1 ጎዳ ቃላይ ሀይሳዳ ያግሸ ታኮ ይስ። 2 “ነኖ አሳ ናአዉ፥ እስራኤለን ትንብተ ኦድያ ናበታ ቦላ ነ ትንብተ ኦዳ። ባንታዉ መꬍ ከስድ ትንብተ ኦደይሳታ ሀይሳዳ ያጋ፤ ጎዳ ቃላ ስእተ። 3 ኡባ ሃርያ ጎዳይ ሀይሳዳ ያጌስ፦ ‘አይባካ በኦና ባንታ ቆፋን ደንድድ ትንብተ ኦድያ ኤያ ናበታ አየ!’ 4 እስራኤለ አሳዉ፥ ህንተ ናበት ላለትዳ ካታማን ደእያ ዎርካናታ መላ። 5 ጎዳ ጋላሳን ኦላን ምንድ ኤቃና መላ እስራኤለ አሳ ድርሳ ግምብያ ምንꬅድ ኤስቤከታ፤ ፑደ ላለትዳ በሳ ከይበከታ። 6 ኤንታ ቆንጨꬃይነ ኤንታ ብታይ ዎርዶ። ኤንቲ ጎዳይ ኪቶናሽን፥ ጎዳይ ሀይሳዳ ያጌስ ያጎሶና። ኤንቲ ኦደይሳ ጎዳይ ፖላና ግድ ናጎሶና። 7 ታኒ ኦዶናሽን፥ ጎዳይ ሀይሳዳ ያጌስ ያግድ ኦድያነ ዎርዶ ቆንጨꬅ በኤይሳታነ ሙራንቾታ ግደከቲ?” ያጌስ።

8 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ በእዳ ቆንጨꬃነ ህንተ ኦድዳ ትንብተይ ዎርዶ ግድያ ግሾ ታ ህንተዉ ሞርከ ግዳና። 9 ዎርዶ ቆንጨꬅ በእያነ ሙራንችያ ናበታ ቦላ ታኒ ታ ኩሽያ ደንꬃና። ኤንቲ ታ አሳ ዞረታን ገሎኮና፤ እስራኤለ አሳ ማዝጋበን ፃፈቶኮና፤ ኤንቲ እስራኤለ ቢታ ገሎኮና። ሄ ዎደ ታ ኡባ ሃርያ ጎዳ ግደይሳ ህንተ ኤራና።

10 “ሳሮይ ባይናሽን ሳእ ሳሮ ያግድ ታ አሳ ባለꬆሶና። አሳይ ሹቹ ኬልድ ዶርን፥ ኤንቲ ቦቅንተ ትዮሶና። 11 ሀ ቦቅንተ ትየይሳታስ፤ ሀ ህንተ ትይዳ ግምበይ ኩንዳና፤ ዎልቃማ እር ቡካና። ታኒ ግታ ሻች የጋና፤ ዎልቃማ ጎተይ ደንዳና። 12 ሄ ግምበይ ኩንድያ ዎደ አሳይ ህንተ ትይዳ ኖራይ አኔ? ያግድ ኦይቾና አጋነ” ያጌስ።

13 ኡባ ሃርያ ጎዳይ ሀይሳዳ ያጌስ፦ “ታኒ ግምብያ ላላናዉ፤ ታ ሀንቁዋን ዎልቃማ ጎተ የዳና፤ ታ ይሉዋን ግታ ሻቻ ኪታና፥ ታ ሸንያን ዎልቃማ እራ ቡክሳና። 14 ህንተ ቦቅንተ ትይዳ ግምብያ ታ መንረꬃና፤ ባሶይ በንታና ጋካናዉ ላላና። እ ኩንድያ ዎደ ህንተ እያ ግዶን ሀይቃና፤ ሄ ዎደ ታኒ ጎዳ ግደይሳ ህንተ ኤራና። 15 ታ ሀንቆይ ግምብያ ቦላነ ግምብያ ቦቅንተ ትይዳ አሳታ ቦላ ዎꬋና። ታ ህንተኮ፥ ‘ግምበይ ባዋ፤ ግምብያ ቦቅንተ ትይዳይሳትካ ዶኮና። 16 እስራኤለን ደእያ ናበት፥ የሩሳላመባ ትንብተ ኦደይሳት፥ ሳሮይ ባይናሽን ሳሮ ቆንጨꬅ በኤይሳት ዶኮና’ ” ያጌስ ኡባ ሃርያ ጎዳይ።

17 “ነኖ አሳ ናአዉ፥ ባንታ ቆፋን ደንድድ፥ ትንብተ ኦድያ ማጫሳ ደሬቃ ፄላዳ ኤንታ ቦላ ትንብተ ኦዳ። 18 ኡባ ሃርያ ጎዳይ ሀይሳዳ ያጌስ፦ ‘ሀራ አሳ ቦላ ዎልቅ ዳናዳ፥ ኤንታ ሀሽያ ቦላ ሙሩኖባ ስክያነ አሳስ ኡባስ ቢታ ቃጨ ጊግስያ ማጫሳ አየ! ህንተ ታ አሳ ፅሄን ኦይክድ ህንተ ሸምፑዋ አሻኔ? 19 እስ ኮጰ ባንጋ ዎይኮ እስ ባሶ ኡይꬅ ደማናዉ፥ ዬላያባ ኦꬅድ፥ ታ አሳ ስንꬃን ታና ካዉሼታ። ህንተ ሀይቃናዉ በሶናይሳታ ዎꬍድ ዳናዉ በሶናይሳታ አሼታ። ያትድ ታ አሳ ዎርዶ ኦዴታ፤ ኤንትካ ህንተ ዎርዱዋ ስኦሶና’ ” ያጌስ።

20 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ህንተዉ ሀራ አሳ ቦላ ዎልቅ ዳና መላ ህንተ ኩሸን ቃችዳ ሙሩኑዋ ቃጭያ ታ ዳፋ ኤካና። ታ እያ ህንተ ኩሽያፐ ዱꬃ ሆላና፤ ፅሄፐ ከስ ኤክያ ካፎዳ ታ ኤንታ ህንተ ፅህያፐ ከሳ ኤካና። 21 ታኒ ህንተ ሻሽያ ቃራ ኤካዳ፥ ታ አሳ መርናዉ ህንተ ኩሸፐ አሻና። ታኒ ጎዳ ህንተ ሄ ዎደ ኤራና። 22 ታኒ አዛንꬃቦና ፅሎ አሳ ዎዛና ህንተ ዎርዶን አዛንꬅደታ፤ ናጋራንቾት ባንታ ኢታ ኦሱዋፐ ስሚድ፥ ባንታ ሸምፑዋ አሾና መላ ኤንታ ምንꬅደታ። 23 ህዛፐ ህንተ ዎርዶ ቆንጨꬅ በኤከታ፤ ሙሩነከታ። ታኒ ታ አሳ ህንተ ኩሸፐ ከሳ ኤካና። ታኒ ጎዳ ግደይሳ ህንተ ሄ ዎደ ኤራና” ያጌስ።