ ህንተ ገልያ ቢታን ደእያ አሳራ ጫቆፍተ። 13 ኤንታ ያርሾ በሳታ ላልተ፤ ጎይኖ ቱሳታ መንረꬅተ። አሼራ ጌተትያ ማጫ ፆሰ ምስለ ቱሳታ ቃንፀረꬅተ። 14 ታኒ ጎዳይ፥ ታ ቦንቹዋ ሀራ ፆሳታራ ኮፆና ፆሰ ግድያ ግሾ፥ ታፐ ሀራ ፆሳታስ ጎይኖፍተ። 15 ሄ ቢታን ደእያ አሳታራ አይባ ጫቆካ ጫቆፍተ። ኤንቲ ባንታ ፆሳታ ጎይንያ ዎደነ ኤንታዉ ያርሽያ ዎደ፥ ኤንቲ ህንተና ባንታራ እስፋና መላ ኦይችኮ፥ ህንተ ኤንቲ ባንታ ፆሳታስ ያርሽያ ካꬃ ማናዉ ፓጨትድ፥ ታዉ አማነቶና እፃና። 16 ቃስ ህንተ ኤንታ ማጫ ናይታፐ ህንተ አደ ናይታስ እምኮ፥ ሄ ዎደ ሄ ማጫ ናይት ባንታ ፆሳታ ጎይንድ፥ ህንተ አደ ናይትካ ታዉ አማነቶና እፅድ፥ ባንታ ፆሳታ ጎይናና መላ ኦꬃና።

17 “ብራታፐ ቆፀትድ፥ መትዳ ፆሳታ ጎይኖፍተ።

18 “ኡይꬃ ባኣለ ቦንችተ። ህንተ ግብፀፈ ከይዳይ፥ አቢባ አጌናን ግድያ ግሾ፥ ታኒ ህንተና ኪትዳይሳዳ፥ ሄ አጌናን፥ ላፑን ጋላስ ጋካናዉ ኡይꬅ ሚተ።

19 “ባይራ የለትያ አደ ናእ ኡባይነ ባይራ የለትያ መሄ አደ ኡባይ ታባ። 20 ኮይሮ የለትዳ ሀረ ማር ዶርሳ ማራራ ላማዳ ዎዛ። ዎዞና እፅኮ፥ እያ ሞርግያ መንꬃ። ባይራ የለትዳ አደ ናአ ኡባ ዎዛ።

“ኦንካ እምያባ ኦይኮና መላ ኩሸ ታ ስንꬃን ሺቆፖ።

21 “ኡሱፑን ጋላስ ኦꬅተ፥ ሽን ላፑንꬃ ጋላሳን ሸምፕተ። ዘርያ ዎደ ግድን ዎይኮ ካꬃ ጫክያ ዎደ ላፑንꬃ ጋላሳን ሸምፕተ።

22 “ኮይሮ ህንተ ግስትያ ጫኮ ዶምያ ዎደ፥ ካꬃ ሺሾ ባኣለ ቦንችተ። ቃስ ላይꬃ ዉርሰꬃ ካꬃ ሺሽያ ዎደ፥ ሻቃራ ባኣለ ቦንችተ። 23 ላይꬃን ሄꬑ ቶሆ እስራኤለ አደ ኡባይ መተꬃ ጎዳ፥ እስራኤለ ፆሳ ጎይናናዉ ዮ። 24 ካዎተꬃታ ታኒ ህንተ ስንꬃፈ የደꬃ ከሳዳ ህንተ ዛዋ አሳና። ህንተ ታና ጎይናናዉ ላይꬃን ሄꬑ ቶሆ ይያ ዎደ፥ ኦንካ ህንተ ቢታ ኦልድ ኤካናዉ አሞተና።

25 “ህንተ ታዉ መሄ ያርሽያ ዎደ፥ እርሾ የግድ ኡክዳ ኡይꬃራ ሽሾፕተ። ፓስካ ቦንችያ ጋላሳስ ያርሽዳ ያርሹዋፈ ዎንታስ አይባካ አሾፍተ።

26 “ህንተ ጋደን ባይራ ካፅዳ ካꬃፈ ኮይሮ አይፍያ ጎዳ ህንተ ፆሳ ኬꬅ ኤህተ።

“ዴሻ ማር እያ አየ ማꬃን ዶይሶፕተ” ያግስ።

27 ጎዳይ ሙሰኮ፥ “ታኒ ኔራነ እስራኤለ አሳራ ጫቆ ገለይ ሀ ቃላታን ግድያ ግሾ፥ ሀ ቃላታ ፃፋ” ያግስ። 28 ሙሰይ ሞናነ ኡዮና፥ ኦይታሙ ጋላስነ ኦይታሙ ቃማ ጎዳራ ዙማ ቦላ ጋምእስ። እ፥ ጫቆ ቃላ ገልዳ ታሙ ኪታታ ሎቸ ሹቻታን ፃፍስ።

29 ሙሰይ ጎዳራ ኦደትሸ ጋምእድ፥ ታሙ ኪታታ ኦይክዳ ናምኡ ሎቸ ሹቻታ ኤክድ ሲና ዙማፐ ዎꬍያ ዎደ እያ ሶምኦይ ጶሌስ፥ ሽን እ ሄሳ ኤርቤና። 30 አሮንነ እስራኤለ አሳ ኡባይ ሙሰ ፄልድ፥ እያ ሶምኦይ ጶለይሳ በእድ፥ እያኮ ሺቃናዉ ያይዶሶና። 31 ሽን ሙሰይ ኤንታ ፄግስ። አሮንነ እስራኤለ ሀላቃት ኡባይ እያኮ ሺቅን፥ እ ኤንታ ኦድስስ። 32 ሄሳፈ ጉየ፥ እስራኤለ አሳ ኡባይ እያኮ ሺቅን፥ ጎዳይ እያዉ ሲና ዙማ ቦላ እምዳ ኪታ ኡባ እ ኤንታዉ እሚስ።

33 ሙሰይ ኤንታራ ኦደተይሳ ዉርስዳ ዎደ ባ ሶምኡዋ ላፃናን ካምስ። 34 ሽን ሙሰይ ጎዳ ስን፥ እያራ ኦደታናዉ ገልያ ዎደ ላፃና ባ ሶምኡዋፈ ቃሬስ። ያፐ ከይያ ዎደ፥ ጎዳይ እያ ኪትዳባ ኡባ እስራኤለ አሳስ ኦዴስ። 35 ሄ ኡባን ኤንቲ እያ ሶምኦይ ጶለይሳ በኦሶና። ሄሳ ግሾ፥ ሙሰይ ጎዳራ ኦደታናዉ ባና ጋካናዉ፥ ባ ሶምኡዋ ላፃናን ካሜስ።