1 ጎዳ ቃላይ ሀይሳዳ ያግድ ታኮ ይስ። 2 “አሳ ናአዉ፥ እስራኤለ ሄንꬃንቾታ ቦላ ሀይሳዳ ያጋዳ ትንብተ ኦዳ፦ ህንተኖ፥ ህንተና ሄምያ እስራኤለ ሄንꬃንቾቶ፥ ህንተና አየ! ህንተ ዶርሳታ ሄማናዉ በሰኔ? 3 ኤንታ ማꬃ ኡዬታ፤ ኤንታ እክስያፐ ዳደትዳ ሱፍያ ማኤታ፤ ኤንታፈ ሞꬉዋ ሹክድ ሜታ፤ ሽን ዶርሳታ ሱረ ሄመከታ። 4 ዳቡርዳይሳታ ጋሽትስበከታ፤ ሀርግዳይሳታ ፓꬅቤከታ፤ መቅዳይሳታ ኮልቤከታ፤ በትዳይሳታ ዛርቤከታ፤ ꬋይዳይሳታ ኮይበከታ። ሄሳ አግድ ኤንታ ዎልቃን ኡንኤꬅድ ሃርደታ። 5 ዶርሳት ኡባይ ሄምያ አስ ꬋይን ላለትዶሶና፤ ባዞ ዶአታስ ካꬅ ግድዶሶና። 6 ታ ዶርሳት ላለትዶሶና፤ ኤንቲ ዙማታ ቦላነ ደረታ ቦላ ቶይላትዶሶና። ቢታ ጋፃ ጋካናዉ ላለትዶሶና፤ ሽን ኤንታ ፆሞሰይ ዎይኮ ኮየይ ባዋ” ያጌስ ኡባ ሃርያ ጎዳይ።

7 ሄሳ ግሾ፥ ህንተኖ፥ ሄንꬃንቾቶ፥ ጎዳ ቃላ ስእተ። 8 “ታኒ ታ ደኡዋን ጫቃይስ፦ ታ ዶርሳታ ሄምያ አስ ꬋይን፥ ታ ዶርሳት ኦይከትድ፥ ባዞ ዶአታስ ካꬅ ግድዶሶና። ታ ሄንꬃንቾት ታ ዶርሳታ ኮይቦና ግሾነ ኤንቲ ታ ዶርሳታ ሄሞና አግድ፥ ባንታና ሄምዳ ግሾ፥ 9 ህንተኖ፥ ሄንꬃንቾቶ፥ ጎዳ ቃላ ስእተ። 10 ታ ህንተዉ፥ ሄንꬃንቾሆታስ ሞርከ ግዳና፤ ታ ዶርሳታ ታኒ ህንተፈ ኤካና፤ ታ ህንተና ናምአንꬆ ኤንታዉ ሄንꬃንቾ ኦꬅከ። ህዛፐ ጉየ ህንተ ህንተና ሄምሸ ደኤከታ። ታ ዶርሳታ ታ ህንተፈ ኤካና፤ ህዛፐ ኤንቲ ህንተዉ ካꬅ ግዶኮና” ያጌስ ኡባ ሃርያ ጎዳይ።

11 “ታኒ ታ ሁጰን ታ ዶርሳታ ፆሞሳናነ ኮያና። 12 ሄንꬃንቾይ ባ ዶርሳታፐ ꬋይን ኮየይሳዳ፥ ታኒ ታ ዶርሳታ ኮያና፤ ሻርነ ꬉም ጎዝዳ ጋላስ ኤንቲ ꬋይዳ በሳፈ ታ ኤንታ ሺሻና። 13 ታኒ ካዎተꬃታ ግዶፈነ ሀራ ቢታ ኡባፈ ሺሻዳ፥ ኤንታና፥ ኤንታ ቢታ ኤሀና። እስራኤለ ደረታን፥ ፑልቶታንነ አሳይ ደእያ በሳታን ኤንታ ሄማና። 14 ታኒ ኤንታ ሎኦ ቆሮን ሄማና፤ እስራኤለ ዙማት ኤንቲ ሄመትያ በሰ ግዳና። ኤንቲ ሎኦ ቆሮይ ደእያ እስራኤለ ዙማታ ቦላ ሄመታናነ አላታና። 15 ታኒ ታ ሁጰን ታ ዶርሳታ ሄማናነ ሸምፕሳና። 16 ታኒ ꬋይዳይሳ ኮያና፤ በትዳይሳ ዛራና፤ መቅዳይሳ ኮላና፤ ሀርግዳይሳ ፓꬃና። ሽን ታኒ ሱረ ፕርድያ ሄንꬃንቾ ግድያ ግሾ ገነን ሞꬍዳይሳነ ምንዳይሳ ꬋይሳና” ያጌስ ኡባ ሃርያ ጎዳይ።

17 ህንተኖ፥ ታ ዶርሳቶ፥ “ህንተና ኡባ ታ ፕርዳና፤ ኬሀ ኢታፐ፥ ዶርሳ ዴሻፐ ታ ሻካና። 18 ህንተ ሎኦ ቆሮን ሄመተይስ ግዶና እፅን፥ አትዳ ማታ ቶሆን የꬌቲ? ቃስ ህንተ ፅሎ ሃꬅ ኡየይስ ግዶና እፅን፥ አትዳ ሃꬃ ቶሆን ቡሎየቲ? 19 ታ ዶርሳት ህንተ ቶሆን የꬍዳ ማታ ማናዉነ ህንተ ቶሆን ቡሎይዳ ሃꬃ ኡያናዉ በሲ?” ያጌስ ኡባ ሃርያ ጎዳይ።

20 ሄሳ ግሾ፥ ኡባ ሃርያ ጎዳይ ኤንታኮ ሀይሳዳ ያጌስ፦ “ሞꬎ መህያ ግዶንነ ግልቃ መህያ ግዶን ታ ታ ሁጰን ፕርዳና። 21 ዳቡራንቾታ፥ ህንተ፥ ህንተ ምያነ ህንተ ሀሽያን ሱግያ ግሾነ ጋፃ ከሳና ጋካናዉ ህንተ ኤንታ ህንተ ካጭያን ቃይጭያ ግሾ፥ 22 ታኒ ታ ዶርሳታ አሻና። ህዛፐ ጉየ ኦንካ ኤንታ ኦይከና፤ ታ ኬሀ ዶርሳታ ግዶንነ ኢታ ዶርሳታ ግዶን ታ ፕርዳና። 23 ታ ኤንታ ቦላ እስ ሄንꬃንቹዋ፥ ታ አይልያ ዳዊታ ሹማና፤ እ ኤንታ ሄማናነ ኤንታዉ ሄንꬃንቾ ግዳና። 24 ህዛፐ ጉየ ታ ጎዳይ ኤንታ ፆሳ ግዳና፤ ታ አይለይ ዳዊቲ ኤንታ ግዶን ሀላቃ ግዳና” ያጌስ ጎዳይ።

25 “ታ ኤንታራ ሳሮተꬃ ጫቆ ጫቃና፤ ኢታ ዶአታ ታኒ ቢታፈ ድጋና፤ ታ ዶርሳት ባዞን ሳሮ ዳና፤ ዎራ ጋርሳን ህርግ ባይና አላታና። 26 ታ ኤንታነ ታ ዙማ ዩሾን ደእያ በሳታ አንጃና። ኤንታዉ ኮሽያ እራ ዎደን ዎደን እማና፤ ሄ እራይ ኤንታዉ አንጆ ግዳና። 27 ጋደን ደእያ ምꬃት አይፋና፤ ቢታይ ካꬅ ዶልሳና፤ ኡባይ ባንታ ቢታን ሳሮ ዳና። ታ ኤንታ ቃምባራ መንꬃዳ፥ ኤንታ አይለ ኦꬅድ ሃርዳይሳታ ኩሸፐ ከስያ ዎደ ታኒ ጎዳ ግደይሳ ኤንቲ ኤራና። 28 ሀራ ካዎተꬃት ኤንታ ቦንቆኮና፤ ቢታን ደእያ ዶአት ኤንታ ሞኮና፤ አይኮይካ ዳጋንꬆና ኤንቲ ሳሮ ዳና። 29 ታ ኤንታዉ አራዳ ቢታ እማና፤ ኤንቲ ዛሪድ ኮሻን ዉሮኮና፤ ዎይኮ ሀራ ካዎተꬃታስ ጫሻስ አቶኮና። 30 ሄ ዎደ ኤንቲ ታኒ ጎዳይ፥ ኤንታ ፆሳይ ኤንታራ ደኤይሳነ እስራኤለ አሳይ ታ አሰ ግደይሳ ኤንቲ ኤራና። 31 ህንተኖ፥ እስራኤለ አሳዉ፥ ህንተ ታ ዉደ፤ ታ ቆሮን ምያ ታ ዉድያ፤ ህንተ ታ አሰ፥ ታኒ ህንተ ፆሳ” ያጌስ ኡባ ሃርያ ጎዳይ።