1 “ሄሳ ግሾ፥ ባስልኤል፥ ኤልያብነ ጌሻ ዱንካንያ ኬፃና መላ ጎዳይ ሂላነ ኤራተꬅ እምዳ አሳ ኡባይ፥ ጎዳይ ኪትዳይሳዳ ኡባባ ኦꬃና” ያግስ።

2 ሙሰይ ባስልኤላ፥ ኤልያባ፥ ጎዳይ ዱማ ኤራተꬅ እምዳይሳታነ ኦሶ ኦꬃናዉ ኮይያ ኡባ ፄግድ፥ ኦሱዋ ዶማና መላ ኪትስ። 3 ኤንቲ፥ እስራኤለ አሳይ ጌሻ ዱንካንያ ኦꬃናዉ ኤህዳ እሞ ኡባ ሙሰ ኩሸፐ ኤክዶሶና። ቃስ አሳይ ባ ዶሳን እምያ እሞታ ዎንታ ዎንታ ኤሁዋ አግቦኮና። 4 ያትን፥ ጌሻ ዱንካንያ ኦꬅያ ሂላንቾት ባንታ ኦሱዋ ኤስድ፥ ሙሰኮ ብድ፥ 5 “አሳይ፥ ጎዳይ ኪትዳ ኦሱዋስ ኮሸይሳፈ አꬅድ ኤሆ ቦላ ደኦሶና” ያግዶሶና።

6 ሙሰይ፥ “ጌሻ ዱንካንያ ኬፃናዉ ኦንካ እምያባ ኤሆፖ” ያግድ ኪትን፥ አሳይ ኤሄይሳ አጋግዶሶና። 7 ኤንቲ ኤህዳ እሞታይ ኦሶ ኡባ ኦꬅ ፖላናዉ ግድድ ፓላሄስ።

8 ኦሱዋ ኦይሳታፐ ሂላን አይሳት ጌሻ ዱንካንያ ኦꬅዶሶና። ኤንቲ እያ አልኦ ሊኖፐ፥ ካሎሰን ኦቻ ቴራ ዳነይሳንነ ዞኦ ቃጭናን አሌቅስድ ዳድዳ ታሙ ገሸታ ጊግስድ፥ እያ ቦላ ክሩበታ ምስልያ ስክዶሶና። 9 ማጋራጆት ኡባይ እስ ግና ግድድ፥ አዱሳተꬃይ ላታማነ ኦይዱ ዋꬋ፥ ጎምፓይ ኦይዱ ዋꬋ። 10 እቻሹ ገሸታ እስፈ ጋꬅድ ስክዶሶና፤ ቃስ ሀንኮ አትዳ እቻሹ ገሸታካ ሄሳዳ ኦꬅዶሶና። 11 እስፈ ጋꬅድ ስክዳ ገሸታፐ እስ ማጋራጁዋስ ዉርሰꬃ ጋፃን ካሎሰ አፍላፐ ኦሰትዳ ሳጋዮታ መꬍዶሶና። ቃስ እስፈ ጋꬅድ ስክዳ ሀንኮ ገሸታፐ እሱዋ ጋፃንካ ሄሳዳ ኦꬅዶሶና። 12 ኤንቲ እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ፥ ሄሳዳካ ናምአንꬆ ማጋራጁዋ ቦላ ዉርሰꬃ ማራን፥ ሀንኮ ሳጋዮታ ግናን፥ እሻታሙ ሳጋዮታ ኦꬅዶሶና። 13 ኤንቲ ናምኡ ባጋን ደእያ ገሸታ ጋሰꬅድ እስኖ ኦꬃናዉ ዎርቃፈ እሻታሙ ኦይክያ በሳታ መꬍዶሶና።

14 ጌሻ ዱንካንያ ቦላራ ካማናዉ ታማነ እስ ገሸታ ዴሻ እክሰፐ ዳድዶሶና። 15 ታማነ እስ ገሸታ አዱሳተꬃ ላታማነ ኡሱፑን ዋꬋ፥ ጎምፓ ኦይዱ ዋꬋ ኦꬅድ መꬍዶሶና። 16 እቻሹ ገሸታ እስ ባጋራ፥ ቃስ ኡሱፑን ገሸታ ሀንኮ ባጋራ ጋꬅድ ስክዶሶና። 17 ዎል ጋꬅድ ስክዳ ገሸታፐ ዉርሰꬃ ማጋራጁዋ ማጫራን እሻታሙ ሳጋዮታ፥ ቃስ ዎል ጋꬅድ ስክዳ ሀንኮ ገሸታፐ ዉርሰꬃ ማጋራጁዋ ማጫራን እሻታሙ ሳጋዮታ መꬍዶሶና። 18 ናምኡ ባጋራ ደእያ ገሸታ ጋሰꬅድ እስ ካማ ኦꬃናዉ ናሰ ብራታፐ እሻታሙ ኦይክያ በሳታ መꬍዶሶና። 19 ዱንካንያ ካማናዉ ዞኦ ቃላመን የግ ከስዳ ዶርሳ እተ፥ ቃስ እያ ቦላራ ካማናዉ ሎኦ ዶአ እተ ጊግስዶሶና።

20 ጌሻ ዱንካንያ ቱቀታ ሶቃላ ምꬃፈ ከስዶሶና። 21 እስ እስ ቱቅያ አዱሳተꬃይ ታሙ ዋꬋ፥ ጎምፓይ እስ ዋꬋነ ታካꬎ። 22 እስ ቱቅያ እሱዋራ ጋሰꬃናዉ ናምኡ ሉሆት ደኦሶና። ጌሻ ዱንካንያ ቱቀታ ኡባ ሄሳዳ ኦꬅዶሶና። 23 ጌሻ ዱንካንያስ ዱገሀ ባጋራ ላታሙ ቱቀታ መꬍዶሶና። 24 እስ እስ ቱቀታስ ናምኡ ቶሆ መꬍድ፥ ሄ ቶሆታ ኦይꬃናዉ ኦይታሙ ሉሆታ ብራታፐ ጊግስዶሶና። 25 ጌሻ ዱንካንያስ ፑደሀ ባጋራ ላታሙ ቱቀታ መꬍዶሶና። 26 እስ እስ ቱቀታስ ናምኡ ቶሆ መꬍድ፥ ሄ ቶሆታ ኦይꬃናዉ ኦይታሙ ሉሆታ ብራታፐ ጊግስዶሶና። 27 ጌሻ ዱንካንያስ ጉየ ባጋን፥ ዉሎሀ ባጋራ ኡሱፑን ቱቀታ መꬍዶሶና። 28 ጌሻ ዱንካንያ ጉየ ባጋን ደእያ ማዛነታስ ናምኡ ቱቀታ ጊግስዶሶና። 29 ሄ ናምኡ ማዛነ ቱቀት ፃጶፐ ፄራ ጋካናዉ ኦይከት ብዶሶና። ናምኡ ማዛንያን ደእያ ናምኡ ቱቀት ሄሳዳ ሀንድ ኦሰትዶሶና። 30 ሄሳ ግሾ፥ እስ እስ ቱቅያስ ጋርሳን ናምኡ ናምኡ ቶሆት ደኦሶና። ሆስፑን ቱቀታስ ብራታፐ ኦሰትዳ ታማነ ኡሱፑን ቶሆት ደኦሶና።

31 ቃስ ኤንቲ ሶቃላ ምꬃፈ ታማነ እቻሹ ልዮታ ከስዶሶና። እቻሹ ልዮት ጌሻ ዱንካንያ እስ ባጋ ምየን፥ 32 ቃስ እቻሹ ልዮታ ሀንኮ ባጋ ምየን፥ ሄሳዳካ እቻሹ ልዮታ ጉየ ባጋራ ዉሎሀ ባጋን ዎꬅዶሶና። 33 ቱኡቀታስ ምየ ባጋራ ግዶን ደእያ ልዮይ፥ ሀ ጋፃፐ ያ ጋፃ ጋካናዉ ካንꬅ ከያና መላ ኦꬅዶሶና። 34 ቱኡቀታነ ልዮታ ዎርቃን ላንፅዶሶና። ልዮት ኤንታ ግዶራ ካንꬅ አꬋና መላ ዎርቃ ሳጋዮታ ቱቀታራ ኦይሰꬅዶሶና።

35 ማጋራጁዋ አልኦ ሊኖፐ ካሎሰን፥ ኦቻ ቴራ ዳነይሳንነ፥ ዞኦ ቃጭናን አሌቅስድ ኦꬅዶሶና። ሄ ማጋራጁዋ ቦላ ክሩበ ምስለታ ስክዶሶና። 36 ማጋራጁዋ ካቃናዉ ኦይዱ ቱሳታ ሶቃላ ምꬃፈ ጊግስድ፥ ዎርቃን ላንፅዶሶና። ያትድ ዎርቃ ሳጋዮታ ኤንታስ ጊግስዶሶና። ቃስ ቱሳታ ኤስያ ኦይዱ ቶሆታ ብራ ብራታፐ መꬍዶሶና። 37 ጌሻ ዱንካንያ ፐንግያስ አልኦ ሊኖፐ ካሎሰን፥ ኦቻ ቴራ ዳነይሳፈነ ዞኦ ቃጭናን አሌቅስድ ማጋራጆ ጊግስዶሶና። 38 ቃስ እያዉ ኮጫት ደእያ እቻሹ ቱሳታ መꬍድ፥ ኤንታዉ ፄራነ ቶሁዋ ዎርቃን ላንፅዶሶና። ቱሳታስ ናሰ ብራታፐ ኦሰትዳ እቻሹ ቶሆታ ጊግስዶሶና።