1 ጎዳ ፆሳይ፥ ጌሻ ዱንካንያ ግዶን ግድድ ሙሰ ፄግድ ያግስ፤ 2 እስራኤለ አሳስ ሀይሳዳ ያጋዳ ኦዳ፤ ህንተፈ ኦንካ ጎዳስ ያርሾ ያርሽያ ዎደ ባ መህያፐ፥ ባ ዶርሳፈነ ባ ዴሻፐ ኤሆ። 3 ሄ ያርሾይ መሄፐ ፁሳ ያርሾስ ግድኮ ቦረይ ባይና ዎፋኖ ግዶ። ጎዳይ ሄ ያርሹዋ ኤካና መላ ጌሻ ዱንካንያ ገልያ ፐንገን ያርሾ። 4 ያርሹዋ ያርሽያ ኡራይ ፁሳ ያርሾስ ኤህዳ መህያ ሁጰን ባ ኩሽያ ዎꬆ። ሄስ እያ ናጋራ አቶተꬃስ ጎዳይ ኤክዳ ያርሾ ግዳና። 5 እ ሄ ዎፋኑዋ ጎዳ ስንꬃን ሹኮ፤ ካህነት፥ አሮና ናይት ሄ ሱꬃ ኤክድ፥ ጌሻ ዱንካነ ገልያ ፐንገን ደእያ ያርሾ በሳ ኦይዱ ማዛነታ ቦላ ዉርፆ። 6 ሄ መህያ ጋልባ ቃርድ፥ አሹዋ ቆሞን ቆሞን ከሶ። 7 ካህንያ አሮና ናይት ያርሾ በሳን ምꬅ ዎꬅድ ታማ ኤꬆ። 8 ካህነት፥ አሮና ናይት ሄ ከስዳ አሹዋ ቦላ ሁጵያነ ሞꬉዋ ጉጅድ፥ ያርሾ በሳን ታማን ደእያ ምꬃ ቦላ ማራይድ ዎꬆ። 9 ሽን ሄ ኡራይ ኡሎ አሹዋነ ገዳታ ሃꬃን ሜጮ። ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።

10 ፁገትያ ያርሾስ እ እምያ እሞይ ዶርሳፈ ዎይኮ ዴሻፐ ግድኮ፥ ቦረይ ባይና ማራዘ ዎይኮ ኮለ ግዶ። 11 ሄ መህያ ያርሾ በሳፈ ፑደሀ ባጋራ ጎዳ ስንꬃን ሹኮ። ካህነት፥ አሮና ናይት ሄ ሱꬃ ኤክድ ያርሾ በሳ ኦይዱ ማዛነታ ኡባ ቦላ ዉርፆ። 12 ሄ ኡራይ አሹዋ ቆሞን ቆሞን ከሶ፤ ካህነይ ሄ ከስዳ አሹዋ ቦላ ሁጵያነ ሞꬉዋ ጉጅድ፥ ያርሾ በሳን ታማን ደእያ ምꬃ ቦላ ማራይድ ዎꬆ። 13 ሽን ሄ ኡራይ ኡሎ አሹዋነ ገዳታ ሃꬃን ሜጮ፤ ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።

14 ጎዳስ ያርሸትያ ፁሳ ያርሾይ ካፎ ግድኮ ሆለ ዎይኮ ኩራቾ ግዶ። 15 ካህነይ ሄሳ ኤክድ ቆꬍያ ኩሸራ ዱꬆ፤ ሁጵያ ያርሾ በሳ ቦላ ደእያ ታማን ፁጎ። እያ ሱꬃይ ያርሾ በሳ ምየራ ጉኮ። 16 ኡሎ አሹዋነ ቀፍያ ከስድ፥ ያርሾ በሳፈ ዶሎሀ ባጋራ ብዶ ቆልያ በሳን የጎ። 17 እ ሄ ካፉዋ ቀፈታ ኦይክድ ሻኮ፥ ሽን ኩመꬅ ሻኮፎ። ካህነይ ያርሾ በሳ ቦላ ደእያ ታማን ዎꬅድ ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።