1 ጎዳ ቃላይ ታኮ ሀይሳዳ ያግድ ይስ፤ 2 “ነኖ አሳ ናአዉ፥ ኔኒ ጌላ አሳ ግዶን ደኣሳ። ኤንቲ ጌላ አስ ግድያ ግሾ ኤንታዉ አይፈይ ደኤስ፥ ሽን ደሞኮና፤ ሀይꬅ ደኤስ፥ ሽን ስኦኮና። 3 ሄሳ ግሾ፥ አሳ ናአዉ፥ ድኦን ብያ አሳዳ፥ ኔኒ ኤፋናዉ ዳንዳእያባ ኡባ ሺሻ ቃቻዳ፥ ጋላስ ኤንቲ በእሽን ከያዳ፥ ነ ደእያ በሳፈ ሀራ በሲ ባ። ኦን ኤር ኤንቲ ጌላ አስ ግድኮካ አኬካና። 4 ጋላስ ኤንቲ ፄልሽን፥ ድኦ ብያ አሳዳ፥ ነ ቃችዳባ ካረ ከሳ፤ ኦማርስ ኤንቲ ፄልሽን፥ ድኤትድ ብያ አሳዳ ከያ። 5 ኤንቲ ፄልሽን፥ ነ ኬꬃ ጎዳ ሉካዳ ፆእያራ ከያ። 6 ነ ከስዳ ሚሽያ ኤንቲ ፄልሽን፥ ነ ሀሸን ቶካዳ፥ ለምእሽን ደንዳዳ ባ። ነ አዉ ብያኮ በኦና መላ ነ ሶምኡዋ ካማ። ነ ሀንያባይ እስራኤለ አሳስ ማላ ግዳና” ያግስ።

7 ታኒ እ ታና ኪትዳይሳዳ ኦꬃስ። ድኤትድ ብያ አሳዳ፥ ጋላስ ታ ቃችዳባ ካረ ከሳስ። ኦማርስ ታ ኬꬃ ጎዳ ታ ኩሸን ሉካዳ ከያስ፤ ታ ከስዳ ሚሽያ ኤንቲ ፄልሽን፥ ታ ሀሸን ቶካዳ፥ ለምእሽን ባስ።

8 ዎንታ ጉራ ጎዳ ቃላይ ታኮ ሀይሳዳ ያግድ ይስ። 9 “ነኖ አሳ ናአዉ፥ ጌላ እስራኤለ አሳይ፥ ‘ነ ኦꬅያባይ አይቤ?’ ግድ ነና ኦይችቦኮና? 10 ኤንታዉ ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ሀ ትንብተይ የሩሳላመን ደእያ ሀላቃባነ እስራኤለ አሳባ ኦዴስ።’ 11 ነ ሀንያባይ ኤንታዉ ማላ ግደይሳ ኦዳ፤ ኤንቲ ድኤትድ ሀራ ቢታ ባና። 12 ኤንታ ግዶን ደእያ ሀላቃይ ጎዳ ሉክድ ባ ሚሽያ ባ ሀሸን ቶክድ፥ ለምእሽን ባና፤ ቢታ በኦና መላ ባ ሶምኡዋ ካማና። 13 ታ ግተ እያ ስንꬃን የጋዳ ኦይካና። ታኒ እያ ካልዳወታ ቢታ ባብሎነ ካታማ ኤሀና፤ ሽን እ ሄ ካታማ በኦና ሀይቃና። 14 እያ ዩሾን ደእያ እያ ማደይሳታነ እያ ኦላንቾታ ኡባ ታ ኡባ በሲ ፕስክ ኦꬃና፤ ታ ኤንታ ማሻን የደꬃና።

15 “ኤንታ ታ ሀራ ቢታታነ ካዎተꬃታ ግዶ ላልያ ዎደ ታ ጎዳ ግደይሳ ኤንቲ ሄ ዎደ ኤራና። 16 ኤንቲ ቢያ ካዎተꬃታ ግዶን ባንታ ቱና ኦሶ ፓፃና መላ ኤንታፈ ጉꬃታ ኦላፐ፥ ኮሻፐነ ሀርገፐ አትዲ አከካናዳ ኦꬃና። ታ ጎዳ ግደይሳ ኤንቲ ሄ ዎደ ኤራና” ያግስ። 17 ጎዳ ቃላይ ታኮ ሀይሳዳ ያግድ ይስ፤ 18 “ነኖ አሳ ናአዉ፥ ነ ካꬃ ዳጋማን ማ፤ ነ ሃꬃ ያሻን ኮኮራሸ ኡያ። 19 ቢታን ደእያ አሳኮ ሀይሳዳ ያጋ። ኡባ ሃርያ ጎዳይ እስራኤለ ቢታን ደእያ የሩሳላመ አሳባ ሀይሳዳ ያጌስ፦ ‘ቢታን ደእያ አሳ ኡባይ ገነ ኦꬅያ ግሾ ኤንታ ቢታይ ካሎ አታና፥ ኤንቲ ባንታ ኡይꬃ ህርጋን ማና፤ ባንታ ሃꬃ ዳጋማን ኡያና። 20 ሀእ አስ ኩምዳ ካታማት ꬋያና፤ ቢታይ ባይሳ ግዳና። ታኒ ጎዳ ግደይሳ ኤንቲ ሄ ዎደ ኤራና’ ” ያጌስ።

21 ጎዳ ቃላይ ታኮ ሀይሳዳ ያግድ ይስ፤ 22 “ነኖ አሳ ናአዉ፥ ህንተ እስራኤለ ቢታን፥ ዎደ አዱቅስ ቆንጨꬅ ኡባይ ሀዳ ግድስ አꬍስ ያግድ ሌምሰይ እ አይቤ? 23 ኡባ ሃርያ ጎዳይ ሀይሳዳ ያጌስ፤ ‘ታኒ ሀ ሌምሶይ ናምአንꬆ ኦደቶና መላ ኦꬃና፤ ኤንቲ ዛሪድ፥ እስራኤለ ቢታን ሌምሶኮና’ ያጌስ። ‘ጋላሳይ ማታትስ፤ ቆንጨꬅ ኡባይ ፖለታና ሀኔስ’ ያጋ። 24 ህዛፐ ጉየ እስራኤለ አሳ ግዶን ዎርዶ ቆንጨꬅነ ሙሩኖ ዴና። 25 ታ ጎዳይ ኦዳናዉ ኮይዳባ ኦዳና፤ ሄስካ ጋምኦና ፖለታና። ህንተኖ፥ ጌላቶ፥ ታ ኦድያባ ኡባ ህንተ ላይꬃን ፖላና” ያጌስ ኡባ ሃርያ ጎዳይ።

26 ቃስካ ጎዳ ቃላይ ታኮ ሀይሳዳ ያግድ ይስ። 27 “ነኖ አሳ ናአዉ፥ እስራኤለ አሳይ፥ ‘እ በእዳ ቆንጨꬃይነ እ ኦድያ ትንብተይ ዳሮ ላይꬃፈ ጉየ ሀናናባ’ ያግድ ኦዶሶና። 28 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ ‘ታ ኦድያ ቃላይ ፖለታናፐ አትሽን፥ እሶይካ ጋምኤና’ ” ያጌስ ኡባ ሃርያ ጎዳይ።