1 ኑኒ ድኤትዳ ታማነ እሳንꬆ ላይꬃን፥ አጌና ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ፅሮሳ አሳይ ኡፋይትሸ፥ ‘ሀሹ! የሩሳላመይ ኩንድስ፤ እያ ፐንገይ ዋግ ግድ ዶየትስ። እ ላለትድ ዶየትዳ ግሾ ህዛፐ ጉየ ኑ ዱረታና’ ያጎሶና። 3 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ነኖ፥ ፅሮሳ፥ ታኒ ነዉ ሞርከ። አባ ዙለይ ደንደይሳዳ ታኒ ዳሮ ካዎተꬃታ ነ ቦላ ኤሀና። 4 ኤንቲ ነ ድርሳ ግምብያ ላላና፤ ነ ግምበ ሻኮታ መንꬃና። ታ ነና ቢታ ኡባ ቁችድ ኤፍን፥ ካሎ ደእያ ዛላ ኦꬃና። 5 ኔኒ አባ ግዶን አሳይ ባንታ ሞሎ ግትያ መልሳናዉ ምጭያ በሲ ግዳና። ሀራ ካዎተꬃት ፅሮሳ ቦንቃና። 6 ዋና ቢታን ደእያ ጉታታ ማሻን ዉርሳና። ታኒ ጎዳ ግደይሳ ኤንቲ ሄ ዎደ ኤራና’ ያጌስ ኡባ ሃርያ ጎዳይ።

7 “ኡባ ሃርያ ጎዳይ ሀይሳዳ ያጌስ፦ ‘ፅሮሳ ቦላ ኦላ ደንꬃና መላ ካዎታ ካዎ ግድዳ ባብሎነ ካዋ ናቡካዳናፆራ፥ ፓራታራ፥ ፓራ ጋረታራነ ዳሮ ኦላንቾታራ ፑደሀ ባጋፈ ኤሀና። 8 ኤንቲ ዋና ቢታን ደእያ ጉታታ ማሻን ዉርሳና። ኤንቲ ነና ተቅድ፥ ነ ድርሳ ግምብያ ጋꬅድ፥ ቢታ ዶራና፤ ባንታ ጎንዳልያ ነ ቦላ ደንꬃና። 9 ድርሳ ግምበታ ዶምእድ ላልያ ሚሸን ነ ድርሳ ግምብያ መንረꬃና፤ ባንታ ኦላ ሚሸን ነ አዱሳ ግምበታ ላላና። 10 እያ ፓራት ዳሮ ግድያ ግሾ፥ ኤንቲ ደንꬅያ ባናይ ነና ካማና። ፓራትነ ፓራታ ጋረት ላለትዳ ካታማ ድርሳ ፐንግያራ ገልያ ዎደ ኤንቲ ስስያ ጋርማሞይ ነ ድርሳ ግምብያ ቃꬃና። 11 ኤንታ ፓራት ኦገታ ኡባ የꬋና። ነ አሳ ማሻን ዉርሳና፤ ነ ዎልቃማ ቱሳት ሳአን ኩንዳና። 12 ነ ሻሎይ ድኤታና፤ ነ ዛልእያ ሚሸት ቦንቀታና። ነ ድርሳ ግምበታነ ነ ሎኦ ኬꬃታ ኡባ ꬋይሳና፤ ነ ሹቻታ፥ ነ ሳንቃነ ላለትዳ ኡባ ኤፍድ አባን የጋና። 13 ነ ማልኦ የꬃ ታ ተቃና፤ ነ ዲꬃ ግርሳይ ዛር ስኤተና። 14 ታ ነና ካሎ ደእያ ዛላ ኦꬃና፤ ኔኒ አሳይ ባንታ ሞሎ ግትያ ምጭያ በሲ ግዳና። ታኒ ጎዳይ ሀይሳ ኦድዳ ግሾ፥ ኔኒ ዛራዳ ኬፀታካ’ ” ያጌስ ኡባ ሃርያ ጎዳይ።

15 “ኡባ ሃርያ ጎዳይ ፅሮሳ ካታማኮ ሀይሳዳ ያጌስ፦ ‘ነ ሞርከት ነ ቦላ ደንድያ ዎደ ዩሾይ አባን ተቀትዳ ቢታን ደእያ አሳይ፥ ነ ጎይረትያ ዎደ ዋስያ ዋሱዋ ስእድ፥ ያሻን ኮኮራና። 16 አባ ዶናን ደእያ ሃረይሳት ባንታ አራታፐ ዎꬋና። ባንታ ቦንቾ ማኡዋነ አሌቀትድ ኦሰትዳ ማኡዋ ቃርድ ያሻን ኮኮርሸ ቢታን ኡታና። ነ ቦላ ጋክዳ መቱዋ ቆፕድ፥ ኤንቲ ዳሮ ዳጋማና፤ ኤንቲ ኡባ ዎደ ኮኮርሸ ዳና።’ 17 ኤንቲ ነዉ ሀይሳዳ ያግድ ዘለልስ ከሳና፦

19 ኡባ ሃርያ ጎዳይ ሀይሳዳ ያጌስ፦ “ሀእ ኦንካ ዶና ካታማታዳ ታ ነና ባይሳ ከሳና። ታኒ አባ ሃꬃ ነ ቦላ ኤህን፥ ዳሮ ሃꬃይ ነና ካማና። 20 ኔኒ ስኦለ ገላዳ በን ሀይቅዳ አሳራ ዋላከታና መላ ኦꬃና። ኔኒ ቢታፈ ጋርሳን፥ በን ሞገትድ፥ መርናዉ ላለትድ አትዳይሳታራ ዳና መላ ኦꬃና። ኔኒ ዛራዳ አስ ደእያ ካታማ ግዳካ፤ ደኦን ደኤይሳታ ቢታን ዛራዳ በሰ ደማካ። 21 ታኒ ነ ዉርሰꬃ ዳጋንꬅያ ዉርሰꬅ ኦꬃና፤ ነዉ ሄስ ዉርሰꬅ ግዳና። አስ ነና ኮያና፤ ሽን ኔኒ ዛራዳ በንታካ” ያጌስ ኡባ ሃርያ ጎዳይ።