1 ጎዳይ ሙሰኮ ሀይሳዳ ያግስ፤ 2 “ኮይሮ አጌናን፥ ኮይሮ ጋላሳን፥ ጌሻ ዱንካንያ ቶካ። 3 ታሙ ኪታታ ኦይክዳ ጫቆ ታቦትያ እያ ግዶን ዎꬃዳ፥ እያ ስንꬃን ማጋራጁዋ ካቃ። 4 ፃርጴዛ ጋꬅ ገልሳዳ፥ ኮሽያ ሚሸታ ኡባ እያ ቦላ ዎꬃ። ፆምፐ ዎꬅያ ኮጫ ገልሳዳ እያ ቦላ ፆምፐታ ዎꬃ። 5 እፃነ ጩይስያ ዎርቃ ፃርጴዛ ጫቆ ታቦትያ ስንꬃን ዎꬃ። ጌሻ ዱንካንያ ፐንገ ማጋራጁዋ ካቃ። 6 ፁሳ ያርሾ በሲ ጌሻ ዱንካንያ ስንꬃን ዎꬃ። 7 ሜቻ ከርያ ጌሻ ዱንካንያፐነ ያርሾ በሳፈ ግዶን ዎꬃዳ፥ እያን ሃ ኩንꬃ። 8 ጌሻ ዱንካንያፐ ካረራ ዳባባ ዩሻ አꬃ ጊግሳዳ፥ ማጋራጁዋ ዱንካንያ ፐንገ ቦላ ካቃ።

9 “ያታዳ፥ ጌሻ ዛይትያ ኤካዳ፥ ጌሻ ዱንካንያነ እያ ግዶን ደእያ ኡባባ ትያዳ፥ ዱማያ፤ እ ጌሽ ግዳና። 10 ካላዳ፥ ፁሳ ያርሾ በስነ እያን ጎኤትያ ሚሸ ኡባ ትያዳ፥ ዱማያ፤ እ ፖሎ ጌሽ ግዳና። 11 ሜቻ ከርያነ እያ ዎꬅያ ሚሸታ ትያዳ፥ ዱማያ።

12 “አሮናነ እያ ናይታ ጌሻ ዱንካንያ ፐንገ ኤሀዳ ሃꬃን ኤንታ ሜጫ። 13 ካህነ ማኡዋ አሮና ማይዛዳ፥ እ ታዉ ካህነተꬃን ኦꬃና መላ እያ ትያዳ፥ ዱማያ። 14 እያ አደ ናይታካ ኤሀዳ ሻምዘ ማይዛ። 15 ኤንቲ ታዉ ካህነተꬃን ኦꬃና መላ፥ ኤንታ አዋይ ትየትዳይሳዳ፥ ኤንታካ ትያ። ሄ ትሻ ጋሶን፥ ያና ላይꬃ ኡባን፥ ኤንቲ ታዉ ካህነ ግድድ ኦꬃና” ያግስ።

16 ሙሰይ፥ ኡባባ ጎዳይ ኪትዳይሳዳ ኦꬅስ።

17 ሄሳ ግሾ፥ ኤንቲ ግብፀፈ ከይዳ ናምአንꬆ ላይꬃን፥ ኮይሮ አጌናን፥ ኮይሮ ጋላሳን ጌሻ ዱንካንያ ቶክስ። 18 ሙሰይ፥ ዱንካንያ ቶሆታ ኤስስ፥ ቱቀታ፥ ልዮታነ ቱሳታ አꬅስ። 19 ጎዳይ ኪትዳይሳዳ፥ ሙሰይ፥ ጋርሳ ካማነ ቦላ ካማ ዱንካንያ ቦላ ካምስ።

20 ያትድ፥ ታሙ ኪታታ ኦይክዳ ናምኡ ሎቸ ሹቻታ፥ ታቦትያ ግዶን ዎꬅስ። ቶሆ ካሶ ምꬃታ ታቦትያ ሳጋዮታን አꬅስ፤ ናጋራ አቶተꬃ ካማካ ታቦትያ ቦላ ዎꬅስ። 21 ታቦትያ ጌሻ ዱንካንያ ግዶ ገልስድ፥ ገሸ ማጋራጁዋ ካቅስ። ያትድ፥ ጎዳይ ኪትዳይሳዳ፥ ጫቆ ታቦትያ ካምስ።

22 ሙሰይ፥ ፃርጴዛ ጌሻ ዱንካንያ ግዶ ገልስድ፥ ማጋራጁዋፈ ካረራ፥ ፑደሀ ባጋን ዎꬅስ። 23 ጎዳይ ኪትዳይሳዳ፥ ጎዳ ስንꬃን ዎꬅያ ጌሻ ዳቡዋ እያ ቦላ ዎꬅስ።

24 ፆምፐ ዎꬅያ ኮጫ፥ ጌሻ ዱንካንያ ግዶ ገልስድ፥ ፃርጴዛፐ ስንꬃ ባጋራ ጌሻ ዱንካንያስ ዱገሀ ባጋን ዎꬅስ። 25 ጎዳይ ኪትዳይሳዳ፥ ሙሰይ፥ ጎዳ ስንꬃን ፆምፐታ ኦይꬅስ። 26 ሙሰይ፥ ዎርቃ ያርሾ በሳ ጌሻ ዱንካንያ ግዶ ገልስድ፥ ማጋራጁዋፈ ስንꬃ ባጋራ ዎꬅስ። 27 ጎዳይ ኪትዳይሳዳ፥ ሳውያ እፃነ እያ ቦላ ጩይስስ። 28 ጌሻ ዱንካንያ ፐንገን ማጋራጁዋ ካቅስ።

29 ፁሳ ያርሾ በሲ፥ ጌሻ ዱንካንያ ፐንገ ስንꬃን ዎꬅስ። ጎዳይ ኪትዳይሳዳ፥ እያ ቦላ ፁሳ ያርሾነ ካꬃ ያርሾ ያርሽስ።

30 ሜቻ ከርያ ጌሻ ዱንካንያፐነ ያርሾ በሳፈ ግዶን ዎꬅድ፥ እያን ሃ ኩንꬅስ። 31 ሙሰይ፥ አሮንነ እያ ናይት ባንታ ኩሽያነ ቶሁዋ እያን ሜጨትዶሶና። 32 ጎዳይ ኪትዳይሳዳ፥ ኤንቲ ጌሻ ዱንካንያ ገልያ ዎደ ዎይኮ ያርሾ በሲ ሺቅያ ዎደ ሄሳ ኦꬆሶና።

33 ጌሻ ዱንካንያነ ያርሾ በሳ ዩሽ አꬅድ ዳባባ ጊግስድ፥ ሄ ዳባባ ፐንገን ማጋራጆ ካቅስ። ሄሳዳ ኦꬅድ፥ ሙሰይ ኦሱዋ ፖልስ።

34 ሄሳፈ ጉየ፥ ሻራይ ጌሻ ዱንካንያ ካምስ፤ ጎዳ ቦንቾይካ እያ ኩምስ። 1 ካዎ 8:10-11፤ እሳ 6:4፤ ህዝ 43:4-5፤ ቆን 15:8. 35 ሻራይ ጌሻ ዱንካንያ ካምዳ ግሾነ ጎዳ ቦንቾይ እያን ኩምዳ ግሾ፥ ሙሰይ እያ ግዶ ገላናዉ ዳንዳእቤና።

36 እስራኤለት ባንታ ደእያ በሳ የድድ፥ ባናዉ ደንደይ፥ ሄ ሻራይ ዱንካንያፐ ደንድያ ዎደና። 37 ሽን ሻራይ ደንዶና እፅኮ፥ ኤንቲ ባንታ ደእያ በሳ የድድ ቦኮና። 38 ጎዳ ሻራይ ጋላስ ጋላስ ጌሻ ዱንካንያ ካሜስ፥ ቃማ ቃማ ቃስ ሻራ ግዶን ታማይ ኤፄስ። እስራኤለ አሳይ ብያ ዎደ ኡባን ሄ ሻራ በኦሶና።