1 ኑ ድኤትዳ ላፑንꬆ ላይꬃን፥ እቻሻንꬆ አጌናን፥ ታማንꬆ ጋላሳን፥ እስራኤለ ጭማታፐ ጉꬃት ጎዳ ሸንያ ኦይቻናዉ ይድ፥ ታ ስንꬃን ኡትዶሶና።

2 ሄ ዎደ ጎዳ ቃላይ ሀይሳዳ ያግሸ ታኮ ይስ፤ 3 “አሳ ናአዉ፥ ኡባ ሃርያ ጎዳይ፥ እስራኤለ ጭማታኮ ጎዳይ ሀይሳዳ ያጌስ ያጋ፦ ‘ህንተ ታ ሸንያ ኦይቻናዉ ይደቲ? ታኒ ኡባ ሃርያ ጎዳይ ታ ደኡዋን ጫቃስ፦ ህንተ ታና ኦይቻና መላ ታ ኮይከ።’

4 “አሳ ናአ ነ ኤንታ ቦላ ፕርዳኔ? ቱማ ኤንታ ቦላ ፕርዳኔ? ሄሳ ግድኮ፥ ኤንታ ማይዛታ ቱና ኦሱዋ ኤንታ ኤርሳ። 5 ኡባ ሃርያ ጎዳይ ሀይሳዳ ያጌስ ጋዳ ኤንታዉ ኦዳ። ‘ታኒ እስራኤለ ዶርዳ ዎደ ታ ኩሽያ ደንꬃዳ ያይቆባ ዘረꬃስ ጫቃስ። ታኒ ታናተꬃ ግብፀ ቢታን ኤንታዉ ቆንጭሳስ። ታ ኩሽያ ደንꬃዳ፥ ታኒ ጎዳ፥ ህንተ ፆሳ። 6 ታ ህንተና ግብፀፈ ከሳዳ፥ ህንተዉ ዶርዳ ቢታ፥ ማꬅነ ኤስ ጎግያ ቢታ፥ ሀራ ቢታ ኡባፈ አꬍዳ ሎኦ ቢታ ኤሀና’ ጋዳ ጫቃስ። 7 ታ ኤንታኮ፥ ‘ህንተ እሶይ እሶይ ዶስያ ቱና ኤቃታ ድግተ፤ ግብፀ ኤቃታን ህንተና ቱንሶፕተ። ታኒ ጎዳ ህንተ ፆሳ’ ” ያጋስ።

8 ግዶሽን፥ ኤንቲ ታዉ ማካልድ፥ ታ ኦድያባ ስኦና እፅዶሶና። ኤንቲ ባንታ አሞትዳ ቱና ኤቃታ ድግቦኮና፤ ግብፀ ኤቃታ ጎይኖ አግቦኮና። ሄሳ ግሾ፥ ኤንቲ ግብፀን ደእሽን፥ ታ ሀንቁዋ ኤንታ ቦላ ጉሳናዉ ቆፓስ። ታ ሸንያ ዉርሳናዉ ቆፋ ቃቻስ። 9 ሽን ኤንቲ ደእያ ካዎተꬃታ ግዶንነ እስራኤለ አሳ ግብፀፈ ከሳናዉ ጫቅያ ዎደ ታ ታናተꬃ ኤርስዳ አሳ ስንꬃን ታ ሱንꬃይ ቱኖና መላ ኦꬃስ። 10 ሄሳ ግሾ፥ ታ ኤንታ ግብፀፈ ከሳዳ መላ ቢታ ኤሀስ። 11 ኪተትያ ኡባስ ደኦ እምያ ታ ህግያ ኤንታዉ እማስ፤ ታ ዎጋ ኤንታ ታማርሳስ። 12 ኤንታ ጌሸይ ታና ጎዳ ግደይሳ ኤንቲ ኤራና መላ፥ ታ ሳምባታ ታፐነ ኤንታፈ ግዶን ማላ ኦꬃዳ እማስ።

13 ሽን እስራኤለ አሳይ መላ ቢታን ታ ቦላ ማካልዶሶና። ኪተትይዳ ኡባስ ደኦ እምያ ታ ህግያ መንꬅዶሶና፤ ታ ዎጋ ካልቦኮና፤ ታ ሳምባታ ቱንስዶሶና። ታኒ መላ ቢታን ታ ሀንቁዋ ኤንታ ቦላ ጉሳዳ ኤንታ ꬋይሳናዉ ቆፓስ። 14 ሽን ታ ኤንታ ግብፀፈ ከስያ ዎደ በእዳ ካዎተꬃታ ስንꬃን ታ ሱንꬃይ ቱኖና መላ ኤንታ ꬋይሳብከ። 15 ኤንቲ መላ ቢታን ደእሽን፥ ኤንታዉ እምዳ፥ ሀራ ቢታ ኡባፈ ሎኦ ግድዳ ማꬅነ ኤስ ጎግያ ቢታ፥ ኤንታ ገልስከ ጋዳ ጫቃስ። 16 ሄስ ሀንዳይ ኤንቲ ኤቃ ጎይንድ፥ ታ ህግያ መንꬅዳ ግሾ፥ ታ ዎጋ ካልቦና ግሾነ ታ ሳምባታ ቱንስዳ ግሾሳ። 17 ግዶሽን፥ ታ ኤንታዉ ቃትዳ ግሾ፥ መላ ቢታን ኤንታ ዉርሳ ꬋይሳብከ።

18 ኤንቲ መላ ቢታ ደእሽን፥ ኤንታ ናይታኮ ሀይሳዳ ያጋስ፤ “ህንተ አዋታ ዎጋ ካሎፍተ፤ ኤንታ ህግያ ናጎፕተ፤ ዎይኮ ኤንታ ኤቃታን ቱኖፕተ። 19 ታኒ ጎዳ ህንተ ፆሳ። ታ ዎጋስ ኪተትተ፤ ታ ህግያ ናግተ። 20 ታ ህንተራ ጫቅዳ ጫቁዋስ ማላ ግዳና መላነ ታኒ ጎዳ ህንተ ፆሳ ግደይሳ ህንተ ኤራና መላ ሳምባታ ዱማይተ” ያጋስ።

21 “ሽን ኤንታ ናይት ታ ቦላ ማካልዶሶና፤ ኪተትያ ኡባስ ደኦ እምያ ታ ዎጋ መንꬅዶሶና፤ ታ ህግያ ናግቦኮና፤ ታ ሳምባታ ቱንስዶሶና። ያትን፥ መላ ቢታን ታ ሀንቁዋ ኤንታ ቦላ ጉሳዳ ታ ይሎይ ዉራና ጋካናዉ ኤንታና ꬋይሳናዉ ቆፓስ። 22 ሽን ታኒ ኤንታ ግብፀፈ ከስያ ዎደ በእዳ ካዎተꬃታ ስንꬃን ታ ሱንꬃይ ቱኖና መላ ኤንታ ꬋይሳብከ። 23 ኤንታ ሀራ ካዎተꬃታ ግዶነ ዱማ ዱማ ቢታ ላላናዉ መላ ቢታን ታ ኩሽያ ደንꬃዳ ጫቃስ። 24 ኤንቲ ታ ዎጋስ ኪተቶና እፅዶሶና፤ ታ ህግያ መንꬅዶሶና፤ ታ ሳምባታ ቱንስዶሶና፤ ባንታ አዋታ ኤቃ አሞትዶሶና። 25 ያትን፥ ኤንታዉ ሎኦ ግዶና ዎጋታነ ደኦ እሞና ህገታ እማስ። 26 ኤንቲ ባንታ ያርሹዋን ቱናናዳ፥ ባንታ ባይራ ናይታ ያርሻናዳ፥ ታ ኤንታ የዳ በሳስ። ታ ሄሳ ኦꬅዳይ ኤንታ ዳጋንꬃናሳነ ታኒ ጎዳ ግደይሳ ኤንቲ ኤራና መላሳ” ያግስ።

27 “ሄሳ ግሾ፥ አሳ ናአዉ፥ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ጋዳ ኦዳ፦ ሄሳ ኦꬅድ ህንተ አዋት አማነቶና እፅድ ታና ጫይዶሶና። 28 ታ ኤንታዉ እማና ጋዳ ታ ኩሽያ ደንꬃ ጫቅዳ ቢታ ኤንታ ኤህዳ ዎደ፥ ኤንቲ ደረታ ኡባነ እርፃ ምꬃ ኡባ በእዶሶና። ያን ባንታ ያርሹዋ ያርሽዶሶና። ባንታ፥ እፃንያንነ ኡሻ ያርሹዋን ታና ይሎይዶሶና። 29 ታኒ፥ ‘ሀይስ ህንተ ብያ ꬎቃ በሳይ አይቤ?’ ያጋዳ ኦይቻስ። ሀች ጋካናዉ ሄ በሳይ ‘ባማ’ ጌተቴስ እያ ብርሸꬃይ ‘ꬎቃ ጎይኖ በሳታ’ ጌተትድ ፄገቴስ” ያጌስ።

30 “ሄሳ ግሾ፥ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ያጋዳ ኦዳ፦ ‘ህንተ ማይዛት ኦꬅዳ ናጋራ ኦꬅድ፥ አይስ ህንተና ቱንሴቲ? ኤንታ ቱና ኤቃ ጎይናናዉ አሞትድ አይስ ካሌቲ?’ 31 ሀችካ ህንተ ያርሹዋ ያርሽያ ዎደ ህንተ ናይታ ታማን ያርሽድ፥ ኤቃ ኡባን ህንተና ቱንሴታ። ህንተኖ፥ እስራኤለ አሳዉ፥ ታኒ ህንተናን ኦይሸቶ? ታኒ ኡባ ሃርያ ጎዳይ ታ ደኡዋን ጫቃስ፦ ታ ህንተናን ኦይሸትከ። 32 ህንተ፥ ‘ኑኒ ምꬅነ ሹቹ ጎይንያ ሀራ ካዎተꬃታ መላነ ቢታን ደእያ ሀራ አሳ መላ ግዳና ያግድ ቆፔታ። ሽን ህንተ ቆፋይ ፖሎ ሀነና።’ ”

33 ኡባ ሃርያ ጎዳይ ሀይሳዳ ያጌስ፦ “ታ ምኖ ቀስያን፥ ታ ምጨትዳ ኩሽያንነ ታ ሀንቁዋን ህንተ ቦላ ካዎታና። 34 ካዎተꬃታ ግዶፈ ታ ህንተና ከሳና፤ ህንተ ላለትዳ ቢታ ኡባፈ ታ ምኖ ቀስያን፥ ታ ምጨትዳ ኩሽያንነ ታ ሀንቁዋን ህንተና ሺሻና። 35 ታ ህንተና ‘ካዎተꬃታ መላ ቢታ’ ግያ መላ ቢታ ኤሀዳ፥ ህንተና ታ ስንꬃን ኤሳዳ፥ ህንተ ቦላ ፕርዳና። 36 ግብፀ መላ ቢታን ህንተ ማይዛታ ቦላ ፕርድዳይሳዳ፥ ህንተ ቦላ ፕርዳና። 37 ታኒ ህንተና ታ ካዎተꬃ ፃምአ ጋርሳን ሃራና፤ ህንተ ታ ጫቁዋ ናጋና መላ ኦꬃና። 38 ማካላንቾታነ ናጋራንቾታ ታ ህንተ ግዶፈ ድጋና፤ ሀእ ኤንቲ ደእያ ቢታፈ ታ ኤንታ ከሳና። ሽን ኤንቲ እስራኤለ ቢታ ገሎና መላ ተቃና፤ ሄ ዎደ ታኒ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።

39 እስራኤለ አሳዉ፥ ህንተኮ ኡባ ሃርያ ጎዳይ ሀይሳዳ ያጌስ፦ “ሀእ ታ ኦደይሳ ህንተ ስኦና እፅኮ፥ ኡባይ ብድ ህንተ ኤቃ ጎይንተ። ሽን ህዛፐ ጉየ፥ ህንተ እሞታንነ ህንተ ኤቃታን ታ ጌሻ ሱንꬃ ቱንሶፕተ። 40 ታ ጌሻ ዙማ ቦላ፥ ꬎቃ እስራኤለ ዙማ ቦላ ህንተ እስራኤለ አሳይ ታና፥ ኡባ ሃርያ ጎዳ ጎይናና። ታኒ ህንተና ኤካና፤ ህንተ ያርሹዋ፥ ህንተ ዶርዳ እሙዋነ ህንተ ጌሻ እሙዋ ታ ህንተፈ ኮያና። 41 ህንተ ላለትዳ ካዎተꬃታ ግዶፈ ታኒ ህንተና ኤህያ ዎደነ ሀራ ቢታታፐ ታ ህንተና ሺሽያ ዎደ ሳዎ ቶንኩ ግያ ያርሾዳ ታ ህንተና ኤካና። ካዎተꬃት ፄልሽን፥ ህንተ ግዶን ታ ጌሻተꬃ ቆንጭሳና። 42 ካሰ ህንተ ማይዛታስ እማና ጋዳ ታ ኩሽያ ደንꬃዳ ጫቅዳ እስራኤለ ቢታ ህንተና ዛራዳ ኤህዳ ዎደ ታኒ ጎዳ ግደይሳ ህንተ ኤራና። 43 ህንተ ኢታ ሀኖታነ ህንተ ቱና ኦሱዋ ህንተ ሄ በሳን ሀሳያና፤ ህንተ ኦꬅዳ ኢታ ኦሶ ኡባ ህንተ ሻተታና። 44 ህንተኖ፥ እስራኤለ አሳዉ፥ ህንተ ኢታ ሀኖታ መላነ ህንተ ቱና ኦሱዋ መላ ግዶናሽን፥ ታ ሱንꬃ ግሾ ታ ኦꬅያ ዎደ ታኒ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።

45 ጎዳ ቃላይ ሀይሳዳ ያግሸ ታኮ ይስ። 46 “አሳ ናአዉ፥ ዱገሀ ባጋ ስማዳ ፄላ፤ ዱገሀ ባጋስ ኦዳ፤ ዱገሀ ዎራ ቦላ ትንብተ ኦዳ። 47 ዱገሀ ዎራስ፥ ኡባ ሃርያ ጎዳይ ኦድያባ ስአ ያጋዳ ኦዳ። ‘ታ ነ ግዶን ታማ የዳና፤ ሄ ታማይ ጭልኦ ምꬃነ መላ ምꬃ ኡባ ማና። ሄ ኤፅያ ታማይ ቶኤና፤ ዱገሀፐ ብድ፥ ፑደሀ ባጋ ጋካናዉ ደእያ አሳ ሶምኦ ኡባ ሄ ላጮይ ላባና። 48 ሄ ታማ ኦይꬅዳይ ታና ጎዳ ግደይሳ አሳ ኡባይ በአና። ሄ ታማይ ቶኤና’ ” ያጌስ።

49 ታኒ ዛራዳ፥ “ኡባ ሃርያ ጎዳዉ፥ ሄሳ ኦዳ ጋዳ ታና ኪቶፋ። ኤንቲ፥ ‘እ ኡባ ዎደ ሌምሶን ኦዴስ ግደኔ?’ ያጎሶና” ያጋስ።