1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ሸምፖ ዎይሳት ኩምዳ ካታማ ቦላ ፕርዳናዉ ጊጋዲ? ያትኮ፥ እ ኦꬅዳ ቱና ኦሶ ኡባ እያዉ ኦዳ። 3 ኡባ ሃርያ ጎዳይ ሀይሳዳ ያጌስ ጋዳ ኦዳ፦ ነ ዳሮ አሳ ዎꬍዳ ግሾነ ኤቃ ጎይኖን ነና ቱንስዳ ግሾ ነ ꬋዮ ዎደይ ጋክስ። 4 ነ ጉስዳ ሱꬃን ባላ ግዳዳሳ፤ ነ ኦꬅዳ ኤቃን ቱናዳሳ። ነ ፕርዳ ጋላሳይ ማታትስ፤ ነ ꬋዮ ዎደይ ጋክስ። ሄሳ ግሾ፥ ታ ነና ካዎተꬃታስ ሚቻስነ ሀራ ቢታታስ ቀልቅሴስ አጋና። 5 ነኖ፥ ነ ሱንꬃይ ኢትዳ ዳጋም ኩምዳ ካታማዉ፥ ማታንነ ሃሆን ደኤይሳት ነና ቀልቅሳና።

6 “ነ ግዶን ደእያ እስራኤለ ሀላቃት ኡባይ ሱꬁ ጉሳናዉ ባንታ ዎልቃ አይ መላ ጎኤትያኮ በአ። 7 ነ ግዶን ደኤይሳት ባንታ አዋነ ባንታ አይዉ ቦንቾኮና። ኤንቲ በተ አሳ ጭሞሶና፤ አምኤታነ አዉ አይያ ባይና ናይታ ናቆሶና። 8 ኤንቲ ታ ጌሻ ሚሸታ ካꬎኦሶና፤ ታ ሳምባታ ቱንሶሶና። 9 ነ ግዶን እሶት እሶት ሀራታ ዎꬍሳናዉ ዎርዶን ኦዶሶና፤ ሀራት ኤቃስ ያርሸትዳባ ሞሶና፤ ሀራት ላይማቶሶና። 10 ነ ግዶን እሶት እሶት ባ አዋ ማቸራ ቱኖሶና፤ ሀራት ኩሸ መቶይ ደእያ ማጫሳራ ዎልቃን ቱንሶሶና። 11 ነ ግዶን እሶት እሶት ባ ሾሩዋ ማቸራ ቱኖሶና፤ አዋይ ባ ናአ ማቸራ ቱኔስ፤ ባ አዋ ናእዉ፥ ባ ምችዉ ዎልቃን ኢስድ ዬላዬስ። 12 ነ ግዶን እሶት እሶት ሚሸ ኤክድ፥ ሸምፖ ዎꬎኦሶና፤ ሀራት ባንታ ሚሽያ ባንታ ያራ ግድዳ እስራኤለታስ የሎራ ታልኦሶና፤ ኤንታ ቦንቅድ ባንታዉ ዱረቶሶና፤ ታና ኩመꬅ ዶግዶሶና” ያጌስ ኡባ ሃርያ ጎዳይ።

13 “አሳይ በሶና ሚሸ ኤክያ ግሾነ ሸምፖ ዎꬍያ ግሾ፥ ታኒ ታ ኩሽያ ህንተ ቦላ ደንꬃና። 14 ታ ነና ሴርያ ዎደ ነ ጎባተꬃይ ኔራ ዳኔ? ዎይኮ ነ ኩሸይ ምኖ ግዳኔ? ታኒ ጎዳይ ሀይሳ ኦዳስ፤ ታ ኦድዳይሳዳ ኦꬃና። 15 ታ ነና ካዎተꬃታ ግዶንነ ቢታታ ግዶን ላላና፤ ነ ቱናተꬃ ኔፐ ድጋና። 16 ሀራ ካዎተꬃታ ስንꬃን ነ ካዉያና፤ ታኒ ጎዳ ግደይሳ ነ ኤራና” ያግስ።

17 ጎዳይ ታኮ ሀይሳዳ ያግስ፦ 18 “አሳ ናአዉ፥ እስራኤለ አሳይ አይኮካ ፓꬆኮና፤ ኤንቲ ኡባይ ብራ ሼሽያ ዎደ ናሰ ብራታፐ፥ ቆርቆሮፐ፥ ብራታፐነ እርሳሰፐ ከያ ሻአ መላ። 19 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ህንተ ኡባይ አታላ መላ ግድዳ ግሾ ታ ህንተና ኡባ የሩሳላመ ሺሻና። 20 ብራ፥ ናሰ ብራታ፥ ብራታ፥ እርሳሰነ ቆርቆሮ ታማን ሁብድ ሼሸይሳዳ ታ ህንተና ሺሻዳ ታ ሀንቁዋና ትልእሳና። 21 ታ ህንተና የሩሳላመ ሺሻዳ፥ ታ ሀንቆ ታማ ህንተ ቦላ ኤꬃዳ ህንተና ያን ትልእሳና። 22 ብር ጮጨን ሼኤይሳዳ ህንተ የሩሳላመን ትልአና። ሄ ዎደ ታኒ ጎዳይ ታ ሀንቁዋ ህንተ ቦላ ጉስዳይሳ ህንተ ኤራና’ ” ያጌስ።

23 ዛሪድ ጎዳ ቃላይ ሀይሳዳ ያግሸ ታኮ ይስ። 24 “አሳ ናአዉ፥ ኤንታ ቢታይ ቱንዳ ግሾ፥ ታ ሀንቁዋን እር ቡኮና መላ ድጋዳ ኤንታ ሴራ ዶምዳሳ እስራኤለ አሳስ ኦዳ። 25 ነ ግዶን ኤንታ ሀላቃት ዎꬍዳባ ጉድሸ መንረꬅያ ጋሞ መላ፤ ኤንቲ ዎꬎኦሶና፤ ሚሸ ግድን፥ ሀራ ቡቁራ ግድን፥ ኡባ ባንታዉ ኤኮሶና፤ ዳሮ ማጫሳታ አምኦ ኦꬅዶሶና። 26 ካህነት ታ ህግያ መንꬅዶሶና፤ ታ ጌሻባታ ቦንችቦኮና። ጌሽነ ጌሽ ግዶና ባ ሻኮኮና፤ ቱናነ ቱና ግዶና ባ ሻክድ ታማርሶኮና፤ ታ ሳምባታ የግ አግደታ። ሄሳ ጋሶን ታ እስራኤለ አሳ ግዶን ቦንቸታብከ። 27 ሀላቃት ባንታ ዎꬍዳባ ዱሰረꬅያ ሱꬉመ መላ፤ ኤንቲ ባንታዉ በሶና ዱረተꬅ ደማናዉ ሸምፖ ዎꬎኦሶና። 28 ናበት ጎዳ ቦቅንተ ትይያ አሳዳ፥ ዎርዶ ቆንጨꬅ በእድ፥ ዎርዶ ትንብተ ኦድድ ኤንታ ናጋራ ገንꬆሶና። ጎዳይ ኦዶና ደእሽን፥ ‘ኡባ ሃርያ ጎዳይ ሀይሳዳ ያጌስ’ ያጎሶና። 29 ቢታን ደእያ አሳይ ቦንቆሶና፤ ማንቆታነ መቶታንቾታ ኡንኤꬆሶና፤ ኤንቲ ሱረ ፕርዳ ድግድ በተ አሳ ጌላዮሶና።

30 “ታኒ ቢታ ꬋይሶና መላ ድርሳ ግምብያ ኬፀይ፥ ላለትዳ ድርሳ ግምብያ ባጋራ ታ ስንꬃን ኤቅድ ናግያ እስ አስ ኮያስ፤ ሽን ኦናካ ደማብከ። 31 ሄሳ ግሾ፥ ታ ሀንቁዋ ኤንታ ቦላ ጉሳና፤ ታኒ ታ ይሉዋን ኤንታ ꬋይሳና፤ ኤንቲ ኦሱዋ ኤንታ ቦላ ዛራና” ያጌስ ኡባ ሃርያ ጎዳይ።