1 ሶቃላ ምꬃፈ ፁሳ ያርሾ በሲ ኦꬅስ። ሄ ያርሾ በሳ አዱሳተꬃይነ ጎምፓይ፥ እቻሹ እቻሹ ዋꬋ፥ ቃስ ጌሳይ ናምኡ ዋꬋነ ታካꬎ። እያዉ ኦይዱ ማዛነይ ደኤስ። 2 ኦይዱ ማዛነታራ ኦይከትድ ኦሰትዳ ካጨታ መꬍስ። ያትድ፥ ሄ ያርሾ በሳ ናሰ ብራታን ላንፅስ። 3 ሄ ያርሾ በሳን ጎኤትያ ሚሸታ፥ ድስተታ፥ ባልደታ፥ አካፋታ፥ አሹዋ ቃጵያ ቃጰታነ ታማ ጮጨታ ኡባ ናሰ ብራታፐ መꬍስ። 4 ናሰ ብራታፐ ግተ ዳንያ ተቀ ያርሾ በሳስ ጊግስድ፥ ያርሾ በሳስ ግዶ ዛዋ ዩሽ አꬅድ ዎꬅስ። 5 ቶካናዉ ማድያ ካሶታ አꬃናዉ፥ ኦይዱ ሳጋዮታ መꬍድ፥ ኦይዱ ማዛነታ ቦላ ዎꬅስ። 6 ሶቃላ ምꬃፈ ያርሾ በሳ ቶክያ ካሶ ምꬃታ ከስድ፥ ናሰ ብራታን ላንፅስ። 7 ሀ ካሶታ ናምኡ ምየን ደእያ ሳጋዮታን አꬅስ። ያርሾ በሳ ፃዉላፐ ጊግስድ፥ ግዱዋ ካይስ ኦꬅስ።

8 ናሰ ብራታፐ ሜቻ ከረነ እያ ዎꬅያ ቶሆ መꬍስ። ሄ ናሰ ብራታይ፥ ጌሻ ዱንካንያ ፐንገን ኦꬅያ ማጫሳት ኤህዳ ማስቶትያፐ ኤከትስ።

9 ጌሻ ዱንካንያስ ዳባባ ባጋ ገቻናዉ አልኦ ሊኖፐ ማጋራጆ ኦꬅስ። ዱገሀ ባጋ ገሸታስ አዱሳተꬃይ ፄቱ ዋꬋ። 10 ገሸታስ ካተ ግዳና መላ ላታሙ ቱሳታነ ኤንቲ ኤቅያ ቶሆታ ናሰ ብራታፐ ኦꬅስ። ኤንታ ፃምአታነ ካጨታ ብራ ብራታፐ ኦꬅስ። 11 ፑደሀ ባጋ ዳባባይካ ሄሳዳ ሀንድ ኦሰትስ። 12 ዉሎሀ ባጋ ገሸታ አዱሳተꬃይ እሻታሙ ዋꬋ። ኤንታዉ ታሙ ቱሳትነ ቱሳት ኤቅያ ታሙ ቶሆት ደኦሶና። ቱሳታስ ብራ ብራታፐ ኦሰትዳ ፃምአትነ ካጨት ደኦሶና። 13 ዳባባ ገልያ ፐንገይ ደእያ፥ ዶሎሀ ባጋ ማጋራጁዋ ጎምፓይ እሻታሙ ዋꬋ። 14 እስ ባጋራ ደእያ ማጋራጁዋ አዱሳተꬃይ ታማነ እቻሹ ዋꬋ። እያዉ ሄꬑ ቱሳትነ ቱሳት ኤቅያ ቶሆት ደኦሶና። 15 ሀንኮ ባጋራ ደእያ ማጋራጁዋ አዱሳተꬃይ ታማነ እቻሹ ዋꬋ። እያዉ ሄꬑ ቱሳትነ ቱሳት ኤቅያ ቶሆት ደኦሶና። 16 ዳባባ ዩሹዋን ደእያ ገሸት ኡባይ አልኦ ሊኖፐ ኦሰትዶሶና። 17 ቱኡሳት ኤቅያ ቶሆት ናሰ ብራታፐ ኦሰትዶሶና። ፃምአት፥ ካጨትነ ቱሳታ ፄራ ጎሳት ብራ ብራታፐ ኦሰትዶሶና። ዳባባ ዩሹዋን ደእያ ቱሳት ኡባይ ብራ ፃምአታን ኦይከትዶሶና። 18 ዳባባ ፐንግያን ደእያ ማጋራጁዋ አልኦ ሊኖፐ ኦꬅድ፥ ካሎሰን ኦቻ ቴራ ዳነይሳንነ ዞኦ ቃጭናን ዳድድ አሌቅስስ። እያዉ ሀንኮ ዳባባ ገሸታዳ አዱሳተꬃይ ላታሙ ዋꬋ፤ ቃስ ጌሳይ እቻሹ ዋꬋ። 19 እያ፥ ኦይዱ ቶሆት ደእያ ኦይዱ ቱሳታ ቦላ ካቅስ። ካጨት፥ ፃራ ካመይሳትነ ፃምአት ብራ ብራታፐ ኦሰትዶሶና። 20 ጌሻ ዱንካንያ ꬍሸትነ እያ ዩሹዋን ደእያ ገሸታ ꬍሸት ኡባይ ናሰ ብራታፐ ኦሰትዶሶና።

21 ታሙ ኪታታ ኦይክዳ ናምኡ ሎቸ ሹቻት ደእያ በሳን፥ ጌሻ ዱንካንያን፥ ጎኤትያ ሚሸታ ማዝጋበይ ሀይሳ። ሄ ሚሸታ ማዝጋባና መላ ካህንያ አሮና ናአ እታማራ አዋተꬃ ጋርሳን ደእያ ሌወታ ሙሰይ ኪትስ።

22 ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤል፥ ጎዳይ ኪትዳይሳዳ ኡባባ ኦꬅስ። 23 ዳነ ሼሻፐ ግድዳ አህሳማካ ናኣ ኤልያብ፥ ኩሸ ሂላንቾይ፥ ኦꬅያባስ ኮይሮ ሀልቾ ከስያ አስ፤ እ፥ ካሎሰ፥ ኦቻ ቴራ ዳነይሳነ ዞኦ ቃጭናን አልኦ ሊኖ ዳድድ አሌቅስያ አስ። 24 ጌሻ ዱንካንያ ኦሱዋስ ሀናና መላ ጎዳስ እመትዳ ዎርቃይ ጌሻ ዱንካነን ኤረትዳ ምዛነን እስ ሙኩሉ ክሎ ግራመ ግድስ። 25 ታይቦን ደእያ አሳፐ ኤከትዳ ብራይ ጌሻ ዱንካነን ኤረትዳ ምዛነን፥ ሄꬑ ሙኩሉነ ኦይዱ ፄታነ ሀስታሙ ክሎ ግራመ ግድስ። 26 ሄስካ፥ ታይቦን ገልዳ አደ አሳይ፥ እሶይ እሶይ ጌሻ ዱንካነን ኤረትዳ ምዛንያ ልከን ኮየትያ ኡባ እምዶሶና። ላታሙ ላይꬅነ እያፐ ቦላ ግድዳ፥ ማዝጋበን ገልዳ፥ አደ አሳ ታይቦይ ኡሱፑን ፄታነ ሄꬑ ሙኩሉነ እቻሹ ፄታነ እሻታማ። 27 ጌሻ ዱንካንያነ ማጋራጆታ ኤሳናዉ ማድያ ፄቱ ቶሆታ ኦꬃናዉ 3,400 ክሎ ግራመ ብራ ብራታ ኤክዶሶና። ሄስካ፥ እስ እስ ቶሆይ ሀስታማነ ኦይዱ ክሎ ግራመ ብራ ብራታ ኤክስ። 28 ባስልኤል፥ አትዳ ሀስታሙ ክሎ ግራመ ብራ ብራታን ፃምአታ፥ ካጨታነ ቱሳታስ ፄራ ጎሳታ ኦꬅስ። 29 አሳይ ጎዳስ እምዳ ናሰ ብራታይ 2,425 ክሎ ግራመ። 30 ሄ ናሰ ብራታን ጌሻ ዱንካንያ ፐንግያ ኤስያ ቶሆታ፥ ግተ ዳንያባራ ናሰ ብራታ ያርሾ በሳነ እያ ግዶን ጎኤትያ ዱማ ዱማ ሚሸታ መꬍስ። 31 ቃስ ዳባባ ዩሹዋን ደእያ ድርሳ ቶሆትነ ፐንግያ ቦላ ኤቅዳ ቶሆት፥ ጌሻ ዱንካነይነ እያ ዩሹዋን ደእያ ዳባባ ድርሳ ꬍሸት ኡባይ ሄ ናሰ ብራታፐ ኦሰትዶሶና።