1 ፆሳ አያናይ ታና ደንꬅድ፥ ፆሳ ኬꬃስ ዶሎሀ ባጋ ፐንግያኮ ኤፍስ። ፐንግያ ማታን ላታማነ እቻሹ አደት ደኦሶና፤ ኤንታ ግዶን አሳ ካለꬅያ አዙራ ናኣ ያእዛና ባናያ ናኣ ፓላፃ በአስ። 2 ጎዳይ ታኮ፥ “ነኖ አሳ ናአዉ፥ ሀ አሳይ ካታማ ቦላ ኢታ ቆፋ ቆፖሶና፤ ኢታ ዞረ ዞረቶሶና። 3 ኤንቲ፥ ‘ኑኒ ኬ ዛሪድ ኬፃና ዎደይ ማታትስ። ሀ ካታማይ አሾ ፃሮ፤ ኑኒ ቃስ አሾ’ ያጎሶና። 4 ሄሳ ግሾ፥ ትንብተ ኦዳ፤ አሳ ናአዉ፥ ኤንታ ቦላ ትንብተ ኦዳ” ያግስ።

5 ጎዳ አያናይ ታ ቦላ ዎꬍድ፥ ታኮ ሀይሳዳ ያግስ፦ “እስራኤለ አሳዉ፥ ህንተ ሄሳዳ ጌታ፤ ሽን ታ ህንተ አይ ቆፕያኮ ኤራይስ። 6 ሀ ካታማን ህንተ ዳሮ አሳ ዎꬍድ፥ ኦገ ኡባን አሀ ኩንꬅደታ” ያጌስ።

7 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ ዎꬍድ የግዳ አሀይ አሾ፤ ሀ ካታማይ አሾ ፃሮ፤ ሽን ታ ህንተና ሀ ካታማፐ የደꬃዳ ከሳና። 8 ህንተ ኦላስ ያይደታ፤ ሽን ታ ህንተ ያይዳ ኦላ ህንተ ቦላ ኤሀና። 9 ታ ህንተና ሀ ካታማፐ ከሳዳ፥ አላጋታ ኩሸን አꬃዳ እማና፤ ታ ህንተና ህንቴ ዛዋን ፕርዳና። 10 ህንተ ኦላን ዉራና፤ ታ ህንተና ህንተ ቢታን ፕርዳና። ሄ ዎደ ህንተ ታ ጎዳ ግደይሳ ኤራና። 11 ሀ ካታማይ ህንተዉ አሾ ፃሮ ግደና፤ ህንተካ እያ ግዶን አሾ ግደከታ። ታ ህንተ ቦላ እስራኤለ ዛዋን ፕርዳና። 12 ህንተ ታ ህግያነ ታ ዎጋ ሻርድ ህንተ ዩሹዋን ደእያ ካዎተꬃታ ዎጋ መላ ደእዳ ግሾ ህንተ ቦላ ፕርደይ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።

13 ታ ትንብተ ኦድያ ዎደ ባናያ ናኣ ፓላፅ ሀይቅን፥ ታኒ ጉፋናዳ፥ ታ ቃላ ꬎቁ ኦꬃዳ፥ “አቤት ኡባ ሃርያ ጎዳዉ፥ እስራኤለፐ አትዳይሳታ ኩመꬅ ዉርሳና ሀናዬ?” ያጋዳ ዋሳስ።

14 ጎዳ ቃላይ ታኮ ሀይሳዳ ያግድ ይስ፤ 15 “ነኖ አሳ ናአዉ፥ የሩሳላመን ደእያ እስራኤለ አሳይ ነባነ ድኦን ደእያ ነ ዳቦታባ፥ ‘ኤንቲ ጎዳፐ ሃክዶሶና፤ ሀ ቢታይ ኑስ ላታ ግድድ እመትስ’ ” ያግድ ሃሳዮሶና።

16 ኡባ ሃርያ ጎዳይ ሀይሳዳ ያጌስ፦ “ታ ኤንታ ሃሆን ደእያ ካዎተꬃታ ግዶ የድኮካ፥ ቢታ ኡባን ላልኮካ፥ ኤንቲ ብዳ ቢታታን ጉꬃ ዎደስ ኤንታራ ግዳና” ያጌስ።

17 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ህንተና ካዎተꬃታፐነ ህንተ ላለትዳ ቢታታፐ ሺሻና፤ እስራኤለ ቢታ ዛራዳ ህንተዉ እማና። 18 ኤንቲ ጉየ ስሚድ ያ ዎደ ቱና ምስለታነ ኤቃታ ቢታፈ ꬋይሳና። 19 ታኒ ኤንታዉ እስ ዎዛና እማና፤ ኦራꬃ አያና ኤንታ ግዶን ዎꬃና። ኤንታፈ ሹቻ ዎዛና ድጋዳ፥ አሾ ዎዛና ኤንታዉ እማና። 20 ሄ ዎደ ኤንቲ ታ ህግያ ካላና፤ ታ ኪታ ናጋና። ኤንቲ ታ አሰ ግዳና፤ ታኒ ኤንታ ፆሳ ግዳና። 21 ግዶሽን፥ እፀትዳ ምስልያነ ቱና ኤቃ ጎይናናዉ ዶሰይሳታ ታኒ ኤንታ ኦሱዋዳ ኦꬃና” ያጌስ ኡባ ሃርያ ጎዳይ።

22 ሄ ዎደ ክሩበት ባንታ ቀፍያ ምጭዶሶና፤ ኤንታ ምየን ገርቶት ደኦሶና። እስራኤለ ፆሳ ቦንቾይ ኤንታፈ ቦላራ ደኤስ። 23 ጎዳ ቦንቾይ ካታማ ግዶፈ ደንድድ፥ ዶሎሀ ባጋን ደእያ ዙማ ቦላ ኤቅስ። 24 ፆሳ አያናይ ታዉ እምዳ ቆንጨꬃን አያናይ ታና ቢታፈ ደንꬅድ፥ ካልዳወታ ቢታን ደእያ ድኤትዳይሳታኮ ኤፍስ። ሄሳፈ ጉየ፥ ቆንጨꬃይ ታፐ ሻከትስ። 25 ጎዳይ ታና በስዳባ ኡባ ድኦን ደኤይሳታስ ኦዳስ።