1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ነ ሶምኡዋ አሞነኮ ዛራዳ፥ ኤንታ ቦላ ትንብተ ኦዳ። 3 ኡባ ሃርያ ጎዳይ ኦድያ ቃላ ስእተ። ህንተ ታ ኬꬃ ቱንስያ ዎደ፥ እስራኤለ ቢታይ ባይሳ አትያ ዎደነ ይሁዳ አሳይ ድኤትያ ዎደ ሀሹ ግደታ። 4 ታኒ ህንተና ዶሎሀ ባጋ ቢታ አሳስ ላታ ኦꬃዳ እማና። ኤንቲ ህንተ ግዶን ካምበ ኬፅድ ዳና። ህንተ ምꬃ አይፍያ ኤንቲ ማና፤ ህንተ ማꬃ ኤንቲ ኡያና። 5 ታኒ ራባ ካታማ ግማለት ሄመትያ በሲ ከሳና፤ አሞነታ ቢታ ዶርሳ ዉደይ ፔእያ በሲ ኦꬃና። ታኒ ጎዳ ግደይሳ ህንተ ሄ ዎደ ኤራና። 6 ኡባ ሃርያ ጎዳይ ሀይሳዳ ያጌስ፦ ‘ህንተ እስራኤለ ꬋዩዋን ኩሸ ባቅዳ ግሾ፥ ጉፕዳ ግሾነ ኡፋይትድ ቀልቅስዳ ግሾ፥ 7 ታኒ ህንተ ቦላ ታ ኩሽያ ደንꬃስ። ህንተና ካዎተꬃታስ ድኦ ኦꬃዳ እማና። ታ ህንተና አሳፐ ሾዳና፤ ካዎተꬃታ ግዶፈ ꬋይሳና። ታኒ ጎዳ ግደይሳ ህንተ ሄ ዎደን ኤራና’ ” ያጌስ።

8 ኡባ ሃርያ ጎዳይ ሀይሳዳ ያጌስ፦ “ሞአበይነ ሳይረ፥ ‘ይሁድ ሀራ ካዎተꬃታ ኡባ መላ’ ያግዳ ግሾ፥ 9 ታኒ ሞአበ ቢታ ተቃና፤ እያ ዛዋ ናግያ፥ ኤረትዳ ቤት-ያሽሞታ፥ ባኣል-ማኦናነ ቅራታይማ ካታማታ ꬋይሳና። 10 ህዛፐ ጉየ አሞነታ ጉጃዳ፥ ኤንቲ ካዎተꬃታ ግዶን ሀሳየቶና መላ ኤንታ ዶሎሀ ባጋ ቢታፈ ይዳ አሳስ አꬃዳ እማና። 11 ታኒ ሞአበ ፕርዳና፤ ታኒ ጎዳ ግደይሳ ኤንቲ ሄ ዎደ ኤራና” ያጌስ።

12 ኡባ ሃርያ ጎዳይ ሀይሳዳ ያጌስ፤ “ኤዶመይ ይሁዳ ቦላ ሀሎ ከይዳ ግሾነ ቆህዳ ግሾ፥ 13 ታኒ ኩሽያ ኤዶመ ቦላ ደንꬃና። ያን ደእያ አሳነ መህያ ኩመꬅ ꬋይሳዳ ባይሳ ከሳና። ተማናፐ ብድ፥ ደዳና ካታማ ጋካናዉ ኤንቲ ማሻን ዉራና። 14 ታኒ እስራኤለ ባጋራ ኤዶመ ቦላ ሀሎ ከያና። እስራኤለት ኤንታ ቦላ ታ ይሉዋ መላ ኦꬃና። ታኒ ሀሎ ከይዳይሳ ኤዶመይ ኤራና” ያጌስ ኡባ ሃርያ ጎዳይ።

15 ኡባ ሃርያ ጎዳይ ሀይሳዳ ያጌስ፦ “ፍልስፄመት ባንታ ዎዛና ኢታተꬃን ሀሎ ከይዳ ግሾነ አቅዳ ሞርከን ይሁዳ ካꬍድ ꬋይሳናዉ ኮይዳ ግሾ፥ 16 ታኒ ታ ኩሽያ ፍልስፄመታ ቦላ ደንꬃና። ታኒ ከልታወታ ቃንፃና፤ አባ ዶናን አትዳይሳታ ኡባ ꬋይሳና። 17 ታ ኤንታ ቦላ ግታ ሀሎ ከያና፤ ታ ሀንቁዋን ኤንታ ሴራና። ታኒ ኤንታ ቦላ ሀሎ ከይያ ዎደ፥ ታኒ ጎዳ ግደይሳ ኤንቲ ሄ ዎደ ኤራና” ያጌስ።