1 እስ አስ ባ በእዳባ ዎይኮ ባ ኤርያባ ማርካታና መላ ኦይሸትድ ማርካቶና እፅኮ ሄ ኡራይ ናጋራ ኦꬅዳ ግሾ ሴረቶ።

2 እስ አስ ኤሮና ደእሸ ቱናባ፥ ሄስካ፥ ሀይቅዳ ዶአ ዎይኮ መሄ ዎይኮ ሳአራ ጎሸትያ ዶአታ ቦችኮ፥ ሄስ ቱና ግደይሳ እ ኤሮና እፅኮካ ቱና ግድያ ግሾ ባላ ግዴስ።

3 እስ አስ ኤሮና ደእሸ አሳ አሳተꬃፈ ጎግድ ቱንስያባ ቦችኮ፥ ሄስ ቱና ግደይሳ እ ኤሮና እፅኮ፥ ቱና ግድያ ግሾ ባላ ግዴስ።

4 እስ አስ ኢታባ ግድን ሎኦባ ኦꬃናዉ ኤሶን ጫቅኮነ ባ ጫቅዳይሳ ዶግድ፥ ጉየፐ እ አኬክዳ ዎደፐ ዶምድ ባላ ግዴስ።

5 እስ አስ ሀ ኦደትዳ ባላታፐ እሱዋ ኦꬅዳባ ግድኮ ባ ኦꬅዳ ናጋራ ፓፆ። 6 እ ባ ኦꬅዳ ናጋራ ግሾ ጎዳስ ባ መህያ ግዶፈ ማጫ ዶርሰ ዎይኮ ማጫ ዴሸ ናጋራ ያርሾ ኦꬅድ ሺሾ። ካህነይ ኤክድ ሄ ኡራ ናጋራ ቁሸꬃስ ያርሻና።

7 እስ አስ ባ ኦꬅዳ ናጋራ ግሾ ያርሻናዉ ዶርሰ ዎይኮ ዴሸ ሻማናዉ እያዉ ጋተይ ጋኮና እፅኮ ናምኡ ኩራቾታ ዎይኮ ናምኡ ሆለታ፥ እሱዋ ናጋራ ያርሾስ ቃስ እሱዋ ፁሳ ያርሾስ ኦꬅድ ጎዳስ ኤሆ። 8 እ ኤንታ ካህንያስ እሞ፤ ካህነይ ናምኡ ሆለታፐ እሱዋ ቆꬍያ ምርቅድ ዱꬆናሽን፥ ናጋራ ያርሾ ኦꬅድ ሺሾ። 9 ያትድ ሱꬃፈ ጉꬃራ ኤክድ፥ ያርሾ በሳ ማታን ዉርፆ፤ አትዳ ሱꬃ ያርሾ በሳ ጋርሳን ጉሶ፤ ሄስ ናጋራ ያርሾ። 10 ሀንኮ ሆልያ ቃስ ህገይ ኪተይሳዳ ፁሳ ያርሾ ኦꬅድ ፁጎ። ካህነይ ሀይሳዳ ኦꬅድ፥ ኡራይ ኦꬅዳ ናጋራ ቁሽሳናዉ ያርሾ ያርሼስ፤ ሄ ኡራ ናጋራይ አቶ ጌተታና።

11 ሽን እስ አስ ናምኡ ሆለ ዎይኮ ናምኡ ኩራቾ ኤሀናዉ ጋተይ ጋኮና እፅኮ፥ እስ ክሎ ግራመ ሎኦ ꬊለ ባ ናጋራ ግሾ ያርሾ ኦꬅድ ኤሆ። ሄ ꬊለይ ናጋራ ያርሾ ግድያ ግሾ ዛይተይ ዎይኮ እፃነይ እያ ቦላ ጉዠቶፎ። 12 እ ሄሳ ኤህድ ካህንያስ እሞ፤ ካህነይ ሄ ꬊልያፈ እስ ኩጫ ኤክድ፥ ጎዳስ ሺቅያ ካꬃ ያርሹዋራ ጋꬅድ፥ ቆፍሶ ኦꬅድ ያርሾ በሳን ፁጎ፤ ሄስ ናጋራ ያርሾ። 13 እስ አስ ሀ ናጋራታፐ እሱዋ ኦꬅኮ ሀይሳዳ ኦꬅድ እያ ናጋራ ቁሽሴስ፤ ሄ ኡራ ናጋራይ አቶ ጌተታና። ሄ ያርሹዋፈ አትዳይስ ካꬃ ያርሹዋዳ ካህንያስ ግዶ።

14 ጎዳይ ሙሰኮ ሀይሳዳ ያግስ፤ 15 ኦንካ ጎዳ ናቅኮነ ጌሻ ሚሸታ ቱንስድ ቆፖና ናጋራ ኦꬅኮ ባ ናቁዋስ ባ መህያ ግዶፈ ቦረይ ባይና እስ ማራዘ ጎዳስ ኤሆ። እያ ጋተይ ጌሻ ዱንካነን ኤረትዳ ምዛነ ግናን ጭገቶ፤ ሄስ ናቆ ያርሾ። 16 እ ጌሻ ሚሸታ ቦላ ናጋራ ኦꬅዳ ግሾ ኮይሮ ጭጋናዉ በሲያ ጋትያ ቦላ ፄታፐ ላታሙ ኩሸ ጉጅድ ካህንያስ እሞ። ካህነይ ሄሳ ማራዝያራ ጋꬅ ያርሽድ ኡራ ናቁዋ ቁሽሴስ፤ እያ ናጋራይ አቶ ጌተቴስ።

17 እስ አስ ቆፖናሽን፥ ጎዳ ኪታታፐ እሱዋ መንꬅድ ናጋራ ኦꬅኮ እ ሄሳ ኤሮና እፅኮካ ባላ ግድያ ግሾ ባ ናጋራን ሴረቶ። 18 እ ባ መህያፐ ቦረይ ባይናነ ጋተ ኩንꬅያ እስ ማራዘ ናቆ ያርሾስ ካህንያኮ ኤሆ። ካህነይ ሄ ማራዝያ ያርሽድ ኡራ ናቁዋ ቁሽሴስ፤ እያ ናቆይ አቶ ጌተቴስ። 19 እ ቱማፐ ጎዳ ናቅዳ ግሾ ሄስ ናቆ ያርሾ።