1 ኑኒ ድኤትዳ ኡዱፉንꬆ ላይꬃን፥ ታማንꬆ አጌናን፥ ታማንꬆ ጋላስ፥ ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ሀች ጋላስ ማዝጋበን ፃፋ። ባብሎነ ካዎይ የሩሳላመ ተቅዳይ ሀች። 3 ሀ ማካላንቾ አሳስ ኡባ ሃርያ ጎዳይ ሀይሳዳ ያጌስ ጋዳ ሀ ሌምሱዋ ኦዳ። ማዳበ ድስተ ታማ ቦላ ዎꬃዳ ሃ እያን ትጋ። 4 ገዳነ አንጋሱዋ፥ ሎኦ አሾ ኡባ ሙፃዳ፥ እያን የጋ፤ ሎኦ መቀꬃ ቃንፀረꬃዳ እያን ኩንꬃ። 5 ሄሳስ ነ ኤካና ዶርሳይ ዉድያፐ ዶረትዳይሳ ግዶ። ድስትያ ጋርሳን ምꬅ ዎꬃዳ አሹዋነ መቀꬃ ካፃና ጋካናዉ ዶይሳ።”

6 ኡባ ሃርያ ጎዳይ ሀይሳዳ ያጌስ፦ “ሱꬁ ጉስያ ካታማ አየ! እያ ሽእድ ጌዮና እፅዳ ናሰ ብራታ ድስተ መላ ግዳሱ። እ ግዶን ደእያ ሙፀትዳ አሹዋ ሳማ የጎና ኩሸን ጋሄትዳይሳ ከሳ ከሳ ኤካ። 7 ሄ ካታማይ ዎꬍዳ አሳ ሱꬃይ ሀኖ ጋካናዉ እን ደኤስ። ሱꬅ ጉሳሸ፥ አይብካ ካሞና ዳንዳኦና ዛላ ቦላ ጉሳሱፐ አትሽን፥ ባናን ካማና ቢታ ቦላ ጉሳቡኩ። 8 ሀሎ ከያናዉ፥ ታ ሀንቁዋ ደንꬃናዳ፥ ካመቶና መላ እያ ጉስዳ ሱꬃ ታኒ ዛላ ቦላ ዎꬃስ።”

9 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ሱꬁ ጉስያ ካታማ አየ! ታኒ ምꬅ ጉጃዳ ዎꬃና። 10 ዳሮ ምꬅ ዎꬃ፤ ታማ ኤꬃ። አሹዋ ሎይꬃዳ ዶይሳ፤ ጫምባ ማልኤꬃ፤ መቀꬃ ፁጋ። 11 ካይሳ ማዳበ ድስተ ታማ ቦላ ዎꬃ። እያ ቦላ ደእያ ቡቃይ ሴርድ ክቻና ጋካናዉነ እያ ቦላ ደእያ ሽአይ ፁገትድ ꬋያና ጋካናዉ ሱልድ ምቻና መላ ታማ ቦላ ዎꬃ። 12 ሄ ዳቡራይ ኡባይ ጮ መላ ግድስ፤ እያ ቦላ ደእያ ዳሮ ሽአይ ሀር አቶሽን፥ ታማን ክችቤና። 13 የሩሳላመ፥ ነነ ቱንዳይ ነ ኢታ ኦሱዋና። ታ ሀንቆይ ነ ቦላ ዉራና ጋካናዉ ህዛፐ ኔኒ ጌያካ። ነ ቱናተꬃፈ ነና ጌሻናዉ ኮያስ ሽን፥ ነ ጌያናዉ ኮያባካ። 14 ታኒ ጎዳይ ሀይሳ ኦዳስ፤ ሄስ ሀናና። ታኒ ጉየ ስምከ፤ ነዉ ቃትከ፤ ታ ቆፋ ላምከ። ነ ኦግያዳነ ነ ኦሱዋዳ ታኒ ነና ፕርዳና። ታኒ ኡባ ሃርያ ጎዳይ ሀይሳ ኦዳይስ” ያግስ።

15 ቃስካ ጎዳ ቃላይ ሀይሳዳ ያግሸ ታኮ ይስ። 16 “አሳ ናአዉ፥ ነ ሲቅያነ ነ አይፈ ስንꬃን ሎእያ ነ ማችዉ አኬኮና ዎꬋና። ሄሳን ካዮቶፋ፥ ዬኮፋነ አፉፆፋ። 17 ኦላ፥ ሽን ነ ኦልያ አስ ስኦፖ፤ ሀይቅዳርስ ካዮቶፋ። ኔኒ ነ ሁጰን ቃጨ ፃፃ፤ ነ ቶሁዋን ጫማ አꬃ። ነ ዶና ካሞፋ፤ ሾች ሞፓ።”

18 ዎንታ ታኒ አሳስ ኦዳስ፤ ኦማርስ ታ ማችያ ሀይቃሱ። ዎንተꬃ ጋላስ ጎዳይ ታና ኪትዳይሳዳ ኦꬃስ። 19 አሳይ ታኮ፥ “ሀ ኔኒ ኦꬅያባስ ብርሸꬃይ አይበኮ ኑስ አይስ ኦድኪ?” ያግስ።

20 ጎዳ ቃላይ ሀይሳዳ ያግሸ ታኮ ይስ ያጋዳ ኤንታዉ ኦዳስ። 21 ኡባ ሃርያ ጎዳይ እስራኤለ አሳ ሀይሳዳ ያጌስ፤ “ህንተ ጬቀትያ፥ ህንተ አይፈ አሙዋነ ህንተ ሸምፖይ አሞትያ ታ ኬꬃ ታኒ ቱንሳና ሀናይስ። ህንተ ጉየ አሽዳ ህንተ አደ ናይትነ ህንተ ማጫ ናይት ማሻን ዉራና። 22 ሄ ዎደ ታ ኦꬅዳይሳዳ ህንተ ኦꬃና። ህንተ ዶና ካመከታ፤ ሾቹ ሜከታ። 23 ህንተ ሁጵያ ፃፅተ፤ ህንተ ቶሁዋን ጫማ አꬅተ። ካዮተከታ ዎይኮ ዬከከታ። ሽን ህንተ ህንተ ናጋራ ጋሶን ግልቃናነ እሶይ እሱዋራ ኦላና። 24 ሄ ዎደ ህዝቄል ህንተዉ ማላታ ግዳና፤ እ ኦꬅዳይሳዳ፥ ህንተ ኦꬃና። ሄስ ሀንያ ዎደ፥ ታኒ ኡባ ሃርያ ጎዳ ግደይሳ ህንተ ኤራና።

25 “አሳ ናአዉ፥ ታኒ ኤንታ ኡፋይሳነ ቦንቹዋ፥ ኤንታ አይፈን ሎእያባነ ኤንታ ዎዛናይ አሞትያባ ምኖ በሳ፥ ቃስ ኤንታ አደ ናይታነ ኤንታ ማጫ ናይታ ኤንታፈ ኤካና። 26 ሄ ጋላስ ነዉ ዎረ ኦዳናዉ እስ አስ ከስ ኤክድ ያና። 27 ሄ ጋላስ ነ ዶናይ ዶየታና፤ ነ እያራ ኦደታና፤ ዛራዳ ሙመ ግዳካ። ሄሳዳ ሀናዳ፥ ነ አሳስ ማላታ ግዳና። ታኒ ጎዳ ግደይሳ ኤንቲ ሄ ዎደ ኤራና” ያግስ።