1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ነ ሶምኡዋ የሩሳላመኮ ዛራዳ፥ አሳይ ጎይንያ በሳታ ቦላነ እስራኤለ ቢታ ቦላ ትንብተ ኦዳ። 3 ሀይሳዳ ያጋ፦ ‘ታኒ ነዉ ሞርከ። ታኒ ታ ማሻ ሾሁዋፐ ሾዳዳ፥ ነ ግዶፐ ፅሎ አሳነ ኢታ አሳ ኡባ ዉርሳና። 4 ፅሉዋነ ናጋራንቹዋ ኡባ ꬋይሳናዉ ዱገሀፐ ፑደሀ ጋካናዉ ደእያ አሳ ኡባ ቦላ ታ ማሻ ሾዳና። 5 ታኒ ጎዳይ፥ ታ ማሻ ሾሁዋፐ ሾድዳይሳነ ጉየ ዛሮናይሳ አሳ ኡባይ ኤራና’ ” ያጌስ።

6 “ሄሳ ግሾ፥ አሳ ናአዉ፥ አሳ ኡባይ ፄልሽን፥ ነ ዎዛናይ መቅን፥ ጫመታዳ ኦላ። 7 ‘አይስ ኦላይ?’ ያግድ ኤንቲ ነና ኦይችኮ፥ ‘ስንꬃራ ያ ኢታ ዎርያ ግሾ ኦላይስ’ ያጋ። ሄ ዎርያን፥ ‘ዎዛን ኡባይ ያሻን ሴራና፤ ኩሸ ኡባይ አርጋጫና፤ ጎባተꬅ ኡባይ ኤከታና፤ ጉልባት ኡባይ ኮኮራና። ሄ ዎደይ ጋክስ፤ ቱማ ፖለታና’ ” ያጌስ ኡባ ሃርያ ጎዳይ።

8 ጎዳ ቃላይ ሀይሳዳ ያግሸ ታኮ ይስ፦ 9 “አሳ ናአዉ፥ ትንብተ ኦዳ፤ ታኒ ጎዳይ ኦድያባ አሳስ ኦዳ፤ ማሻ፤ ሌፈትዳነ ቁሸትዳ ማሻ።

14 “ሀእካ አሳ ናአዉ፥ ትንብተ ኦዳ፤ ነ ኩሽያ ባቃ። ሄ ዎደ ማሽ ናምኡ ቶሆ ሄꬑ ቶሆ ዛሪድ ሾጫና፤ ሄስካ ዳጋንꬅያ፥ ዩሹዋ ኡባን ዎꬍያነ ሹክያ ማሽ። 15 ሄስ ኤንታ ዎዛናይ ትልአናዳነ ኤንታፈ ዳሮት ꬉበታናዳ ኦꬃና። ህንተና አየ! ህንተ ፐንገን ማሽ ዎልአንꬃ መላ ዎልአሜስ፤ ሹካናዉ ሾሆፐ ሾደትስ። 16 ነኖ፥ ቃራ ማሻዉ፥ ኡሻችነ ሀድርስ ስምዳ ነ ስምዳ ባጋ ኡባ ቡꬃ። 17 ህዛ ታኒ ታ ኩሽያ ባቃና፤ ታ ሀንቆይ ዶቻና” ያጌስ ጎዳይ። 18 ጎዳ ቃላይ ሀይሳዳ ያግሸ ታኮ ይስ። 19 “አሳ ናአዉ፥ ባብሎነ ካዋ ማሻይ ያ ናምኡ ኦገታን ማላ ዎꬃ። ናምኡ ኦገት እስ ቢታፈ ደንዶሶና፤ ኦገይ ካታማኮ ስምያ ኦገን ማላታ ቱሱ ኤሳ። 20 እስ ኦግያን ደእያ ማላ ራባ ጌተትያ አሞነ ካታማ ብያ ኦግያ ማሌስ፤ ሀንኮይ ኦገይ ግምበትዳ ይሁዳን ደእያ የሩሳላመ ካታማ ብያ ኦግያ ማሌስ። 21 ባብሎነ ካዎይ ኦገት ጋሄትያ ዳጋላን፥ ማላ ቱሳታ ማታን ኤቄስ። እ አዉ ኦግያራ ባነኮ ኤራናዉ፥ ዶንገ ቶራን ሳማ የጋና፤ ባ ኤቃታ ዞረ ኦይቻና፤ ማራጭያ በአና። 22 ግምብያ ፐንግያ ላልያ ዱሩማ ኤሀና መላ፥ ዎꬎ ኪታ አꬃና መላ፥ ጬቀታና መላ፥ ድርሳ ፐንግያ ላልያ ዱሩማ ካታማ ፐንገን ኤሳና መላ፥ ቢታ ዶራና መላነ ሚፃ ጊግሳና መላ የሩሳላመ ሳም እያዉ ኡሻቻ ኩሸን ከይስ። 23 የሩሳላመ አሳይ ባብሎነ ካዉዋራ ጫቅዳ ግሾ፥ ሄስ ባንታ ቦላ ጋካና ግድ ቆፕቦኮና። ሽን ባብሎነ ካዎይ ኤንታ ድእያ ዎደ ኤንቲ ባንታ ናጋራ ሀሳያና። 24 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ህንተ ናጋራይ ቆንጭስ፤ ህንተ ባላ ግደይሳ አሳ ኡባይ ኤሬስ፤ ህንተ ኦሶይ ህንተ ናጋራንቾ ግደይሳ በሴስ። ሄሳ ግሾ፥ ህንተ ኢታ ኦሶይ ሀሳየታና፤ ህንተ፥ ህንተ ሞርከታስ አꬍድ እመታና።

25 “ነኖ፥ ኢታነ ቱና ግድዳ እስራኤለ ሀላቃዉ፥ ነ ፕርዳ ጋላሳይ ጋክስ። 26 ኡባ ሃርያ ጎዳይ ሀይሳዳ ያጌስ፦ ነ ሁጵያፐ ካላቻ ደንꬃ፤ ነ ሁጰ ፃꬃ ቃራ። ህዛፐ ጉየ ካሰይሳዳ ሀናናባይ ባዋ፤ ዝቃይ ꬎቁ ጋና፤ ꬎቃይ ዝቅ ጋነ። 27 ጋዶ! ጋዶ! ታኒ ሀ ካታማ ꬋይሳና። ፕርዳናዉ ማት ደኤይስ ያና ጋካናዉ ሀ ካታማይ ዛሪድ ኬፀተና። እ ያ ዎደ ታ እያዉ አꬃዳ እማና” ያጌስ።

28 አሳ ናአዉ፥ ሀይሳዳ ያጋዳ ትንብተ ኦዳ። እስራኤለ ጫይያ አሞነታ ኡባ ሃርያ ጎዳይ ሀይሳዳ ያጌስ ጋዳ ኦዳ።