1 እስ አስ እስፈተꬃ ያርሾስ ባ መህያፐ ቦረይ ባይና ኡስ ዎይኮ ዎፋኖ ጎዳ ስን ሺሾ። 2 ያርሻናዉ ኤህዳ መህያ ሁጰን ባ ኩሽያ ዎꬅድ ጌሻ ዱንካንያ ፐንገን ሹኮ። ካህነት፥ አሮና ናይት ሱꬃ ኤክድ ያርሾ በሳ ኦይዱ ማዛንያ ቦላ ዉርፆ። 3 እስፈተꬃ ያርሹዋፈ ፁሳ ያርሾ ኦꬅድ ጎዳስ ሺሾ፤ ሄስካ ኡሎ አሹዋ ካምዳ ሞꬍያ፥ 4 ናምኡ ክላሆታ፥ ኤንታ ቦላ ደእያ ሞꬍያነ ትርያ ፄራ ባጋ ኤኮ። 5 አሮና ናይት ሄሳ ፁሳ ያርሹዋራ እስፈ ያርሾ በሳ ቦላ ደእያ ምꬃ ቦላ ዎꬅድ ፁጎ። ሄስ ጎዳስ ፁገትያ ሳዎ ቶንኩ ግያ ያርሾ ግዳና።

6 እስፈተꬃ ያርሾስ ሺቀይ ማጫ ዎይኮ አደ ዶርሰ ግድኮ ቦረይ ባይናባ ግዶ። 7 እስ አስ ዶርሳ ኡርገ ያርሽያባ ግድኮ ሄሳ ጎዳ ስንꬃን ሺሾ። 8 ሄ ዶርሳ ኡርግያ ሁጰን ባ ኩሽያ ዎꬅድ ጌሻ ዱንካንያ ፐንገን ሹኮ። አሮና ናይት ሱꬃ ኤክድ ያርሾ በሳ ኦይዱ ማዛንያ ቦላ ዉርፆ። 9 እስፈተꬃ ያርሹዋፈ ጎዳስ ፁሳ ያርሾ ኦꬅድ ያርሾ፤ ሄስካ ሞꬉዋ፥ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ኡሎ አሹዋ ካምዳ ሞꬍያ፥ 10 ናምኡ ክላሆታ፥ ኤንታ ካምዳ ሞꬍያ ትርያ ፄራ ባጋ ኤኮ። 11 ካህነይ ሄሳ ጎዳስ ፁሳ ያርሾ ኦꬅድ ያርሾ በሳን ፁጎ።

12 እ ያርሸይ ዴሸ ግድኮ እ ሄሳ ጎዳ ስን ሺሾ። 13 እያ ሁጰን ባ ኩሽያ ዎꬅድ ጌሻ ዱንካንያ ስንꬃን ሹኮ። አሮና ናይት ሱꬃ ኤክድ ያርሾ በሳ ዩሹዋ ዉርፆ። 14 እ ሄ ያርሹዋፈ ኤክድ ጎዳስ ፁሳ ያርሾ ኦꬅድ ያርሾ፤ ሄስካ ኡሎ አሹዋ ካምዳ ሞꬍያ ኡባ፥ 15 ናምኡ ክላሆታ፥ ኤንታ ካምዳ ሞꬍያ ትርያ ፄራ ባጋ ኤኮ። 16 ካህነይ ሄሳ ጎዳስ ሳዎ ቶንኩ ግያ ያርሾ ኦꬅድ ያርሾ በሳን ፁጎ። ሞꬎ ኡባይ ጎዳባ።

17 ህንተ ሞꬎነ ሱꬅ ሞፕተ። ሄስ ህንተስነ ያና የለተꬃይ ደእያ በሳ አዉንካ ናግያ ዎጋ ግዶ።