1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ማጎገ ቢታን ደእያ ሞሳሀነ ቶቤላ አሳ ቦላ ዋና ሀላቃ ግድዳ ጎገ ቦላ ትንብተ ኦዳ። 3 ኡባ ሃርያ ጎዳይ ሀይሳዳ ያጌስ ጋዳ ኦዳ። ሞሳሀነ ቶቤላ ዋና ሀላቃ ግድዳ ጎገ ታ ነ ቦላ ደንዳስ። 4 ታ ነና ጉየ ዛራና፤ ነ ስን ዳፎ አꬃዳ፥ ነ ኦላንቾታራ፥ ነ ፓራታራ፥ ኦላ ሚሸ ማእዳ ነ ፓራ አሳታራ፥ ባንታ ማሻ ሌፍዳ፥ ግታነ ጉꬃ ጎንዳለ ኦይክዳ አሳራ ነና ጎቻዳ ከሳና። 5 ፋርሰፈ፥ ቶጰፈነ ሊበፐ ይዳ አሳይ ጎንዳለ ኦይክድ፥ ሁጰን ብራታ ባርኔፃ ዎꬅድ፥ ኤንታራ ግዳና። 6 ጎመርነ እያ ኦላንቾት ኡባይ፥ ፑደሀ ባጋን ደእያ ቤት-ቶርጋምነ እያ ኦላንቾት ኔራ ግዳና።

7 “ነነ ኔኮ ሺቅዳ አሳ ኡባይ ደንድተ፤ ህንተና ጊግስተ፤ ነ ኤንታዉ ሀላቃ ግዳ። 8 ዳሮ ዎደፐ ጉየ፥ ነ ኦላስ ኮየታና፤ ስንꬃፈ ያና ላይꬃታን ዳሮ ዎደ ባይሳ ግድድ ደእዳ ቢታ፥ ኦላፐ ሸምፕዳ ቢታነ፥ እያን ደእያ አሳይ ዳሮ ካዎተꬃታፐ እስራኤለ ደረታ ሺቅዳ ቢታ ኦላናዉ ነ ደንዳና። ኤንቲ ዳሮ ካዎተꬃታፐ ሺቅዳይሳታነ ኡባይ ሀእ ሳሮ ደኤይሳታ። 9 ኔኒ፥ ነ ኦላንቾትነ ኔራ ደእያ ዳሮ ካዎተꬃት ጎተዳ ደንዳና፤ ህንተ ሻራዳ ቢታ ካማና” ያጌስ።

10 ኡባ ሃርያ ጎዳይ ሀይሳዳ ያጌስ፦ “ሄ ዎደ ቆፍ ነ ዎዛና ግዶ ይን፥ ነ ኢታባ ሀልቻና። 11 ኔኒ፥ ‘ታኒ ድረትቦና ጉታታ ኦላና፤ ዎፑ ግድ፥ ህርግ ባይና ደእያ አሳታ፥ ድርስ፥ ፐንገይ ዎይኮ ጎርደይ ባይና ካታማታ ታ ኦላና። 12 ታኒ ኤንታ ድአናነ ቦንቃና፤ ካሰ ባይሳ ግድዳ ቢታ ይድ ኡትዳ፥ ካዎተꬃታ ግዶፈ ሺቅዳ፥ መሄነ ሚሸ ሃርዳ፥ ቢታስ ጉልአን ኡትዳ አሳ ቦላ ታ ኩሽያ ደንꬃና’ ያጋና። 13 ሳባ አሳይነ ድዳና አሳይ ታርሰሳ ዛልአንቾትነ ናአተꬅ ኦላንቾት ኡባይ፥ ‘ነ ቦንቃናዉ ያዲ? ነ ኦላንቾታ ድኦ ቶሳናዉ፥ ብራነ ዎርቃ ጋዝሳናዉ፥ መሄነ ሚሸ ኤካናዉነ ድኡዋ ቦንቃናዉ ዳሮ አስ ሺሻዲ?’ ” ያጋና።

14 ሄሳ ግሾ፥ አሳ ናአዉ፥ ጎገ ቦላ ሀይሳዳ ያጋዳ ትንብተ ኦዳ። ኡባ ሃርያ ጎዳይ ሀይሳዳ ያጌስ፦ “ሄ ዎደ፥ ታ አሳይ እስራኤለ ህርግ ባይና ደእያ ዎደ፥ ኔኒ አኬክኪ? 15 ኔኒ ደእያ ፑደሀ ባጋ ቢታፈ ያና። ነነ ኔራ ደእያ ዳሮ ካዎተꬃት ፓራ ቶግድ፥ ምኖ ኦላንቾ ግድድ፥ ያና። 16 ቢታ ካምያ ሻራዳ፥ ነ ታ አሳ እስራኤለ ቦላ ያና። ጎገ ስንꬃፈ ያና ዎድያን ታ ነና ታ ቢታ ቦላ ደንꬃና። ሄሳ ታ ኦይ ካዎተꬃት ታና ኤራና መላነ ታኒ ነ ባጋራ ኦꬅያባይ ታ ጌሻተꬃ ኤንታ ስንꬃን በሳና መላሳ” ያጌስ።

17 ኡባ ሃርያ ጎዳይ ሀይሳዳ ያጌስ፦ “ታኒ ታ አይለ ግድዳ እስራኤለ ናበታ ባጋራ፥ ካሰ ዎደ ዛራ ዛራዳ እስራኤለን ትንብተ ኦዳስ። 18 ኡባ ሃርያ ጎዳይ ሀይሳዳ ያጌስ፦ ‘ጎገይ እስራኤለ ቦላ ደንድያ ዎደ ታ ሀንቆይ ሱላና። 19 ሄ ዎደ እስራኤለ ቢታን ዎልቃማ ቢታ ቃፆይ ሀናና፤ ታኒ ታ ሸንያንነ ታ ኤፅያ ሀንቁዋን አዋጃስ። 20 አባ ሞሎይ፥ ሳሎ ካፎይ፥ ደረን ደእያ መሄይነ ዶአይ፥ ሳአ ቦላ ዎፅ ቃፅያ መተꬅ ኡባይነ ሳአን ደእያ አሳ ኡባይ ታ ስንꬃን ኮኮራና። ደረት ኩንዳና፤ አፎት ዎዳና፤ ድርሳ ግምበ ኡባይ ላለታና። 21 ታ ዙማታን ኡባን ጎገ ቦላ ማሽ ደንዳና መላ ኦꬃና፤ ኦላንቾት ባንታ ማሻ ባንታ ቦላ ዛሪድ፥ እሶይ እሱዋ ዎꬋና። ታኒ ኡባ ሃርያ ጎዳይ ሀይሳ ኦዳስ። 22 ታኒ ሀርገንነ ሀይቆን እያ ሴራና፤ ዎልቃማ እራ፥ ሻች፥ ፁግያ ዲነ እያ ቦላ፥ እያ ኦላንቾታ ቦላነ እያራ ደእያ ካዎተꬃታ ቦላ ቡክሳና። 23 ሄሳዳ ኦꬃዳ፥ ታኒ ታ ግታተꬃነ ታ ጌሻተꬃ በሳና። ዳሮ ካዎተꬃታ ታኒ ታናተꬃ ኤርሳና። ታኒ ጎዳ ግደይሳ ኤንቲ ሄ ዎደ ኤራና’ ” ያግስ።