1 ኦንካ ካꬃ ያርሾ ጎዳስ ያርሽያ ዎደ ሄ ያርሾይ ሎኦ ꬊለ ግዶ፤ እያ ቦላ ዛይተነ እፃነ ጉጆ። 2 ሄሳ ካህነ ግድዳ አሮና ናይታኮ ኤሆ፤ ካህነት ሄ ሎኦ ꬊልያፈ እስ ኩጫ ኤክድ፥ ዛይተነ እፃነ ኡባ ጉጅድ ያርሾ በሳ ቦላ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና። 3 ካꬃ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።

4 ያርሸትያ ኡይꬃይ ጮጨን ኮምፐትዳ ግድኮ፥ ዛይተራ ሙኑቀትዳ ሎኦ ꬊለ ግዶ። ሄ ኡይꬃይ እርሾይ ባይና ዛይተን ሙኑቀትዳይሳ ዎይኮ ሌኦን ኡከትድ ዛይተን ትየትዳይሳ ግዶ። 5 ያርሸትያ ኡይꬃይ በሸን ኡከትዳባ ግድኮ፥ እርሾይ ባይና ዛይተን ሙኑቀትዳ ሎኦ ꬊለ ግዶ። 6 እያ መንꬃዳ እያ ቦላ ዛይተ ትጋዳ ካꬃ ያርሾ ኦꬃዳ ያርሻ። 7 ነ ያርሽያ ካꬃይ ኦቶን ካፅዳባ ግድኮ ዛይተን ሙኑቀትዳ ሎኦ ꬊለ ግዶ። 8 ሄሳዳ ሀንድ ጊግዳ ካꬃ ያርሹዋ ጎዳስ ኤሀዳ ካህንያስ እማ፤ ካህነይ ሄሳ ኤክድ ያርሾ በሳን ያርሾ። 9 ካህነይ ሄ ካꬃ ያርሹዋ ኤክድ፥ ያርሾ በሳን ፁሳ ያርሾ ኦꬅድ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና። 10 ካꬃ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።

11 ኔኒ እርሾ ዎይኮ ኤስ ጎዳስ ታማን ፁጋዳ ያርሻናዉ በሶና ግሾ ጎዳስ ህንተ ኤህያ ካꬃ ያርሾይ እርሾይ ደእያባ ግዶፖ። 12 ሀይሳታ ባይራ ያርሾ ኦꬅድ ጎዳስ ያርሻናዉ ዳንዳኤታ፥ ሽን ሳዎ ቶንኩ ግያ ያርሾ ኦꬅድ ጎዳስ ያርሾ በሳን ፁጎፍተ። 13 ማፅነይ፥ ኔኒ ነ ፆሳራ ጫቅዳ ጫቁዋስ ማላ ግድያ ግሾ ነ ካꬃ ያርሾ ኡባን ማፅነ የጋ። ነ ካꬃ ያርሾ ኡባ ማፅነን ማልኤꬃ። 14 ኔኒ ካꬃፈ ባይራ ጎዳስ ኤህያ ዎደ ጫጨትድ ሽርከትዳ ትያ ግዳናዉ በሴስ። 15 ሄስ ካꬃ ያርሾ ግድያ ግሾ እያ ቦላ ዛይተ ትጋ፤ እፃነ ዎꬃ። 16 ካህነይ ሄ ጫጨትድ ሽርከትዳነ ዛይተይ ትገትዳ ካꬃ ያርሹዋፈ ባጋ ኤክድ እፃነ ኡባራ ቆፍሶ ያርሾ ኦꬅድ ጎዳስ ታማን ፁጎ።