1 ታኒ ክሩበታ ሁጰፐ ቦላ ባጋራ ደእያ ሳሎ ጉፋንꬆ ዳነይሳ በአስ። ክሩቤላ ቦላ ሳንፓረ አልኦ ሹቻፈ ኦሰትዳ አራታ በአስ። 2 ጎዳይ ሊኖ ማእዳ አድያኮ፥ “ክሩቤላፐ ጋርሳ ባጋራ ገርቶታ ግዶራ ካንꬃዳ ባ። ፂፋ ቦንቆ ነ ኩሸን ኮጰታ ኤካዳ፥ ካታማ ቦላ ላላ” ያግስ።

ታ ፄልሽን ታማ ኤካናዉ ገልስ። 3 አደይ ሶ ገልያ ዎደ ክሩቤቲ ፆሳ ኬꬃፈ ጋርሳ ባጋራ ኤቅዶሶና፤ ግዶ ዳባባን ሻር ኩምስ። 4 ጎዳ ቦንቾይ ክሩቤላ ቦላፈ ደንድድ፥ ፆሳ ኬꬃ ፐንገ ብስ። ሻር ኬꬃ ኩምስ፤ ዳባባይ ጎዳ ቦንቾ ጶለꬃን ኩምስ። 5 ክሩቤላ ቀፍያ ግርሳይ ኡባ ሃርያ ጎዳ ግርሳዳ ካረ ዳባባን ስኤቴስ።

6 ጎዳይ ሊኖ ማእዳ አድያ፥ “ክሩቤላ ጋርሳ ባጋን ደእያ ገርቶታ ግዶፈ ታማ ኤካ” ያግድ ኪትን፥ እ ገልድ እስ ገርቱዋ ማታን ኤቅስ። 7 ክሩቤላፐ እሶይ ባንታ ግዶን ደእያ ታማን ባ ኩሽያ የድድ፥ እያፐ ጉꬃራ ኤክድ፥ ሊኖ ማእዳ አድያ ኩሸን ዎꬅን፥ እ ኤክድ ከይስ። 8 ክሩቤላ ቀፍያፐ ጋርሳ ባጋራ አሳ ኩሸ ዳንያባይ ደኤስ።

9 ታ ፄልያ ዎደ ክሩቤላ ማታን ኦይዱ ገርቶይ ደኤስ። እስ እስ ክሩብያ ማታን እስ እስ ገርቶይ ደኤይሳ በአስ፤ ሄ ገርቶይ አልኦ ሹቻዳ ጶሌስ። 10 ኤንቲ ኦይዳይ እሶይ እሱዋ ዳኖሶና፤ እስ እስ ገርቶይ ሀራ ገርቶ ግዶራ ካንꬅ አꬍድ መትዳ ዳኔስ። 11 ክሩቤቲ ብያ ዎደ ኦይዱ ባጋ ያ ሃ ስሞና ቦሶና፤ እስ ገርቶት ብዳ ግንደ ሀንኮ ገርቶይ ያ ሃ ስሞና ስት ግድ ቦሶና። 12 ኤንታ ኩመꬃ ቦላ፥ ሄስካ ኤንታ ዞኩዋን፥ ኤንታ ኩሽያን፥ ኤንታ ቀፍያንነ ኤንታ ኦይዱ ገርቶታን ፄልያ አይፈይ ኩምስ። 13 ታ ስእሽን፥ ገርቶት ዩይያ ገርቶታ ጌተትድ ፄገትዶሶና። 14 እስ እስ ክሩብያስ ኦይዱ ሶምኦይ ደኤስ። ኮይሮ ሶምኦይ ክሩበ ሶምኦ፥ ናምአንꬆይ አሳ ሶምኦ፥ ሄꬓንꬆይ ጋሞ ሶምኦ፤ ኦይዳንꬆይ አርጋንꬃ ሶምኦ።

15 ክሩበት ፑደ ደንድዶሶና። ኤንቲ ታኒ ኮቦራ ሻፋ ማታን በእዳ ደኦን ደእያ መታꬃታ። 16 ክሩበት ብያ ዎደ፥ ኤንታ ምየን ደእያ ገርቶት ቦሶና፤ ክሩበት ቢታፈ ፑደ ደንዳናዉ ባንታ ቀፍያ ምጭያ ዎደ ገርቶት ኤንታ ምየፐ ሻከቶኮና። 17 ደኦን ደእያ መተꬃታ አያናይ ገርቶታ ግዶን ደእያ ግሾ፥ ኤንቲ ኤቅያ ዎደ ገርቶት ኤቆሶና፤ ኤንቲ ቢታፈ ፑደ ደንድያ ዎደ ኤንቲ ደንዶሶና።

18 ሄሳፈ ጉየ፥ ጎዳ ቦንቾይ ፆሳ ኬꬃ ፐንገፈ ደንድድ፥ ክሩበታፐ ቦላ ባጋን ኤቅስ። 19 ታ ፄልሽን፥ ክሩበት ባንታ ቀፍያ ምጭድ፥ ክርክሮታራ እስፈ ቢታፈ ፑደ ደንድዶሶና። ኤንቲ ፆሳ ኬꬃፈ ዶሎሀ ባጋ ፐንግያ ማታን ኤቅዶሶና። እስራኤለ ፆሳ ቦንቾይ ኤንታፈ ቦላ ባጋራ ደኤስ።

20 ኤንቲ ኮቦራ ሻፋን እስራኤለ ፆሳፈ ጋርሳ ባጋራ በእዳ ደኦን ደእያ መታꬃታ። ኤንቲ ክሩበታ ግደይሳ ታ ኤራስ። 21 ኤንታ ኡባስ ኦይዱ ሶምኦትነ፥ ኦይዱ ቀፈት ደኦሶና፤ ኤንታ ቀፈታፐ ጋርሳ ባጋራ አሳ ኩሸ ዳንያባይ ደኤስ። 22 ኤንታ ሶምኦት ኮቦራ ሻፋ ማታን ታ በእዳ ሶምኦታ ዳኖሶና። ኤንቲ ኡባይ ስት ግድ ስን ቦሶና።