1 ኑኒ ድኤትዳ ኡሱፑንꬆ ላይꬃን፥ ኡሱፑንꬆ አጌናን፥ እቻሻንꬆ ጋላሳን፥ ታኒ ታ ሶን ኡትዳሽን፥ ይሁዳ ጭማትካ ታ ስንꬃን ኡትዳሽን፥ ኡባ ሃርያ ጎዳ ዎልቃይ ታና ሃርስ። 2 ሄኮ፥ ታኒ ꬎቁ ጋዳ ፄልያ ዎደ አሰ ዳነይሳ በአስ። እያዉ ፄሰ ዳነይሳፈ ጋርሳ ባጋይ ታማ ላጮ ዳኔስ፤ ቦላ ባጋይ ጶልያ ናሰ ብራታ ዳኔስ። 3 እ ኩሸ ዳንያባ ታኮ የድድ፥ ታ ብናና ኦይክስ። አያናይ ታና ሳአፐነ ሳሎፐ ግዶ ፑደ ደንꬅድ፥ ፆሳ ቆንጨꬃን ታና የሩሳላመ ኤፍስ። ያን ቆሞ ባጋራ ፆሳ ኬꬃ ግዶ ዳባባ ገልያ ፐንግያራ ገልስድ፥ ጎዳ ቃናትያ ደንꬅያ ኤቃይ ኤቅዳ በሳ በስስ። 4 ሄኮ፥ ካሰ ታኒ ዛንጋራን በእዳይሳዳ፥ እስራኤለ ፆሳ ቦንቹዋ ያን በአስ።

5 ጎዳይ ታኮ፥ “ነኖ አሳ ናአዉ፥ ፑደሀ ባጋ ፄላ” ያግስ። ታኒ ፄልያ ዎደ ቃናተ ደንꬅያ ኤቃይ፥ ድርሳ ፐንግያ ስንꬃን ደእያ ያርሾ በሳ ማታን ደኤይሳ በአስ። 6 እ ታኮ፥ “ነኖ፥ አሳ ናአዉ፥ ኤንቲ ኦꬅያባ በአይ? ታና ታ ጌሻ ኬꬃፈ ሃሳናዉ፥ እስራኤለ አሳይ ኦꬅያ እፀትዳ ኤቃ ጎይኑዋ በአይ? ሀይሳፈ አꬍያ እፀትዳ ኤቃ ጎይኖ ኔኒ ቡሮ በአና” ያግስ።

7 እ ታና ፆሳ ኬꬃ ዳባባ ፐንገ ኤህን፥ ታኒ ፄልያ ዎደ፥ ሄኮ፥ ጎዳ ቦላ ፆኤ በአስ። 8 እ ታኮ፥ “ነኖ፥ አሳ ናአዉ፥ ጎዳ ቦካ” ያግን፥ ታ ቦክያ ዎደ እስ ፐንገ ያን በአስ። 9 እ ታኮ፥ “ገላዳ ኤንቲ ያን ኦꬅያ ኢታ ኦሱዋነ እፀትዳ ኤቃ በአ” ያግስ። 10 ታ ግዶ ገላዳ ፄልያ ዎደ፥ ሄኮ፥ ሳአራ ጎሸትያ ዱማ ዱማ መተꬃታ ምስለይ፥ ቱና ዶአታ ምስለይነ እስራኤለ አሳ ኤቃታ ኡባ ምስለይ ጎዳ ቦላ ዩይ አꬍድ መት ኡትዳይሳ በአስ። 11 ኤንታፈ ስንꬃ ባጋራ እስራኤለ አሳፐ ላፑን ታሙ ጭማት ኤቅዶሶና፤ ሳፋና ናኣ ያእዛን ኤንታ ግዶን ኤቅስ። ኡባይ እፃነ ጩይስያባ ባንታ ኩሸን ኦይክዶሶና፤ እፃንያ ጩያይ ቱቁ ጌስ።

12 ጎዳይ ታኮ፥ “ነኖ፥ አሳ ናአዉ፥ እስራኤለ አሳ ጭማት ኡባይ ꬉማን ባንታ ኤቃ ምስልያ ኬꬃን ኦꬅያባ በአይ? ኤንቲ፥ ጎዳይ ኑና በኤና፤ ጎዳይ ሀ ቢታ አግስ” ያጎሶና። 13 እ ታኮ፥ “ሀይሳፈ አꬍያ እፀትዳ ኤቃ ጎይኖ ኔኒ ቡሮ በአና” ያግስ።

14 ሄሳፈ ጉየ፥ ፑደሀ ባጋን ደእያ ፆሳ ኬꬃ ፐንግያኮ ኤፍን፥ ሄኮ፥ ማጫሳይ ያን ኡትድ፥ ታሙዛ ጌተትያ ባንታ ፆሳስ ዬክሽን በአስ። 15 እ ታኮ፥ “ነኖ አሳ ናአዉ፥ ሀይሳ በአይ? ሀይሳፈ አꬍያ እፀትዳ ኤቃ ጎይኖ ኔኒ ቡሮ በአና” ያግስ።

16 ሄሳፈ ጉየ፥ እ ታና ፆሳ ኬꬃ ግዶ ዳባባ ኤፍስ፤ ያን ፆሳ ኬꬃ ፐንግያ ማታን፥ ባራንዳፈነ ያርሾ በሳፈ ግዶን፥ ላታማነ እቻሹ ግድያ አሳታ በአስ። ኤንቲ ባንታ ዞኩዋ ፆሳ ኬꬃኮ፥ ባንታ ሶምኡዋ ዶሎሀኮ ዛሪድ፥ ዶሎሀራ ከይያ አዋ ጎይኖሶና።

17 ጎዳይ ታኮ፥ “ነኖ አሳ ናአዉ፥ ሀይሳ በአዲ? ይሁዳ አሳይ ሀ እፀትዳ ኤቃ ጎይኖይ ሀይሳን ኦይስ ኤንታዉ ላፋባ ግድዴ? ኤንቲ ቢታ ጌላ ኦሶን ኩንꬅድ፥ ዛሪ ዛሪድ ታና ሀንቀꬃናዉ በሲ? ኤንቲ ባንታዉ ዳንዳኤትዳ መላ ታና ኢስድ ጫዮሶና። 18 ሄሳ ግሾ፥ ታ ኤንታራ ሀንቆን ጋሄታና፤ ታ ኤንታዉ ቃትከ፤ ኤንታፈ እሱዋካ አሽከ። ኤንቲ ባንታ ቃላ ꬎቃ ኦꬅድ ዋስንካ፥ ታ ኤንታ ስእከ” ያግስ።