1 ባስልኤል ታቦትያ ሶቃላ ምꬃፈ ጊግስስ። ታቦትያ አዱሳተꬃይ ናምኡ ዋꬋነ ባጋ፥ ጎምፓይነ ጌሳይ እስ ዋꬋነ ባጋ። 2 ታቦትያ ጊግስድ፥ ጋꬃነ ካርያ ዋላህ ባይና ዎርቃን ላንፅስ። እያ ዩሹዋ ቦላካ ዎርቃን ላንፅስ። 3 ኦይዱ ዎርቃ ሳጋዮታ ታቦትያስ ኦይዱ ገዳታ ቦላ፥ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አꬅስ። 4 ያትድ ሶቃላ ምꬃፈ ኦሰትዳ ካሶታ ከስድ ኤንታ ዎርቃን ላንፅስ። 5 ታቦትያ ቶካናዉ፥ ታቦትያስ ምይያን ደእያ ሳጋዮታን ካሶታ አꬅስ።

6 ዋላህ ባይና ዎርቃፈ፥ አዱሳተꬃይ ናምኡ ዋꬋነ ባጋ፥ ጎምፓይ እስ ዋꬋነ ባጋ ግድዳ ናጋራ አቶተꬃ ካማ ኦꬅስ። 7 ቀፈይ ደእያ ናምኡ ክሩበታ ቆፀትዳ ዎርቃፈ ኦꬅድ፥ 8 እስ ክሩብያ እስ ባጋን፥ ሀንኮ ክሩብያ ሀንኮ ባጋን ዎꬅድ፥ አቶተꬃ ካሙዋራ እስኖ ኦꬅድ መꬍስ። 9 ክሩበት ባንታ ቀፍያ ምጭድ፥ አቶተꬃ ካሙዋ ካምድ፥ እሶይ እሱዋ ፄሎሶና።

10 አዱሳተꬃይ ናምኡ ዋꬋ፥ ጎምፓይ እስ ዋꬋ፥ ጌሳይ እስ ዋꬋነ ባጋ ግድዳ ፃርጴዛ ሶቃላ ምꬃፈ መꬍስ። 11 ዋላህ ባይና ዎርቃን እያ ላንፅድ፥ ዩሹዋካ ዎርቃን ላንፅስ። 12 ሄሳዳካ፥ ጎምፓይ ታካꬎ ግድያ ጎሰ ኦꬅድ፥ እያ ዎርቃን ዩሽ አꬅድ ላንፅስ። 13 ታቦትያ ቶካናዉ ማድያ ኦይዱ ዎርቃ ሳጋዮታ መꬍድ፥ ኦይዱ ገዳታ ኦይዱ ማዛነታ ቦላ ዎꬅስ። 14 ፃርጴዛ ቶካናዉ ካሶታ አꬅያ ሳጋዮት ፃርጴዛ ጎሳ ማታን ኦሰትዶሶና። 15 ፃርጴዛ ቶክያ ካሶ ምꬃታ ሶቃላ ምꬃፈ ከስድ፥ ዎርቃን ላንፅስ። 16 ሄሳዳካ፥ ፃርጴዛ ቦላ ዎꬅያ ዱማ ዱማ ሚሸታ ዋላህ ባይና ዎርቃፈ መꬍስ። ሄሳትካ ሳነታ፥ ጭልፓታ፥ ከረታ፥ ዎይነ ያርሾ ትግያ ፁአታ።

17 ሄሳፈ ጉየ፥ ባስልኤል ፆምፐ ዎꬅያ ኮጫ ዋላህ ባይና ዎርቃፈ ኦꬅስ። ኮጫ ኤስያ ቶሁዋነ ቶማ ቆፀትዳ ዎርቃፈ ጊግስስ። አሌቆስ ኦሰትያ፥ እያ ጋምቡꬃታ፥ እያ ዋላፃታነ እያ ጪሻታ ኡባ እያራ እስፈ ኦይꬅድ መꬍስ። 18 እስ ባጋራ ሄꬑ ታሸት፥ ቃስ ሀንኮ ባጋራ ሄꬑ ታሸት ደእያ ኡሱፑን ታሸታ እያ ምይያን መꬍስ። 19 ኡሱፑን ታሸታስ ፄራን ፄራን ሄꬑ ሄꬑ አሌቆ ጋምቡꬃትነ ጪሻት ደእያ ላዉዘ ምꬃ ጪሸ ዳንያባ መꬍስ። 20 ፆምፐ ዎꬅያ ኮጫ ግዶን ደእያ ቶማ ፄራን ኦይዱ አሌቆ ጋምቡꬃትነ ጪሻት ደእያ ላዉዘ ምꬃ ጪሸ ዳንያባ መꬍስ። 21 ዋꬃን ደእያ ሄꬑ ሄꬑ ታሸታፐ ጋርሳን እስ እስ ጋምቡꬅ ኦሰትስ። 22 ጋምቡꬃት፥ ታሸትነ ፆምፐ ዎꬅያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰትዶሶና።

23 ፆምፐ ዎꬅያ ኮጫስ ላፑን ፆምፐታ፥ ፆምፐ ቶይስያ ቃጰታነ ኤንታ ዎꬅያባታ ዋላህ ባይና ዎርቃፈ ኦꬅስ። 24 ፆምፐ ዎꬅያ ኮጫነ እያዉ ጎኤትያ ሚሸ ኡባ ኦꬃናዉ ሀስታማነ እቻሹ ክሎ ግራመ ግድያ፥ ዋላህ ባይና ዎርቃ ኦንግስ።

25 ባስልኤል እፃነ ጩይስያ ፃርጴዛ ሶቃላ ምꬃፈ ጊግስስ። እያዉ ኦይዱ ማዛነይ ደኤስ። ሄ ፃርጴዛስ አዱሳተꬃይነ ጎምፓይ እስ ዋꬋ፤ ቃስ ጌሳይ ናምኡ ዋꬋ። ኦይዱ ማዛንያን ደእያ ካጨት እያራ እስኖ ግድ ኦይከትድ ኦሰትዶሶና። 26 እያዉ ቦላ ባጋ፥ ኦይዱ ምያነ ካጨታ ዋላህ ባይና ዎርቃን ላንፅስ፥ እያ ዩሹዋካ ዎርቃን ላንፅድ ዩሽ አꬅስ። 27 እያዉ ጋፃ ቦላ ቶካናዉ ማድያ ናምኡ ዎርቃ ሳጋዮታ መꬍድ፥ ናምኡ ባጋ ምይያን ዎꬅስ። ኤንቲ እፃነ ፃርጴዛ ቶክያ ዎደ ካሶ ምꬃታ አꬃናዉ ማደይሳታ። 28 ካሶ ምꬃታ ሶቃላ ምꬃፈ ከስድ፥ ዎርቃን ላንፅስ።

29 ጌሻ ሹማተꬃ ዛይትያነ ሳውያ ሎኦ እፃነ ሽቶዳ ዋላክድ ኦꬅስ።