1 ጎዳ ቃላይ ሀይሳዳ ያግሸ ታኮ ይስ፦ 2 “አሳ ናአዉ፥ እስ አየፐ የለትዳ ናምኡ ምቸት ደኦሶና። 3 ኤንቲ ግብፀን ደእሸ፥ ባንታ ናአተꬃፈ ዶምድ፥ ላይማ ግድዶሶና። ሄ ቢታን ደእያ አደት ኤንታ ꬋንꬃን ካእዶሶና፤ ኤንታ ጌላኦተꬃይ ኤከትስ። 4 ኤንታፈ ባይረ ሱንꬃይ ኦሆሎ፤ ካሎ ምቸ ሱንꬃይ ኦሆልባ። ኤንታ ናምአ ታኒ ማችን፥ ታዉ አደነ ማጫ ናአ የልዶሶና። ኦሆላ ሳማረ፤ ኦሆልባ ቃስ የሩሳላመ።”

5 “ኦሆላ ታዉ ማቾ ግዳዳ ደአሸ ላይማታሱ፤ እያ ባ ኦላንቾ ግድዳ አሶረ ላገꬆታ ካላዳ ባዉሱ። 6 ኤንቲ ካሎሰ ዳንያ ማኦ ማእዳ ኦላንቾታ፥ ቢታ ሃረይሳታነ ቶራ ሞጮናታ፤ ኤንቲ ኡባይ ናአተꬅነ ማላ ሎኦ ግድዳ ፓራ ቶግያ አሳታ። 7 እያ ባና ላይማ ኦꬃዳ፥ ኡባፈ ሎእያ አሶረ አደታስ ባና አꬃዳ እማሱ። እ ላይማተꬃይ እያ አሶረ ኤቃታ ጎይናዳ ቱናና መላ ኦꬅስ። 8 እያ ግብፀን ዶምዳ ላይማተꬃ ሀእካ አጋቡኩ፤ እ ናአተꬃፈ ዶምድ፥ አደት እ ꬋንꬃ ካኦሶናነ ኢራ ላይማቶሶና።”

9 “ሄሳ ግሾ፥ እያ ምንꬃዳ ሲቅያ አሶረ ላገꬆታስ ታኒ እዮ አꬃዳ እማስ። 10 ኤንቲ እዮ ቃርድ ካሎይዶሶና፤ እ አደነ ማጫ ናይታ ድእድ ኦይክዶሶና፤ እዮ ማሻን ዎꬍዶሶና። እዮ ጋክዳ ፕርዳ ጋሶን፥ ማጫሳ ግዶን ቀልቅሰꬃስ አታሱ።”

11 “እ ምችያ ኦሆልባ ሄሳ በአሱ፤ እያ ባ አሙዋንነ ባ ላይማተꬃን ባ ምቸፈ አꬋዳ ቱና ግዳሱ። 12 እያካ አሶረ ሃረይሳት፥ ቶራ ሞጮናታ፥ ሎኦ ማኦ ማእዳ ኦላንቾታነ ፓራ ቶግያ አሳታ፥ ናአተꬅነ ማላ ሎኦ አሳታ ምንꬃዳ ሲቃሱ። 13 እያካ ባና ቱንስዳይሳ በአስ፤ ኤንቲ ናምአይ እስ ኦገን ቦሶና።”

14 “እያ ባ ላይማተꬃ ያ ዳርሳሱ፤ እያ ጎዳ ቦላ ዎጨትድ ኦሰትድ ዞኦ ቃላመን ትየታዳ ካልዳወታ አደ ምስለ በአሱ። 15 ኤንቲ ባንታ ፄሳን ዝናረ ዳንጭዶሶና፤ ባንታ ሁጵያን ሎኦ ጫርቀ ፃፅዶሶና። ኤንቲ ኡባይ ካልዳወ ቢታፈ ይዳ ካልዳወታ ሀላቃታ ዳኖሶና። 16 እያ ኤንታ ምስለታ በእዳ ዎደ ዳሮ ሲቃዳ፥ ኤንታ ፄጋናዉ ካልዳወታ ቢታ አሰ ኪታሱ። 17 ባብሎነት ኢኮ ይድ፥ ኢራ ላይማትድ እዮ ቱንስዶሶና። ኤንቲ እዮ ዳሮ ቱንስዳፐ ጉየ፥ እያ ኤንታ ሻተታሱ። 18 እያ ባ ላይማተꬃ ቆንጨን ኦꬅዳ ዎደነ ባ ካሉዋ ቃራ በስዳ ዎደ፥ ታኒ እ ምችዉ አግዳይሳዳ እዮካ ሻተታዳ አጋስ። 19 ሽን እያ ግብፀን ላይማ ግዳዳ ደእያ፥ ባ ያላጋተꬃ ዎድያ ሀሳያዳ፥ ባ ላይማተꬃ ካሰይሳፈ ያ ዳርሳሱ። 20 ኤንታ አቱንꬃይ ሀረይሳ መላ፥ ኤንታ ኮቻይ ፓራይሳ መላ ግድዳ ባ ላገꬆታ ካላዳ ባሱ። 21 ነኖ፥ ኦሆልበ፥ ነ ያላጋተꬃ ዎድያን ግብፀ አደት ነ ꬋንꬃን ካእሽን፥ ነ ጌላኦተꬃ ኤክሽን፥ ኔኒ ፖልዳ ላይማተꬃ ዛራዳ ሀእ ኦꬃናዉ አሞታሳ።”

22 ሄሳ ግሾ፥ ኦሆልበ፥ ኡባ ሃርያ ጎዳይ ሀይሳዳ ያጌስ፦ “ታኒ ነ ላገꬆታ፥ ነ ሻተታ አግዳይሳታ ነ ቦላ ደንꬃና፤ ታ ኤንታ ነ ቦላ ኡባ በሳራ ኤሀና። 23 ባብሎነታነ ካልዳወታ ኡባ፥ ፋቁዳ፥ ሶሃነ ቆኣና፥ አሶረታ ኡባ፥ ናአተꬅነ ማላ ሎኦ አሳታ፥ ቢታ ሃረይሳታ፥ ቶራ ሞጮናታ፥ ኦላንቾታ፥ ሀላቃታነ ፓራ ቶግያ አሳታ ነ ቦላ ኤሀና። 24 ኤንቲ ኦላ ፓራ ጋረታራ፥ ጫና ጋረታራነ ዳሮ ኦላንቾታራ ፑደሀ ባጋፈ ህንተ ቦላ ያና። ኤንቲ ዎጋ ጎንዳለነ ጉꬃ ጎንዳለ ኦይክድ፥ ብራታ ባርኔፃ ዎꬅድ፥ ነ ዩሹዋን ሳልፓና። ታኒ ነና ኤንታዉ አꬃዳ እማና፤ ኤንቲ ነና ባንታ ዎጋ መላ ፕርዳና። 25 ታኒ ታ ሀንቁዋ ነ ቦላ የዳና፤ ኤንቲ ኔራ ሀንቆ ሱላን ጋሄታና። ኤንቲ ነ ሲꬍያነ ነ ሀይꬃ ቃንፃና፤ አትዳይሳት ማሻን ዉራና። ኤንቲ ነ አደ ናይታነ ነ ማጫ ናይታ ኦይካና፤ አትዳይሳታ ታማን ፁጋና። 26 ኤንቲ ነ ማኦ ኡባ ኔፐ ቃርድ ኤካና፤ ነ አሌቆ ኡባ ኔፐ ከስድ ኤካና። 27 ሄሳዳ ኦꬃዳ፥ ነ ግብፀፈ ኤህዳ ላይማተꬃ አሙዋ ኔፐ ድጋና። ኔኒ ናምአንꬆ ግብፀታ ኤቃ ምስለታ ꬎቁ ጋዳ ፄሎናዳ ዎይኮ ኤንታ ሀሳዮናዳ ኦꬃና።”

28 ኡባ ሃርያ ጎዳይ ሀይሳዳ ያጌስ፦ “ታኒ ነና ነ እፀይሳታ፥ ነ ሻተታዳ አግዳይሳታስ አꬃዳ እማና። 29 ኤንቲ ነና እፃና፤ ነ ዳቡራዳ ደምዳባ ኡባ ቦንቅድ፥ ነና ፅረ ካሎ አሻና። ነ ላይማተꬃ አሞይ ቆንጫናዳ ኦꬃና። ነ ላይማተꬃ አሞይ፥ 30 ሄሳ ነ ቦላ ኤህስ። ኔኒ ካዎተꬃታራ ላይማታዳሳ፤ ኤንታ ኤቃታራ ነና ቱንሳዳሳ። 31 ነ ምችያ ብዳ ኦግያ ነካ ባዳሳ። ሄሳ ግሾ፥ ነና እ ፁኣ ኡሻና።”

32 ኡባ ሃርያ ጎዳይ ሀይሳዳ ያጌስ፦ “ኔኒ ነ ምቸ ፁአፐ ኡያና፤ ሄ ፁአይ ግታነ ጪሞ። እ ትግን፥ ዳሮ ኤክያ ግሾ፥ አስ ኡባይ ነ ቦላ ሚጫናነ ነና ቅꬋና። 33 ኔኒ ማꬆታ ጋንድጋራናነ አዛናና። ሄስ ነ ምቸ ሳማረ ፁአይ ነዉ ዳጋማነ ꬋዮ ኤሀና። 34 ነ እያ ፂዞꬃዳ ኡያና፤ ፁአ መንꬃና፤ ኩንአን ነ ꬋንꬃ ጋራና።” ታኒ ኡባ ሃርያ ጎዳይ ሀይሳ ኦዳይስ።

35 ኡባ ሃርያ ጎዳይ ሀይሳዳ ያጌስ፦ “ኔኒ ታና ዶግዳ ግሾ፥ ታዉ ዞኮ ዛርዳ ግሾነ ነ ላይማተꬃ አሙዋስ ጋተ ኤካና።”

36 ጎዳይ ታኮ ሀይሳዳ ያግስ፦ “አሳ ናአዉ፥ ኦሆል ቦላነ ኦሆልብ ቦላ ፕርዳናዉ ጊገታዲ? ኤንቲ ኦꬅዳ ቱና ኦሱዋ ኤንታዉ ኦዳ። 37 ኤንቲ ናምአይ ላይማትዶሶና፤ ሸምፖ ዎꬍዶሶና። ኤንቲ ባንታ ኤቃ ጎይንዶሶና። ሀር አቶሽን፥ ኤንቲ ታዉ የልዳ ባንታ አደ ናይታ ባንታ ኤቃታስ ካꬅ ኦꬅድ ያርሽዶሶና። 38 ሄሳፈ አꬅድ ሀራ ኢታባ ታ ቦላ ኦꬅዶሶና፤ ኤንቲ ታ ኬꬃ ቱንስዶሶና፤ ሄ ዎደ ታ ሳምባታካ ሻርዶሶና። 39 ኤንቲ ባንታ ናይታ ኤቃታስ ያርሽዳ ጋላስ፥ ኤንቲ ታ ኬꬃ ገልድ ቱንስዶሶና፤ ኤንቲ ታ ኬꬃን ኦꬅዳይ ሀይሳ።” 40 ኤንቲ ሃሆ በሳፈ አደት ያና መላ አሰ ኪትን፥ ኤንቲ ይዶሶና። ህንተ ናምኡ ምቸት ህንተ ቦላ ሜጨትደታ፤ ህንተ አይፍያ ትየትደታ፤ አሌቆ አꬅደታ። 41 ሎኦ አርጄታ ቦላ ኡትደታ፤ ፃርጴዛ ቦላ ታ እፃንያነ ታ ሻማሆ ዛይትያ ዎꬅደታ። 42 ኡፋይትያ አሳ ኮይሰꬅ ህንተ ማታን ስኤቴስ። ማꬆትዳ አሳይ መላ ቢታ ይዶሶና። ህንተ ኩሸን ሳጋዮ ዎꬅዶሶና፤ ሎኦ ካላቻታ ህንተ ሁጰን ጎፅዶሶና። 43 ታኒ ታ ዎዛናን፥ “ሀ አደት አሳተꬃይ ላይማተꬃን ግልቅዳ ማጫሴራ ላይማቶሶና” ያጋስ። 44 አደይ ማጫሳራ ላይማተይሳዳ፥ ሀይሳቲ ኤንታራ ላይማትዶሶና። ኤንቲ ላይማታናዉ አሞትያ ኦሆልራነ ኦሆልብራ ላይማትዶሶና። 45 ኤንቲ ላይማ ግድያ ግሾነ ሸምፖ ዎꬍያ ግሾ፥ ፅሎ አሳት ላይማትያነ ሸምፖ ዎꬍያ ኤንታ ቦላ ፕርዳና።

46 ኡባ ሃርያ ጎዳይ ሀይሳዳ ያጌስ፦ “ዳሮ አሳ ደንꬃዳ ኤንታ ቦላ ኤሀ። ኤንታ ዳጋንꬅያነ ኤንታ ቦንቅያ አሳታስ አꬃ እማ። 47 ሀ ዳጋንꬅያ አሳት ይድ፥ ኤንታ ሹቻን ጫዶ፤ ማሻን ቡꬆ፤ ኤንታ አደነ ማጫ ናይታ ዎꬎ፤ ኤንታ ኬꬃ ታማን ፁጎ። 48 ማጫስ ኡባይ ናገታና መላ ታኒ ቢታ ኡባፈ ላይማተꬅ ꬋይሳና። 49 ህንተ ናምኡ ምቸት ህንተ ላይማተꬃ ግሾነ ኤቃታ ህንተ ጎይንዳ ናጋራ ግሾ ህንተና ፕርዳና። ታኒ ኡባ ሃርያ ጎዳ ግደይሳ ህንተ ሄ ዎደ ኤራና” ያጌስ።