1 እስራኤለ ጭማታፐ እሶት እሶት ታኮ ይድ፥ ታ ስንꬃን ኡትዶሶና። 2 ጎዳ ቃላይ ሀይሳዳ ያግሸ ታኮ ይስ። 3 “አሳ ናአዉ፥ ሀ አሳት ባንታ ዎዛናን ኤቃ ኤስዶሶና፤ ኤንታ ናጋራይ ኤንታዉ ꬉበ ሹች ግድስ። ያትን፥ ኤንቲ ታና ኦይቻና መላ ኦꬆዬ?” 4 ነ ኤንታዉ ኡባ ሃርያ ጎዳይ ሀይሳዳ ያጌስ ጋዳ ኦዳ፤ “እስራኤለ አሳፐ ኦንካ ኤቃ ባ ዎዛናን ዎꬅድ፥ እያ ናጋራይ እያዉ ꬉበ ሹቹ ግድን፥ ናበ ኦይቻናዉ ቢኮ፥ ታኒ ታ ሁጰን እያ ኤቃታ ዳሮተꬃዳ እያዉ ዛራና። 5 ሄ ኤቃት እስራኤለ አሳ ታፐ ሃስዶሶና፤ ሽን ሀእ ታ ኤንታዉ እምያ ዛሩዋን ኤንታ ዎዛና ታኮ ዛራና” ያጌስ።

6 “ሄሳ ግሾ፥ እስራኤለ አሳስ ሀይሳዳ ያጋዳ ኦዳ። ኡባ ሃርያ ጎዳይ ሀይሳዳ ያጌስ፤ ናጋራ ፓፅተ፤ ህንተ ኤቃ አግተ፤ ህንተ ቱና ኦሶ ኡባፈ ስምተ።

7 “እስራኤለ አሳ ግድን ዎይኮ እስራኤለ ቢታን ደእያ አላጋ ቢታ አሳ ግድን፥ ታፐ ሃክድ፥ ባ ዎዛናን ኤቃ ዎꬅድ፥ እያ ናጋራይ እያዉ ꬉበ ሹቹ ግድን፥ ታና ዞረ ኦይቻናዉ ናበኮ ቢኮ፥ ታኒ ጎዳይ ታ ሁጰን እያዉ ዛሮ እማና። 8 ታኒ ሄ ኡራ ሞርካና፤ ታ እያ አሳ ማላስነ ሚቻስ አሻና፤ ታኒ እያ ታ አሳ ግዶፈ ꬋይሳና፤ ታ ጎዳ ግደይሳ ህንተ ሄ ዎደ ኤራና። 9 እስ ናበይ ጭመትድ ትንብተ ኦድኮ፥ ሄ ናበይ ኦዳና መላ ጭምዳይ ታና ጎዳ። ታኒ እያ ቦላ ታ ኩሽያ ዎꬃዳ፥ ታ አሳ ግዶፈ እያ ꬋይሳና። 10 ኤንቲ ባንታ ናጋራ ሴራ ቶካና፤ ናበይነ ናብያ ኦይቸይስ እስ ግና ሴረታና። 11 ህዛፐ ጉየ እስራኤለ አሳይ ኦገ ባለትድ ታፐ ሃከና፤ ባንታ ናጋራን ባንታና ቱንሶኮና። ኤንቲ ታ አሰ ግዳና፤ ታንካ ኤንታ ፆሳ ግዳና” ያጌስ ኡባ ሃርያ ጎዳይ።

12 ጎዳ ቃላይ ሀይሳዳ ያግሸ ታኮ ይስ፦ 13 “አሳ ናአዉ፥ እስ ቢታ አሳይ ናጋራ ኦꬅድ፥ ታዉ አማነቶና እፅኮ፥ ታኒ ታ ኩሽያ ደንꬃዳ፥ ኤንታ ካꬃ ꬋይሳዳ፥ ኮሻ ኤሀና፤ አሳነ መህያ ዎꬋና። 14 ሀር አቶሽን ሀ ሄꬑ አሳት ኖሄይ፥ ዳነልነ እዮብ ሄ ቢታን ደእያኮካ፥ ኤንቲ ባንታ ፅሎተꬃን ባንታ ሸምፑዋ ፃላላ አሻና” ያጌስ ኡባ ሃርያ ጎዳይ።

15 “ታኒ ኤንታ ቢታ ቦላ ዎራ ዶአታ የዳዳ፥ ሄ ቢታይ አስ ባይናነ ኦንካ ካንꬆና መላ ባይሳ ኦꬃና። 16 ታኒ ኡባ ሃርያ ጎዳይ ታ ደኡዋን ጫቃስ። ሀር አቶሽን፥ ሀ ሄꬑ አሳት ሄ ቢታን ደእያኮካ፥ ኤንቲ ባንታ ናይታ አሻናዉ ዳንዳኦኮና። ኤንቲ ባንታዉ አታና፤ ሽን ቢታይ ባይሳ ግዳና” ያጌስ ኡባ ሃርያ ጎዳይ።

17 “ታኒ ሄ ቢታ ቦላ ቶራ የዳዳ፥ ያን ደእያ አሳነ መህያ ዎꬍኮ፥ 18 ታኒ ኡባ ሃርያ ጎዳይ ታ ደኡዋን ጫቃስ። ሀ ሄꬑ አሳት ሄ ቢታን ደእያኮካ፥ ባንታ ናይታ አሻናዉ ዳንዳኦኮና። ኤንቲ ባንታዉ አታና” ያጌስ ጎዳይ።

19 “ታኒ ሄ ቢታ ቦላ ኢታ ሀርገ የዳዳ፥ ታ ሀንቁዋን ሱꬅ ጉካና መላ ኦꬅኮ፥ ያን ደእያ አሳነ መህያ ዎꬍኮ፥ 20 ታኒ ኡባ ሃርያ ጎዳይ ታ ደኡዋን ጫቃስ። ሀር አቶሽን፥ ኖሄይ፥ ዳነልነ እዮብ ሄ ቢታን ደእያኮካ፥ ኤንቲ ባንታ ፅሎተꬃን ባንታ ሸምፑዋ አሻናፐ አትሽን፥ ባንታ ናይታ አሾኮና” ያጌስ ኡባ ሃርያ ጎዳይ።

21 ኡባ ሃርያ ጎዳይ ሀይሳዳ ያጌስ፤ “ታኒ አሳነ መህያ ዎꬋናዉ የሩሳላመ ቦላ ኦይዱ ኢታ ፕርዳታ፦ ቶራ፥ ኮሻ፥ ዎራ ዶአታነ ሀርገ የዳና። 22 ግዶሽን፥ አትድ ከይዳ ጉꬃ አሳት፤ ማጫ ናይትነ አደ ናይት ያፐ ከያና። ኤንቲ ህንተኮ ያ ዎደ ኤንታ ሀኖታነ ኤንታ ኦሱዋ ህንተ በእድ፥ ታ የሩሳላመ ቦላ ኤህዳ ጋዶይ ልከ ግደይሳ አኬካና። 23 ህንተ ኤንታ ሀኖታነ ኤንታ ኦሱዋ በእድ፥ ታ ኤንታ ቦላ ጮ ፕርዶናይሳ ኤራና” ያጌስ ኡባ ሃርያ ጎዳይ።