1 ጎዳ ኩሸይ ታ ቦላ ደኤስ፤ እያ አያናይ ታና መቀꬅ ኩምዳ ዛንጋራን ዎꬅስ። 2 እ ታና ኤንታ ግዶን ያነ ሃነ ዩሽስ፤ ታ ህንች ግድ መልዳ ዳሮ መቀꬃታ ዛንጋራ ግዶን በአስ። 3 እ፥ “አሳ ናአዉ፥ ሀ መቀꬃት ዛሪድ፥ ሸምፖራ ዳናዉ ዳንዳኦና?” ያግስ።

ታኒ፥ “ኡባ ሃርያ ጎዳዉ፥ ሀይሳ ነ ኤራሳ” ያጋስ።

4 እ ታኮ፥ “ሀ መቀꬃታስ ሀይሳዳ ያጋዳ ትንብተ ኦዳ፤ ህንተኖ፥ መልዳ መቀꬃቶ፥ ጎዳ ቃላ ስእተ። 5 ኡባ ሃርያ ጎዳይ ሀ መቀꬃታኮ ሀይሳዳ ያጌስ፦ ‘ታኒ ሸምፖ ህንተ ግዶ ገልሳና፤ ዛሪድ ህንተ ደኦን ዳና። 6 ታ ህንተ ቦላ ሻያ ዎꬃና፤ ህንተና አሾ ማይዛና፤ ህንተና ጎጋን ካማና። ህንተ ደኦን ዳና መላ ታ ህንተ ግዶ ሸምፖ ገልሳና። ሄ ዎደ ህንተ ታኒ ጎዳ ግደይሳ ኤራና’ ” ያጌስ።

7 እ ታና ኪትዳይሳዳ ትንብተ ኦዳስ፤ ታ ትንብተ ኦዶ ዶምያ ዎደ ግርስ ስኤትስ፤ መቀꬃት ሺቅድ፥ ባ በሳን በሳን ኦይከትዶሶና። 8 ታ ፄልያ ዎደ፥ ኤንታ ቦላ ሻይ ደኤስ፤ አሾይ ኤንታ ቦላ በንትስ፤ ጋልባ ማእዶሶና፤ ሽን ሸምፖይ ኤንታ ግዶን ዴና።

9 እ ታኮ፥ “አሳ ናአዉ፥ ጫርኩዋስ ትንብተ ኦዳ፤ ነኖ፥ ጫርኩዋዉ፥ ኦይዱ ባጋፈ ሃ ያ፤ ኤንቲ ደኦን ዳና መላ ሀ ሀይቅዳይሳታ ቦላ ሸምፖ ፑና” ያግስ። 10 እ ታና ኪትዳይሳዳ ትንብተ ኦዳስ፤ ሸምፖይ ኤንታ ግዶ ገልስ፤ ደኦ ደምዶሶና፤ ኤንቲ ዳሮ ኦላንቾ ግድድ ባንታ ቶሆን ኤቅዶሶና።

11 እ ታኮ፥ “አሳ ናአዉ፥ ሀ መቀꬃት እስራኤለ አሳ ሌምሶ፤ እስራኤለ አሳይ፥ ‘ኑ መቀꬃት መልዶሶና፤ ኑ ኡፋይሳይ ꬋይስ፤ ኑባይ ኩመꬅ ሀልስ’ ያጎሶና። 12 ሄሳ ግሾ፥ ኤንታዉ ሀይሳዳ ያጋዳ ትንብተ ኦዳ፤ ‘ህንተኖ፥ ታ አሳዉ፥ ታኒ ህንተ ዱፉዋ ዶያና፤ ህንተና ያፐ ከሳና፤ ታ ህንተና ዛራዳ፥ እስራኤለ ቢታ ኤሀና። 13 ታ አሳዉ፥ ታ ህንተ ዱፉዋ ዶይያ ዎደነ ህንተና ከስያ ዎደ፥ ታ ጎዳ ግደይሳ ህንተ ኤራና። 14 ታኒ ታ አያና ህንተ ግዶን ዎꬃና፤ ህንተ ደኦን ዳና። ታኒ ህንተና፥ ህንተ ቢታን ዎꬃና። ሄ ዎደ ታኒ ጎዳይ ኦድዳይሳነ ኦꬅዳይሳ ህንተ ኤራና’ ” ያጌስ ኡባ ሃርያ ጎዳይ።

15 ዛሪድ ጎዳ ቃላይ ሀይሳዳ ያግሸ ታኮ ይስ፦ 16 “አሳ ናአዉ፥ እስ ምꬃ ፃምአ ኤካዳ፥ እያ ቦላ፥ ‘ሀይስ ይሁዳስነ እያራ ደእያ እስራኤለ አሳሳ’ ያጋዳ ፃፋ። ቃስ ሀራ ፃምአ ኤካዳ፥ እያ ቦላ፥ ‘ሀይስ ኤፍሬማ፤ ዮሰፋነ እያራ ደእያ እስራኤለ አሳሳ’ ያጋዳ ፃፋ። 17 ሄሳፈ ጉየ፥ ኤንቲ ነ ኩሸን እስ ፃምአ ግዳና መላ ናምአ እስፈ ጋꬃዳ ኦይካ። 18 ነ ቢታ አሳይ ኔኮ፥ ‘ሀይስ ነ ኦይስ አይቤ? ኑስ ብርሸꬃ ኦዳ’ ያግድ ኦይችኮ፥ 19 ኡባ ሃርያ ጎዳይ ሀይሳዳ ያጌስ ጋዳ ኦዳ፦ ታኒ ኤፍሬማ ኩሸን ደእያ ዮሰፋ ፃምአነ እያራ ደእያ እስራኤለ ኮቻታ ኤካናዉ ሀናይስ፤ ኤንታ ናምኣ እስ ፃምአ ኦꬃናዉ፥ ይሁዳ ፃምአራ ጋꬃና። ኤንቲ ናምአይ ታ ኩሸን እሶ ግዳና” ያጌስ ኡባ ሃርያ ጎዳይ ያጋዳ ኦዳ።

20 “ሄ ነ ኤንታ ቦላ ፃፍዳ ናምኡ ፃምአታ ኤንታ ስንꬃን ኦይካዳ፥ 21 ኡባ ሃርያ ጎዳይ ሀይሳዳ ያጌስ ጋዳ ኦዳ። ታኒ እስራኤለ አሳ ኤንቲ ላለትዳ ካዎተꬃታ ግዶፈ ከሳና፤ ታ ኤንታ ሺሻዳ፥ ኤንታ ቢታ ዛራዳ ኤሀና። 22 እስራኤለ ደረታ ቦላነ ኤንታ ቢታን ታ ኤንታ እስ ካዎተꬅ ኦꬃና፤ ኤንታ ኡባ ቦላ እስ ካዎ ካዎꬃና። ቃስ ኤንቲ ዛሪድ ናምኡ ቢታ ግዶኮና፤ ናምኡ ካዎተꬅ ግድድ ሻከቶኮና። 23 ህዛፐ ጉየ፥ ኤንቲ ባንታ ኤቃታን፥ ባንታ እፀትዳባታንነ ባንታ ናጋራ ኡባን ባንታና ቱንሶኮና። ታኒ ኤንታ ኩንድዳ በሳፈ ደንꬃዳ ናጋራ ኡባፈ ጌሻና። ኤንቲ ታ አሰ ግዳና፤ ታካ ኤንታዉ ፆሰ ግዳና።

24 “ታ አይለይ ዳዊቲ ኤንታዉ ካዎ ግዳና፤ ኤንታ ኡባስ እስ ሄንꬃንቾ ፃላል ዳና። ኤንቲ ታ ህግያ ካላና፤ ታ ዎጋ ምንꬅድ ናጋና። 25 ታኒ ታ አይልያ ያይቆባስ እምዳነ ኤንታ ማይዛት ደእዳ ቢታን ኤንቲ ዳና። ሄ ቢታን ኤንቲ፥ ኤንታ ናይትነ ኤንታ ናይታ ናይት መርናዉ ዳና፤ ታ አይለይ ዳዊቲ ኤንታ ቦላ መርናዉ ካዎ ግዳና። 26 ታ ኤንታራ ሳሮተꬃ ጫቆ ጫቃና፤ ሄ ጫቆይ መርና ጫቆ ግዳና። ታኒ ኤንታ ምንꬃዳ ኤሳና፤ ኤንታ ታይቡዋ ዳርሳና፤ ታ ኬꬃ መርናዉ ኤንታ ግዶን ዎꬃና። 27 ታኒ ያን ኤንታራ ዳና፤ ኤንታዉ ፆሰ ግዳና፤ ኤንቲ ታ አሰ ግዳና። 28 ፆሳ ኬꬃይ ኤንታ ግዶን መርናዉ ደእያ ዎደ፥ እስራኤለ ጌሸይ ታን፥ ጎዳ ግደይሳ ካዎተꬃት ኤራና” ያግስ።