1 ሙሰይ እስራኤለ አሳ ኡባ ፄግድ፥ “ህንተ ኦꬃና መላ ጎዳይ ኪትዳባይ ሀይሳ፤ 2 ሳምንታ ግዶን ኡሱፑን ጋላሳ ፃላላን ኦሶ ኦꬅተ፤ ሽን ላፑንꬃ ጋላሳይ ህንተዉ ጌሻ ጋላስ፤ ጎዳስካ ዱማትዳ ሸምፖ ሳምባታ። ሄ ጋላሳን ኦሶ ኦꬅያ ኦንካ ሀይቃናዉ በሴስ። 3 ሳምባታ ጋላስ ህንተ ሶን ታማ ኤꬆፍተ” ያግስ።

4 ሙሰይ እስራኤለ አሳኮ፥ “ጎዳይ ሀይሳዳ ያግድ ህንተና ኪትስ፤ 5 ጎዳስ ህንተ ዎዛናይ እሞ ግያባ እማናዉ ኤህተ። ህንተ እማናዉ ኤህያባት ዎርቃ፥ ብራ፥ ናሰ ብራታ፥ 6 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ፥ ዴሻ እክሰ፥ 7 ዞኦ ቃላመን የግ ከስዳ ዶርሳ እተ፥ ሎኦ ዶአ እተ፥ ሶቃላ ምꬅ፥ 8 ፆምፐስ ሻማሆ ዛይተ፥ ሹማተꬃ ዛይተ፥ እያን የገትያ ሳዋነ እፃነ ሳዎ፥ 9 ኤፉድያስነ ትራን ማኤትያ ማኡዋስ ሀንያ ማርግደ ጌተትያ ሹቻነ ሀራ አሌቆታ ኤሆ።

10 “ህንተ ግዶን ደእያ ኩሸ ሂላንቾ ኡባይ ይድ፥ ጎዳይ ኪትዳይሳ ኡባ ኦꬆ። 11 ጌሻ ዱንካንያ፥ እያ ጋꬃ ካማነ ካረ ካማ፥ ካቆታ፥ ቱቀታ፥ ልዮታ፥ ቱሳታነ ኤንቲ ኤቅያ ቶሆታ፤ 12 ታቦትያነ እያ ቶክያ ካሶ ምꬃታ፥ ናጋራ አቶተꬃ ካማነ ታቦትያ ገንꬅያ ማጋራጁዋ፤ 13 ፃርጴዛ፥ እያ ቶክያ ካሶ ምꬃታነ፥ እያ ሚሸታ ኡባነ ጎዳ ስንꬃን ዎꬅያ ጌሻ ኡይꬃ፤ 14 ፆምፐ ዎꬅያ ኮጫ፥ እያ ሚሸታ፥ ፆምፕያነ ፆምፐ ዛይትያ፤ 15 እፃነ ጩይስያ ፃርጴዛነ እያ ቶክያ ካሶታ፥ ሹማተꬃ ዛይትያነ ሳውያ እፃነ፥ ጌሻ ዱንካንያ ፐንገ ማጋራጁዋ፤ 16 ፁሳ ያርሾ በስነ እያ ናሰ ብራታ ዛርዛርያ፥ እያ ቶክያ ካሶታነ እያ ሚሸታ ኡባ፥ ናሰ ብራታፐ ኦሰትዳ ሜቻ ከርያነ እያ ቶሁዋ፤ 17 ዳባባ ጎዳ ገሸታ፥ ቱሳታነ ኤንታ ቶሆታ፥ ዳባባ ፐንገ ማጋራጁዋ፥ 18 ጌሻ ዱንካንያነ ዳባባ ዱንካንያ ቶለ ꬍሸታነ ኤንታ ዎዶሮታ፤ 19 አሮንነ እያ ናይት ጌሻ በሳን ሀጋዝሸ ማአናዉ አሌቀትድ ኦሰትዳ ቦንቾ ማኦታ ኦꬆ” ያግስ።

20 ሄሳፈ ጉየ፥ እስራኤለ አሳ ኡባይ ሙሰ ስንꬃፈ ከይዶሶና። 21 አሳ ኡባይ ባ ዎዛናን እሞ እሞ ግዳባ ጌሻ ዱንካንያስ፥ እያ ግዶን ኦሰትያ ኦሶ ኡባስነ ቦንቾ ካህነ ማኦታስ ኮሽያባ ኡባ ኤህዶሶና። 22 እማናዉ ኮይዳ ማጭ አደ ኡባይ ዎርቃ አሌቆታ፥ ሲ ዎርቃታ፥ ምግዶታ፥ ቆ ዎርቃ ኤህድ፥ ጎዳስ እሞ ኦꬅድ እምዶሶና። 23 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭና፥ አልኦ ሊኖ፥ ዎይኮ ዴሻ እክሰ፥ ዎይኮ ዞኦ ቃላመን የግ ከስዳ ዶርሳ እተ ዎይኮ፥ ሎኦ ዶአ እተይ ደእያ አስ ኡባይ ኤህስ። 24 ብራ ዎይኮ ናሰ ብራታ እማናዉ ዳንዳእያ ኡባይ ባንታ እሞታ ጎዳስ እምዶሶና። ቃስ ሶቃላ ምꬅ ደእያ አስ ኡባይ ዱማ ዱማ ኦሱዋስ ኤህስ።

25 ኩሸ ሂላ ማጫሳ ኡባይ ባንታ ኩሸን ሱቅዳ ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ ኤህዶሶና። 26 ቃስካ እሞታ እማናዉ ኮይዳ ማጫሳ ኡባይ ዴሻ እተፐ ዶቀትዳ ዎዶሮ ኤህዶሶና። 27 ሀላቃት ኤፉድያስነ ትራን ማኤትያ ማኡዋስ ሀንያ ማርግደነ ሀራ ሎኦ ሹቻታ፥ 28 ቃስካ ኤንቲ እፃነን፥ ሹማተꬃስነ ፆምፐስ ማድያ ሻማሆ ዛይተን የገትያ ሳዎ ኤህዶሶና። 29 እስራኤለ አሳ ኡባይ፥ ኦꬃና መላ ጎዳይ ሙሰ ባጋራ ኪትዳ ኦሱዋስ ሀንያ እሞታታ ኡባ ባንታ ዶሳን ጎዳስ ኤህዶሶና።

30 ሙሰይ እስራኤለ አሳኮ ሀይሳዳ ያግስ፤ “ጎዳይ ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤላ ዶርስ። 31 ጎዳይ እያ ባ አያናን፥ ሂላን፥ አኬካንነ ኦሶ ኡባ ኦꬅያ ኤራን ኩንꬅስ። 32 ሄስካ፥ ሂላን ኦꬃና ኦሶታ ሀልችድ ዎርቃፈ፥ ብራፐነ ናሰ ብራታፐ ዱማ ዱማባ ከስድ ኦꬃናሳ። 33 ሄሳዳካ፥ አልኦ ሹቹ ማስድ ጊግሶ፥ ምꬅ ማሰꬅነ ሀራ ኦሶ ኡባ ኦꬃና መላ ጭንጫተꬅ እሚስ። 34 ቃስ እያስነ ዳነ ሼሽ ግድዳ አህሳማካ ናኣ ኤልያባስ፥ ባንታ ሂላ ሀራታ ታማርሳና መላ ኤራተꬅ እሚስ 35 ኤንቲ ዱማ ዱማ ኦሶ ኦꬃና መላ ኦሶ ሀልቾ ከሳና መላ፥ ካሎሰን፥ ኦቻ ቴራ ዳነይሳንነ ዞኦ ሱፈ ቃጭናን አልኦ ሊኖ አሌቅስድ፥ ዳድያ ሂላተꬅ እሚስ። ጎዳይ ኤንታ፥ ኤራተꬃን ኩንꬅስ። ኤንቲ ኡባይ ዱማ ዱማ ኦሶን ሉፅዳ ሂላንቾ ግድዶሶና።