1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ሳይረ ዙማኮ ነ ሶምኡዋ ዛራዳ ትንብተ ኦዳ፦ 3 ‘ነኖ፥ ሳይረ ዙማዉ፥ ታ ነዉ ሞርከ ግዳና፤ ታኒ ታ ኩሽያ ነ ቦላ ደንꬃዳ፥ ነና ካሎነ ባይሳ ከሳና። 4 ታኒ ነ ካታማታ ላላና፤ ነ ባይሳ ግዳና። ታኒ ጎዳ ግደይሳ ነ ሄ ዎደ ኤራና’ ” ያጌስ ኡባ ሃርያ ጎዳይ።

5 ነዉ እስራኤለራ ዉሮና ሞርከተꬅ ደእያ ግሾ፥ ኤንታ ኡንኣ ዎደነ ኤንታ ዉርሰꬃ ፕርዳ ዎደ፥ ኤንታ ነ ማሻስ አꬃዳ እማዳሳ። 6 ታ ኡባ ሃርያ ጎዳይ ታ ደኡዋን ጫቃይስ፦ ታኒ ነና ሀይቆን ፕርዳና፤ ነ ሀይቆፐ ከሳ ኤካናዉ ዳንዳአካ። ነ አሰ ዎꬎ እፆና ግሾ አሰ ዎይ ነና ካላና። 7 ታኒ ሳይረ ዙማ ካሎነ ባይሳ ከሳና፤ ያራ ኦንካ አꬎና መላ ኦꬃና። 8 ታኒ ነ ደረታ ኡባ አሀን ኩንꬃና፤ ደረት፥ ሻፋትነ ዛንጋራት ማሻን ሀይቅዳይሳታ አሀን ካመታና። 9 ታ ነና መርናዉ ባይሳ ኦꬃና፤ ነ ካታማት ካሎ አታና፤ ታኒ ጎዳ ግደይሳ ህንተ ሄ ዎደ ኤራና።

10 “ታኒ ጎዳይ እስራኤለንነ ይሁዳን ደእሽን ህንተ፥ ‘ሀ ናምኡ ካዎተꬃታነ ሀ ናምኡ ቢታታ ኑ ኦይካና፤ ኤንቲ ኑባ ግዳና ግዳ ግሾ፥ 11 ህንተ ኤንታ ሞርክድ፥ ኤንታ ቦላ ይሎትዳ ግሾነ ቃናትዳ ግሾ ታ ህንተና ሴራና። ታ ህንተና ፕርድያ ዎደ ታኒ ታና ግደይሳ ህንተና ኤርሳና።’ 12 ህንተ፥ ‘እስራኤለ ደረት ባይሳ አትዶሶና፤ ኑኒ ምድ ꬋይሳና መላ ኑስ እመትዶሶና’ ግድ፥ ጫይዳ ጫሻ ኡባ ታኒ ጎዳይ ስእዳይሳ ህንተ ሄ ዎደ ኤራና። 13 ነ ታ ቦላ ኦቶሮን ኦደትዳ ኦዳነ ዛው ባይና ሃሳይዳ ሃሳያ ታኒ ስአስ። 14 ቢታ ኡባይ ኡፋይትያ ዎደ ታኒ ህንተና ባይሳ ከሳና። 15 እስራኤለ ላታ ቢታይ ባይሳ ግድዳ ዎደ ህንተ ኡፋይትዳ ግሾ፥ ሳይረ ዙማዉ ኤዶመ ቢታ ኡባ ታኒ ባይሳ ኦꬃና። ታኒ ጎዳ ግደይሳ ህንተ ሄ ዎደ ኤራና” ያጌስ ኡባ ሃርያ ጎዳይ።