1 ጎዳ ቃላይ ታኮ ሀይሳዳ ያግሸ ይስ። 2 “ነኖ፥ አሳ ናአዉ፥ እስራኤለ ዙማታ ደሬቃ ፄላሸ፥ ኤንታ ቦላ ትንብተ ኦዳ። 3 ህንተኖ፥ እስራኤለ ደረቶ፥ ኡባ ሃርያ ጎዳ ቃላ ስእተ። ኡባ ሃርያ ጎዳይ እስራኤለ ዙማታኮ፥ ዞዘታኮ፥ ዛንጋራታኮነ ካካታኮ ሀይሳዳ ያጌስ፦ ‘አሳይ ኤቃ ጎይንያ በሳታ ታኒ ꬋይሳናዉ ማሻ የዳና። 4 ህንተ ያርሾ ፃርጴዛቲ ላለታና፤ ህንተ እፃነ ጩይስያ ሚሸት መቃና፤ ሀይቅዳ ህንተ አሳይ ህንተ ኤቃታ ስንꬃን የገታና። 5 ታኒ እስራኤለ አሳ አሀ ኤንታ ኤቃታ ስንꬃን ዝንእሳና፤ ህንተ መቀꬃታ ህንተ ያርሾ ፃርጴዛታ ዩሾን ላላና። 6 ህንተ ደእያ በሳ ኡባን፥ ህንተ ካታማትነ ህንተ ጎይኖ በሳት ላለታና። ሄሳዳካ፥ ህንተ ያርሾ በሳይ ቱናናነ ላለታና፤ ህንተ ኤቃት መቃና፤ ህንተ እፃነ ጩይስያ ሚሸት መቃና፤ ህንተ ኦꬅዳባ ኡባይ ፕተትድ ꬋያና። 7 ሀይቅዳ አሳይ ህንተ ግዶን ኩንዳና። ታኒ ጎዳ ግደይሳ ህንተ ሄሳን ኤራና። 8 ታኒ ህንተ ግዶን ማሻፈ አትዳ ጉꬃታ ፓፃ አሻና፤ ህንተ ቢታታንነ ካዎተꬃታ ግዶን ላለታና። 9 ማሻፈ አትዳ ኤንቲ፥ ድኤትድ ብዳ ካዎተꬃታ ግዶን ደእሸ ታና ሀሳያና። ኤንቲ ባንታ ላይማ ዎዛናንነ አሞትያ አይፍያን ኤቃ ጎይናናዉ ስሚድ ታ ዎዛና መንꬅዳይሳ ኤንቲ አኬካና። ኤንቲ ባንታ ኢታ ኦሱንነ እፀትዳ ኤቃ ጎይኖ ጋሶን ባንታና ሻተታና። 10 ታኒ ጎዳ ግደይሳ ኤንቲ ኤራና። ታኒ ኤንታ ቦላ ኢታባ ኤሀና ግዳይ ጮ ባብሶ ግዶናይሳ ኤንቲ አኬካና’ ” ያጌስ።

11 ኡባ ሃርያ ጎዳይ ታኮ ሀይሳዳ ያጌስ፦ “እስራኤለ አሳይ እፀትዳ ኤቃ ጎይንዳ ግሾ፥ ነ ሀንቁዋ ብራ ማላዳ በሳ፤ ነ ይሉዋ ቢታ ቃካዳ ቆንጭሳ። ኤንታና አየ! ኤንቲ ኦላን፥ ኮሻንነ ጋዶን ዉራና። 12 ሃሆን ደኤይ ጋዶን ꬋያና፤ ማታን ደኤይ ኦላን ሀይቃና፤ ፓፃ አትዳይ፥ ኮሻን ዉራና። ሄሳዳ ኦꬃዳ፥ ታ ሀንቁዋ ኤንታ ቦላ ፖላና። 13 ኤንታ አሀይ ኤንታ ኤቃታ ግዶ ኡባን፥ ኤንታ ያርሾ በሳ ዩሾ ኡባን፥ ዙማታ ቦላ ኡባን፥ ደረ ቦላ ኡባን፥ ጭልኦ ምꬃ ጋርሳ ኡባን፥ ዳሻ ምꬃ ጋርሳ ኡባን፥ ባንታ ኤቃታስ ሳውያ ያርሾ ያርሽዳ በሳ ኡባን ኩንድዳ ዎደ ታኒ ጎዳ ግደይሳ ኤራና። 14 ታኒ ታ ኩሽያ የዳዳ፥ ኤንቲ ደእያ ቢታ ኡባ፥ ዱገሀ መላ ቢታፈ ብድ ፑደሀን ደእያ ደብላታ ጋካናዉ ባይሳ ኦꬃና። ታኒ ጎዳ ግደይሳ ኤንቲ ሄሳን ኤራና” ያጌስ።