1 “ነኖ፥ አሳ ናአዉ፥ ኦጮ ማሽ ኤካዳ፥ ማቅላራ ሜድያዳ ነ ሁጵያነ ነ ቡቻ ሜዳ። ሄ ሁጵያ ምዛነን ማዛና፤ ነ ብናና ሄꬑ በሳን ሻካ። 2 ኔኒ ተቅያ ጋላሳይ ዉርያ ዎደ፥ ነ ሻክዳ ብናናፐ ስኩዋ ነ ጊግስዳ ካታማ ምስልያስ ግዱን ዎꬃዳ ታማን ፁጋ። ናምአንꬆ ስኩዋ ሄ ካታማ ዩሹዋ ኡባን ማሻን ቃንፀረꬃ። ሄꬓንꬆ ስኩዋ ጫርኮ ቦላ ላላ፤ ታ ኤንታ ማሻን የደꬃና። 3 እያፐ ጉꬃ ብናና ኤካዳ፥ ነ ማኡዋ ማጫራን ቃቻ። 4 ቃስ እያፐ ጉꬃራ ኤካዳ፥ ታማን የጋዳ ፁጋ። ያን ዶምዳ ታማይ እስራኤለ አሳ ኡባ ጋካና” ያግስ።

5 ኡባ ሃርያ ጎዳይ፥ “ካዎተꬃታ ኡባ እያ ዩሾን ኤሳዳ፥ እያ ግዶን ዎꬅዳ፥ የሩሳላመ ካታማ ሀይሳ በአ። 6 ሽን እ ባ ኢታ ኦሱዋን ባ ዩሹዋን ደእያ ቢታታፐነ ካዎተꬃታፐ አꬍድ ታ ህግያነ ታ ዎጋ ቦላ ማካልስ። ቱማ እ ታ ህግያ መንꬅስ፤ ታ ዎጋ ካልቤና” ያጌስ።

7 ሄሳ ግሾ፥ ኡባ ሃርያ ጎዳይ፥ “ነ ዩሹዋን ደእያ ካዎተꬃታፐ አꬋዳ መቶ መꬋዳሳ፤ ታ ህግያ መንꬃዳሳ፤ ታ ዎጋ ናጎና እፃዳሳ። ሀር አቶሽን፥ ነ ዩሹዋን ደእያ ካዎተꬃታ ዎጋዳካ ደእቤከታ” ያጌስ። 8 ሄሳ ጋሶን፥ ኡባ ሃርያ ጎዳይ፥ “ነኖ፥ የሩሳላመ፥ ታኒ ነ ቦላ ደንዳና፤ ሀራ ካዎተꬃት ኡባይ በእሽን፥ ነ ቦላ ታኒ ፕርዳ ኤሀና። 9 እፀትዳ ኤቃ ጎይኖ ኡባ ነ ኦꬅዳ ግሾ፥ ሀይሳፈ ካሰ ኦꬃቦና፥ ስንꬃፈካ ዮና ፕርዳ ታ ነ ቦላ ኤሀና። 10 ሄሳ ጋሶን፥ ነ ግዶን አዋት ባንታ ናይታ ማና፤ ናይት ባንታ አዋታ ማና። ታ ህንተና ፕርዳና፤ አትዳይሳታ ጫርኮ ቦላ ላላና። 11 ሄሳ ግሾ፥ ኡባ ሃርያ ጎዳይ፥ ታኒ ታ ደኡዋን ጫቃይስ። ህንተ ኤቃታንነ እፀትዳ ኦሶታን ታ ኬꬃ ቱንስዳ ግሾ፥ ታ ህንተና ቢታፈ ፕታዳ ꬋይሳና። ታ ህንተዉ ቃትከ፤ ህንተና ማርከ። 12 ነ ግዶን ደእያ አሳፐ እስ ስኮይ ካታማ ግዶን ቦሻንነ ኮሻን ሀይቃና፤ ናምአንꬆ ስኮይ ማሻን ዉራና፤ ሄꬓንꬆ ስኩዋ ጫርኮ ቦላ ላላዳ፥ ኤንታ ማሻን የደꬃና” ያጌስ።

13 “ታ ይሎይ ኤንታ ቦላ ፖለታና፤ ታ ዎልቃማ ሀንቆይ እርፃና። ታኒ ታ ሀንቁዋ ኤንታ ቦላ ዉርስያ ዎደ ታኒ ቃናተን ኦድዳይሳ ኤንቲ ኤራና።

14 “ነ ዩሹዋን ደእያ ካዎተꬃታ ግዶንነ ህንተ ማታራ አꬍያ ኡባ ስንꬃን ታ ህንተና ባይሳ ኦꬃና፤ ህንተና ሚቻስ አጋና። 15 ታ ህንተና ታ ሀንቁዋን፥ ታ ይሉዋንነ፥ ቃይ ባይና ሴራን ፕርድያ ዎደ ህንተ ዩሹዋን ደእያ ካዎተꬃታ ስንꬃን ቀልቅሰꬃስ፥ ጫሻስ፥ ህንተና በእዳ አስ ናገትያባነ ዳጋምያባ ኦꬃና። 16 ዱክያ ዶንጌ ቶራዳ፥ ታ ህንተና ዎꬍያነ ꬋይስያ ኮሻ ህንተ ቦላ የዳና። ታኒ ዛራ ዛራ ኮሻ ህንተ ቦላ ኤሀና፤ ካꬅ የሩሳላመ ገሎና መላ ተቃና። 17 ታኒ ኮሻነ ዶአ ህንተ ቦላ የዳና፤ ኤንቲ ህንተ ናይታ ꬋይሳና፤ ቦሻነ ሸምፖ ዎꬎ ህንተ ቦላ ኤሀና” ያጌስ ጎዳይ።