1 “አሳ ናአዉ፥ እስራኤለ ዙማታ ሀይሳዳ ያጋዳ ትንብተ ኦዳ፦ ‘ህንተኖ፥ እስራኤለ ዙማቶ፥ ጎዳ ቃላ ስእተ።’ 2 ህንተ ሞርከት፥ ‘ሀሹ! በን ꬎቃ ደረት ኡባይ ኑ ላታ ግድዶሶና’ ያግዶሶና። 3 ሄሳ ግሾ፥ ኡባ ሃርያ ጎዳይ ሀይሳዳ ያጌስ ጋዳ ትንብተ ኦዳ። ኤንቲ ህንተና ኡባ በሳራ መንረꬅድ ባይሳ ኦꬅዳ ግሾነ ህንተ ሀራ ካዎተꬃታን ሃረታና መላ ኦꬅዳ ግሾ ህንተና ጫሻስነ ሚቻስ አግስ። 4 ጎዳ ቃላ ስእተ! ኡባ ሃርያ ጎዳይ ደረታኮ፥ ዙማታኮ፥ ዛንጋራታኮ፥ ኦላታኮ፥ ዩሹዋን ደእያ ሀራ ካዎተꬃን ቦንቀትዳ፥ ቀልቅሰትዳነ ባይሳ አትዳ ካታማታኮ ሀይሳዳ ያጌስ። 5 ታኒ፥ ታ ኤፅያ ቃናትያን ሀራ ካዎተꬃታ ቦላነ ኤዶመ ኡባ ቦላ ቱማ ኦዳስ። ኤንቲ ኡፋይትሸነ ካꬍሸ ታ ቢታ ባንታዉ ኤክዶሶና፤ ሄንꬃ ጋደታ ላትዶሶና። 6 ሄሳ ግሾ፥ እስራኤለ ቢታ ቦላ ትንብተ ኦዳ። ካዎተꬃታ ጫሻ ግሾ፥ ታ ቃናተን ኤፃዳ ደረታስ፥ ዙማታስ፥ ዛንጋራትስነ ኦላታስ ኦደይሳ ኦዳ። 7 ህንተ ዩሹዋን ደእያ ካዎተꬃት ኡባይ ካዉያናይሳ ታኒ ኡባ ሃርያ ጎዳይ ህንተዉ ታ ኩሽያ ደንꬃዳ ጫቃዳ ኦዳይስ።

8 “ሽን፥ እስራኤለ ደረታ ቦላ ደእያ ምꬃት ታ አሳ እስራኤለስ ዛሪድ አጫና፤ አይፈ አይፋና፤ ኤንቲ ኤሶን ባንታ ቢታ ስማና። 9 ታ ህንተራ ደአይስ፤ ታ ህንተኮ ስማና፤ ህንተ ቢታይ ጎየታናነ ዘረታና። 10 ታ እስራኤለ አሳ ታይቡዋ ሀ ቢታን ዳርሳና፤ አሳይ ካታማታን ዳና፤ ላለትዳ በሳት ዛሪድ ግምበታና። 11 ታኒ አሳነ መህያ ህንተዉ ዳርሳና፤ ኤንቲ የለታናነ ዳራና። በን ህንተ ደእዳይሳዳ ዳና፤ ካሰይሳፈ አꬃዳ ታ ህንተና ዱረያና። ሄ ዎደ ህንተ፥ ታኒ ጎዳ ግደይሳ ኤራና። 12 ታኒ ታ አሳ እስራኤለ፥ ሀ ቢታን ዛሪድ ዳና መላ ኦꬃና። ዛሪድ ሄ ቢታይ ህንተ ናይታ ꬋይሰና፤ ቢታይ ህንተ ላታ ቢታ ግዳና” ያጌስ።

13 ኡባ ሃርያ ጎዳይ ሀይሳዳ ያጌስ አሳይ ህንተና፥ “ቢታይ አሰ ምያ ቢታ” ካዎተꬅውካ፥ “ናእ ባይና አስ ኦꬃሱ” ያገይስ ቱማ። 14 ህዛፐ ጉየ፥ ቢታይ፥ “አሰ ምያ ቢታ” ግዱኩ፤ ቃስ ካዎተꬃት፥ “ናእ ባይና አስ ግዶኮና” ያጌስ ኡባ ሃርያ ጎዳይ። 15 “ህዛፐ ጉየ፥ ካዎተꬃታ ጫሻ ታ ህንተና ስስከ፤ ህዛፐ ጉየ ዬላተከታ፤ ሄ ቢታይ ህንተዉ ꬉበ ግዱኩ” ያጌስ ኡባ ሃርያ ጎዳይ።

16 ዛሪድ፥ ጎዳ ቃላይ ሀይሳዳ ያግሸ ታኮ ይስ። 17 “አሳ ናአዉ፥ እስራኤለ አሳይ ባንታ ቢታን ደእያ ዎደ፥ ባንታ ሀኖታንነ ባንታ ኦሱዋን ቢታ ቱንስዶሶና፤ ኤንታ ሀኖይ ታ ስንꬃን ማጫሳ ኩሸ መቶ መላ። 18 ኤንቲ ቢታን ሱꬁ ጉስዳ ግሾነ ባንታ ኤቃን ቢታ ቱንስዳ ግሾ ታ ሀንቁዋ ኤንታ ቦላ ጉሳስ። 19 ታኒ ኤንታ ካዎተꬃታ ግዶን ላላስ፤ ቢታ ኡባን ዘራስ። ታኒ ኤንታ ሀኖታነ ኤንታ ኦሱዋ መላ ፕርዳስ። 20 ኤንቲ ብዳ በሰ ኡባን አሳይ ኤንታ፥ ‘ሀይሳቲ ጎዳ አሳታ፤ ኤንቲ እያ ቢታፈ ከይዳይሳታ’ ” ያግድ ታ ጌሻ ሱንꬃ ቱንሳና መላ ኦꬅዶሶና። 21 ሽን እስራኤለ አሳይ ብዳ ካዎተꬃታ ኡባን ቱንስዳ ታ ጌሻ ሱንꬃይ ታና ቆፍሴስ።

22 “ሄሳ ግሾ፥ ታኒ ኡባ ሃርያ ጎዳይ፥ እስራኤለ አሳስ ግያባ ኦዳ። ‘ህንተኖ፥ እስራኤለ አሳዉ፥ ታ ሄሳ ኦይ፥ ህንተ ብዳ ካዎተꬃታ ግዶን ቱንስዳ ታ ጌሻ ሱንꬃ ግሾፐ አትሽን፥ ህንተ ግሾ ግደና። 23 ህንተ ቱንስዳ፥ ካዎተꬃታ ግዶን ቱንዳ ታ ግታ ሱንꬃ ጌሻተꬃ ታ በሳና። ኤንቲ ፄልሽን፥ ህንተ ባጋራ ታ ጌሻተꬃ በሲያ ዎደ፥ ታኒ ጎዳ ግደይሳ ኤንቲ ኤራና’ ” ያጌስ ኡባ ሃርያ ጎዳይ።

24 “ታኒ ህንተና ካዎተꬃታ ግዶፈ ከሳና፤ ቢታ ኡባፈ ሺሻዳ ህንተ ቢታ ዛራዳ ኤሀና። 25 ታ ህንተ ቦላ ፅሎ ሃꬅ ꬋርጫና፤ ህንተካ ጌያና። ህንተና ህንተ ቱናተꬅ ኡባፈነ ኤቃ ጎይኖ ኡባፈ ጌሻና። 26 ታ ህንተዉ ኦራꬃ ዎዛና እማና፤ ኦራꬃ አያና ህንተ ግዶን ዎꬃና፤ ሹቻ ዎዛና ህንተፈ ከሳዳ፥ አሾ ዎዛና ህንተዉ እማና። 27 ታ አያና ህንተ ግዶን ዎꬃና፤ ታ ዎጋነ ታ ህግያ ናጋና መላ ኦꬃና። 28 ታ ህንተ ማይዛታስ እምዳ ቢታን ህንተ ዳና፤ ህንተ ታ አሰ ግዳና፤ ታካ ህንተ ፆሳ ግዳና። 29 ህንተ ቱና ኡባፈ ታ ህንተና አሻና፤ ካꬃይ ህንተዉ ዳራና መላ ኦꬃና፤ ዛራዳ ህንተ ቦላ ኮሻ ኤህከ። 30 ኮሻ ጋሶን ህንተ ካዎተꬃታ ግዶን ካዉዮና መላ ህንተ ምꬃ አይፍያነ ህንተ ጎሻ ካꬃን ኩንꬃና። 31 ሄ ዎደ ህንተ፥ ህንተ ኢታ ሀኖታነ ኢታ ኦግያ ሀሳያና። ህንተ ናጋራነ ህንተ ቱና ኦሱዋ ግሾ፥ ህንተ ህንተና ሻተታና። 32 ታ ሄሳ ኡባ ኦይ ህንተ ግሾ ግዶናይሳ ኤርተ። ህንተኖ፥ እስራኤለ አሳዉ፥ ህንተ ሀኖታን ዬላትተነ ካዉይተ” ያጌስ ኡባ ሃርያ ጎዳይ።

33 ኡባ ሃርያ ጎዳይ ሀይሳዳ ያጌስ፦ “ታ ህንተና፥ ህንተ ናጋራ ኡባፈ ጌሽያ ዎደ፥ ህንተ ካታማታን ዛሪድ ዳና መላ ኦꬃና፤ ላለትዳይሳት ዛሪድ ግምበታና። 34 እያ ማታራ አꬍያ አሳ ስንꬃን ባይሳ ግድድ ደእያ ቢታይ ጎሻ ቢታ ግዳና። 35 አሳይ፥ ‘ሀይስ ካሰ ባይሳ ግድዳ ቢታይ ሀእ ዋንድ ኤደነ ጋናተ ግድዴ? ካሰ ላለትዳ፥ አስ ዶናነ ባይሳ ካታማት ሀእ ዋንድ ዩሾይ ግምበትዳነ አስ ደእያ ካታማታ ግድዶና?’ ያጋና። 36 ሄ ዎደ ህንተ ዩሹዋን ደእያ አትዳ ካዎተꬃት፥ ታኒ ላለትዳ ካታማታ ዛራዳ ኬፅዳይሳነ ባይሳ ቢታይ ዛሪድ ካꬅ ዶላና መላ ኦꬅዳይ ታና ጎዳ ግደይሳ ኤንቲ ኤራና። ታኒ ጎዳይ ሄሳ ኦዳስ፤ ታ ኦድዳይሳ ታ ኦꬃና” ያጌስ።

37 ኡባ ሃርያ ጎዳይ ሀይሳዳ ያጌስ፤ “እስራኤለ አሳይ እስ ቶሆ ታና ማዶ ኦይቻና መላ ኦꬃና፤ ኤንታ ታይቡዋ ዉደዳ ዳርሳና። 38 ባኣለ ጋላስ ያርሾስ ይዳ ዉደ መሄን የሩሳላመይ ኩመይሳዳ፥ ላለትዳ ካታማታን አሰ ኩንꬃና። ሄ ዎደ ኤንቲ ታኒ ጎዳ ግደይሳ ኤራና” ያግስ።