1 ጎዳይ ሙሰኮ ሀይሳዳ ያግስ፤ 2 ኔኒ እስራኤለ አሳስ ሀይሳዳ ያጋዳ ኦዳ፤ ኦንካ ቆፖና ናጋራ ኦꬅኮ ዎይኮ ጎዳ ኪታታፐ እሱዋ መንꬅኮ፥ 3 ዶረትዳ ካህነይ ናጋራ ኦꬅድ አሳ ጎመን ጋꬅኮ፥ እ ባ ኦꬅዳ ናጋራ ግሾ ቦረይ ባይና ዎፋኖ ጎዳስ ናጋራ ያርሾ ኦꬅድ ኤሆ። 4 ሄ ዎፋኑዋ ጌሻ ዱንካንያ ፐንገ ኤህድ፥ ሁጰን ባ ኩሽያ ዎꬅድ ጎዳ ስንꬃን ሹኮ። 5 ዶረትዳ ካህነይ ዎፋኑዋ ሱꬃፈ ጉꬃራ ኤክድ ጌሻ ዱንካንያ ገልስድ፥ 6 ባ ብራꬍያ ሱꬃን የድ ኤክድ ጌሻ ዱንካንያ ማጋራጁዋ ስንꬃን ጎዳ ስንꬃን ላፑን ቶሆ ዉርፆ። 7 ካህነይ ጉꬃ ሱꬅ ኤክድ ጌሻ ዱንካንያን ጎዳ ስንꬃን ሳውያ እፃነ ጩይስያ በሳን ደእያ ካጨታ ትዮ። አትዳ ሱꬃ ጌሻ ዱንካንያ ገልያ ፐንገ ባጋራ ደእያ ፁሳ ያርሾ በሳ ጋርሳን ጉሶ። 8 ናጋራ ያርሾስ ሹከትዳ ዎፋኑዋ ሞꬉዋ ኡባ፥ ኡሎ አሹዋ ማእዳ ሞꬉዋ፥ 9 ናምኡ ክላሆታ፥ ኤንታ ካምዳ ሞꬍያነ ትርያ ፄራ ባጋ ኤኮ። 10 እስፈተꬃ ያርሾስ ሹከትዳ ዎፋኑዋ ሞꬉዋ ከስዳይሳዳ እያፐ ሞꬉዋ ከሶ። ካህነይ ፁሳ ያርሾ ኦꬅድ ያርሾ በሳን ፁጎ። 11 ሽን ዎፋኑዋ ጋልባ፥ እያ አሹዋ ኡባ፥ እያ ሁጵያ፥ እያ ቶሆታ፥ ኡሎ አሹዋ፥ ቶጭያ፥ 12 አሹዋፐ አትዳይሳ ኡባ ጉታፐ ካረ ከስድ ብዶ የግያ ዎጋ መላ ጌሻ በሲ ኤፍድ ያን ታማን ፁጎ።

13 እስራኤለ ማባራ ኡባይ ቆፖና ናጋራ ኦꬅኮነ ጎዳ ኪታታፐ እሱዋ መንꬅኮ ሄስ ኤንታፈ ቆሰትኮካ ኤንታዉ ባላ ግድድ ታይበታና። 14 ኤንቲ ኦꬅዳ ናጋራ አኬክያ ዎደ ናጋራ ያርሾስ ሀንያ ዎፋኖ ጌሻ ዱንካንያ ስን ኤሆ። 15 ማባራ ጭማት ባንታ ኩሽያ ዎፋኑዋ ሁጰን ዎꬅድ ጎዳ ስንꬃን ሹኮ። 16 ዶረትዳ ካህነይ ዎፋኑዋ ሱꬃፈ ጉꬃራ ኤክድ ጌሻ ዱንካንያ ግዶ ገሎ። 17 እ ባ ብራꬍያ ሱꬃን የድ ኤክድ ማጋራጁዋ ስንꬃ ባጋራ ጎዳ ስንꬃን ላፑን ቶሆ ዉርፆ። 18 ቃስ ጉꬃ ሱꬅ ኤክድ፥ ጌሻ ዱንካንያ ግዶን ጎዳ ስንꬃን እፃነ ጩይስያ በሳን ደእያ ካጨታ ቦላ ትዮ። አትዳ ሱꬃ ጌሻ ዱንካንያ ገልያ ፐንግያ ባጋራ ደእያ ፁሳ ያርሾ በሳ ጋርሳን ጉሶ። 19 ሞꬎ ኡባ ኤክድ ያርሾ በሳን ፁጎ። 20 ሀ ዎፋኑዋካ ናጋራ ያርሾስ ሹከትዳ ዎፋኑዋ መላ ኦꬃዳ ሺሻ። ሄሳዳ ኦꬅድ፥ ካህነይ ናጋራ አቶተꬃ ዎጋ ፖላና፤ አሳ ናጋራይ አቶ ጌተታና። 21 ካህነይ ዎፋኑዋ ጉታፐ ካረ ከስድ፥ ኮይሮ ዎፋኖይ ፁገትዳይሳዳ እያካ ፁጎ፤ ሄስ ማባራስ ያርሸትያ ናጋራ ያርሾ።

22 አሳ ካለꬅያ ሹማታፐ እሶይ ቆፖና ናጋራ ኦꬅኮነ ጎዳ ፆሳ ኪታፐ እሱዋ መንꬅኮ ሄ ኡራይ ባላ። 23 እ ባ ኦꬅዳ ናጋራ አኬክዳፐ ጉየ፥ ቦረይ ባይና እስ ኮለ ኤሆ። 24 ሄ ኮልያ ሁጰን ባ ኩሽያ ዎꬅድ ፁሳ ያርሾይ ያርሸትያ በሳን ጎዳ ስንꬃን ሹኮ፤ ሄስ ናጋራ ያርሾ። 25 ካህነይ ባ ብራꬍያ ሱꬃን የድ ኤክድ፥ ፁሳ ያርሾ በሳን ደእያ ካጨታ ቦላ ትዮ፤ አትዳ ሱꬃ ቃስ ፁሳ ያርሾ በሳ ጋርሳን ጉሶ። 26 እስፈተꬃ ያርሾስ ሺቅዳ ሞꬉዋ ኡባ ፁግዳይሳዳ ሀ ኮልያ ሞꬉዋ ፁጎ። ሄሳዳ ኦꬅድ፥ ካህነይ ሄ ኡራ ናጋራ ቁሽሴስ፤ ሄ ኡራ ናጋራይ አቶ ጌተታና።

27 ማባራፐ እስ አስ ቆፖና ናጋራ ኦꬅኮነ ጎዳ ኪታፐ እሱዋ መንꬅኮ ሄ ኡራይ ባላ ግዴስ። 28 እ ባ ኦꬅዳ ናጋራ አኬክዳፐ ጉየ ቦረይ ባይና ማጫ ዴሽ ባ ናጋራ ግሾ ኤሆ። 29 ባ ኩሽያ ሄ ዴሸ ሁጰን ዎꬆ፤ ያትድ ፁሳ ያርሾ በሳን ናጋራ ያርሾ ኦꬅድ ሹኮ። 30 ሄሳፈ ጉየ፥ ካህነይ ሄ ዴሸ ሱꬃን ባ ብራꬍያ የድ ኤክድ ፁሳ ያርሾ በሳን ደእያ ካጨታ ቦላ ትዮ። አትዳ ሱꬃ ኡባ ያርሾ በሳፈ ጋርሳን ጉሶ። 31 እስፈተꬃ ያርሾስ ሹከትዳ መህያፐ ሞꬉዋ ከስዳይሳ መላ ሄ ዴሸ ሞꬉዋ ቃር ከስድ፥ ያርሾ በሳን ጎዳስ ሳዎ ቶንኩ ግያ ያርሾ ኦꬅድ ፁጎ። ሄሳዳ ኦꬅድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።

32 ሄ ኡራይ ባ ናጋራ ግሾ ያርሸይ ዶርሰ ግድኮ፥ ቦረይ ባይና ማጫ ዶርሰ ግዶ። 33 እ ባ ኩሽያ ሄ ዶርሰ ሁጰን ዎꬆ፤ ያትድ፥ ፁሳ ያርሾ መሄ ሹክያ በሳን ሹኮ። 34 ሄሳፈ ጉየ፥ ካህነይ ዶርሰ ሱꬃን ባ ብራꬍያ የድ ኤክድ ፁሳ ያርሾይ ያርሸትያ በሳን ደእያ ካጨታ ቦላ ትዮ። አትዳ ሱꬃ ያርሾ በሳፈ ጋርሳን ጉሶ። 35 እስፈተꬃ ያርሾስ ሹከትዳ መህያፐ ሞꬉዋ ከስዳይሳዳ ሄ ዶርሰ ሞꬉዋ ቆር ከስድ፥ ያርሾ በሳን ጎዳስ ፁሳ ያርሾ ኦꬅድ ፁጎ። ሄሳዳ ኦꬅድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።