1 ሄሳፈ ጉየ፥ “ካታማ ሴራናዉ ዶረትዳ አሳት፥ ኦላ ሚሸ ባንታ ኩሸን ኦይክድ ሃ ዮሶና” ያግድ ዋስሽን ታኒ ስአስ። 2 ሄኮ፥ ዎꬍያ ኦላ ሚሸ ባንታ ኩሸን ኦይክዳ ኡሱፑን አሳት፥ ፑደሀ ባጋን ደእያ ቆሞ ፐንግያፈ ይዶሶና። ኤንታራ እስፈ ሊኖፐ ኦሰትዳ ማኦ ማእድ፥ ባ ምየን ፃፍያባ ኮሮጆን ኦይክዳ እስ አስ ደኤስ። ኤንቲ ግዶ ገልድ፥ ናሰ ብራታፐ ኦሰትዳ ያርሾ በሳ ማታን ኤቅዶሶና።

3 እስራኤለ ፆሳ ቦንቾይ ባ ደእያ ክሩበታፐ ደንድድ፥ ፆሳ ኬꬃ ፐንገ ብስ። ጎዳይ ሊኖ ማእድ፥ ባ ምየን ፃፍያባ ኮሮጆን ኦይክዳ አድያ ፄግድ፥ 4 “የሩሳላመ ካታማ ግዶ ካንꬃዳ ባሸ፥ ያን ኦሰትያ እፀትዳ ኤቃ ጎይኑዋ ግሾ አዛንሸነ ኦልሸ ደእያ አሳ ሶምኦን ማላ ዎꬃ” ያግስ።

5 ታ ስእሽን፥ ፆሳይ ሀራታኮ ሀይሳዳ ያግስ፦ “እያ ጌዶ ካልድ፥ ካታማ ግዶ ካንꬅድ ዎꬍተ። እሱዋካ ማሮፕተ፤ ኦደስካ ቃቶፍተ። 6 ጭማታ፥ ፓንꬃታ፥ ጌላኦታ፥ ማጫሳታነ ናይታ ኡባ ሹክተ፤ ሽን ሶምኦን ማል ደእያ አሰ ኦናካ ቦቾፍተ። ታ ኬꬃን ዎꬎ ዶምተ” ያግስ። ኤንቲ ፆሳ ኬꬃ ስንꬃን ኤቅዳ ጭማታን ዎꬎ ዶምዶሶና። 7 ፆሳይ፥ “ብድ ፆሳ ኬꬃ ቱንስተ፤ ዳባባታ አሀን ኩንꬅተ” ያግስ። ኤንቲ ከይድ፥ ካታማ ግዶ ኡባን ዎꬎ ዶምዶሶና።

8 ኤንቲ ዎꬍሽን፥ ታኒ ታርካ አታዳ፥ ታ ሶምኡዋራ ቢታን ጉፋናዳ፥ ታ ቃላ ꬎቁ ኦꬃዳ፥ “አቤት ኡባ ሃርያ ጎዳዉ፥ ኔኒ የሩሳላመ ቦላ ጉስያ ነ ሀንቁዋን እስራኤለፐ አትዳይሳታ ኩመꬅ ꬋይሳኔ?” ያጋስ።

9 እ ዛሪድ፥ “እስራኤለነ ይሁዳ አሳ ናጋራይ ዳሮ፤ ቢታ ኡባይ ሱꬃን ኩምስ። ካታማ ኡባን ሱረ ፕርዲ ባዋ። አሳይ፥ ‘ጎዳይ ሀ ቢታ አግስ፤ ጎዳይ በኤና’ ያጎሶና። 10 ሄሳ ግሾ፥ ታ ኤንታዉ ቃትከ፤ ኤንታና ማርከ። ታኒ ኤንታ ኦግያ መላ ኤንታዉ ዛራና” ያግስ።

11 ሄሳፈ ጉየ፥ ሊኖ ማእድ፥ ባ ምየን ፃፍያባ ኮሮጆን ኦይክዳ አደይ፥ ጉየ ስሚድ፥ “ነ ታና ኪትዳይሳዳ ኦꬃስ” ያግስ።