1 ኡባ ሃርያ ጎዳይ ሀይሳዳ ያጌስ፦ “አሳ ናአዉ፥ ጎገ ቦላ ሀይሳዳ ያጋዳ ትንብተ ኦዳ። ሞሳሀነ ቶቤላ አሳስ ዋና ሀላቃ ግድዳ ጎገ፥ ታ ነዉ ሞርከ። 2 ታ ነና ጉየ ዛራና፤ ሃሆ ግድዳ ፑደሀ ባጋ ቢታፈ ጎቻ ከሳዳ፥ እስራኤለ ደረታ ቦላ ነና ኤሀና። 3 ታኒ ነ ሀድርሳ ኩሽያፐ ዶንገታ ባቃ የጋና፥ ነ ኡሻቻ ኩሽያፐ ዶንገ ቶራታ የግሳና። 4 ኔኒ፥ ነ ኦላንቾትነ ኔራ ደእያ ካዎተꬃት ኡባይ እስራኤለ ደርያ ቦላ ኩንድድ አታና። ታኒ ህንተ አሹዋ ካፎታስነ ባዞ ዶአታስ ካꬅ ኦꬃዳ እማና። 5 ታኒ ኡባ ሃርያ ጎዳይ ሄሳ ኦድዳ ግሾ፥ ህንተ ኡባይ ደንባን ኩንድድ አታና። 6 ማጎገ ቢታንነ ዩሾይ አባን ተቀትዳ ቢታታን፥ ህርግ ባይና ኡትዳ አሳ ቦላ ታኒ ኤፅያ ታማ የዳና። ታኒ ጎዳ ግደይሳ ኤንቲ ሄ ዎደ ኤራና። 7 ታ ጌሻ ሱንꬃይ ታ አሳ እስራኤለ ግዶን ኤረታናዳ ኦꬃና። ህዛፐ ጉየ ታ ጌሻ ሱንꬃይ ጫየተና። ካዎተꬃት ታኒ ጎዳ፥ እስራኤለ ጌሻ ግደይሳ ኤራና” ያግስ።

8 ኡባ ሃርያ ጎዳይ ሀይሳዳ ያጌስ፦ “ሄ ጋላሳይ ያና፤ አተና” ያጋዳ ታ ኦድዳ ጋላሳይ ሀይሳ።

9 “ሄ ዎደ እስራኤለ ካታማታን ደእያ አሳይ ከይድ፥ ኦላ ሚሸታ ኡባ ታማን ኤꬃና፤ ሄስካ ጉꬃነ ግታ ጎንዳለታ፥ ዶንገታ፥ ዶንገ ቶራ፥ ቶራታነ ፃምአታ ኡባ ፁጋና። ላፑን ላይꬅ ኩመꬅ ኤንቲ ኤሶ ምꬅ ኦꬅድ ጎኤታና። 10 ኤንቲ ምꬅ ምፃናዉ ዎይኮ ዎራፐ ምꬅ ቃንፃናዉ ኮሸና። ኤንቲ ሺሽዳ ኦላ ሚሸታ ኤሶ ምꬅ ኦꬅድ ጎኤታና። ባንታና ቦንቅዳይሳታ ዛሪድ ቦንቃና፤ ኤንታባ ኤክዳይሳታፐ ኤንቲ ዛሪድ ኤካና” ያጌስ ኡባ ሃርያ ጎዳይ።

11 ሄ ጋላስ ጎገ ሞገትያ በሲ ታኒ እያዉ እስራኤለ ቢታን እማና። ሄ በሳይ አባፈ ዶሎሀ ባጋራ ደእያ ኦገ አሳታ ዛንጋራ ጌተትያ ዛንጋራ ግዶን ግዳና። ጎገይነ እያ ኦላንቾት ኡባይ ያን ሞገትያ ግሾ፥ ኤንታ ዱፎይ ያራ ሄመትያ አሳስ ኦገ ጎርዳና። ሄ በሳይ፥ “ጎገ ኦላንቾታ ዛንጋራ” ጌተትድ ፄገታና።

12 “እስራኤለ አሳይ ቢታ ጌሻናዉ፥ ላፑን አጌና ኩመꬅ አሀ ሞግሸ ጋምአና። 13 ሄ ቢታን ደእያ አሳ ኡባይ አሀ ሞጎን ማደታና፤ ሄሳን፥ ታኒ ታ ቦንቹዋ ቆንጭስያ ዎደ ኤንታዉ ቦንቾ ግዳና” ያጌስ ኡባ ሃርያ ጎዳይ። 14 ላፑን አጌናፐ ጉየ አትዳ አህ ደእኮ፥ ሞጋና መላ አስ ዶረታና፤ ሄ አሳይ ቢታይ ጌያና ጋካናዉ ኡባ ዎደ ቢታ ኡባን ዩይድ አትዳ አሀ ደምድ ሞጎሶና። 15 ኤንቲ ቢታን ዩይሽን፥ አሳ መቀꬅ በንትኮ፥ ሄ መቀꬃ ማታን ማላ ዎꬅድ አꬋና። ሞገይሳት ይድ፥ ጎገ ኦላንቾታ ዛንጋራን ሞጋና። 16 ሄ ካታማ ሱንꬃይ ሀሞና ጌተታና። ኤንቲ ቢታ ዛሪድ ጌሻና። እያ ሄራን፥ “ኦላንቾታ ካታማ” ጌተትድ ፄገትያ ካታም ዳና።

17 ኡባ ሃርያ ጎዳይ ሀይሳዳ ያጌስ፦ “አሳ ናአዉ፥ ካፎ ኮቸነ ሳአ ዶአታስ ሀይሳዳ ያጋዳ ፄጋ። ታ ህንተዉ እስራኤለ ደረታ ቦላ ጊግስዳ ግታ ያርሾ ባለን አሾ ማናዉነ ሱꬁ ኡያናዉ ኡባ በሳፈ ሺቅድ ሃይተ። 18 ህንተ ምኖ አሳታ አሹዋ ማና፤ ቢታ ሀላቃታ ሱꬃ ኡያና። ኤንቲ ህንተዉ ባሳነ ሞꬎ ኡርገ ዶርሳዳ፥ ማራዘዳ፥ ኮለዳነ ቦራ መላ ግዳና። 19 ታኒ ህንተዉ ጊግስዳ ያርሾ ባለን ህንተ ካላና ጋካናዉ፥ ሞꬎ ማና፤ ማꬆታና ጋካናዉ፥ ሱꬁ ኡያና። 20 ታ ህንተዉ ጊግስያ ግብራፐ ፓራታ፥ ፓራ አሳታ፥ ምኖ ቶራ አሳታነ ሀራ ኦላንቾታ ኡባ አሹዋ ህንተ ካላና ጋካናዉ ማና” ያጌስ ኡባ ሃርያ ጎዳይ።

21 “ታኒ ካዎተꬃታ ግዶን ታ ቦንቹዋ ቆንጭሳና። ካዎተꬃት ኡባይ ታ ኤንታ ፕርድዳ ፕርዳነ ታ ኤንታ ቦላ ደንꬅዳ ታ ኩሽያ በአና። 22 ሄ ዎድያፐ ዶምድ፥ እስራኤለ አሳይ ታኒ ጎዳ፥ ኤንታ ፆሳ ግደይሳ ኤራና። 23 እስራኤለ አሳይ ድኤትድ ብዳይ ባንታ ናጋራ ጋሶን፥ ግደይሳ ሀራ ካዎተꬃት ኤራና። ኤንቲ ታዉ አማነቶና እፅዳ ግሾ፥ ታኒ ታ ሶምኡዋ ኤንታፈ ደንꬃዳ፥ ኤንታ ሞርከታስ ኤንታ አꬃዳ እምን፥ ኤንቲ ኡባይ ኦላን ሀይቅዶሶና። 24 ኤንታ ቱናተꬃነ ኤንታ ኢታተꬃ መላ ኤንታዉ በሲያ ሴራ ሴራስ፤ ታ ሶምኡዋ ኤንታፈ ገንꬃስ” ያግስ።

25 ኡባ ሃርያ ጎዳይ ሀይሳዳ ያጌስ። “ሀእ ታኒ ያይቆባ ኮቻታ ድኦፐ ዛራዳ ጋሽትሳና፤ እስራኤለ አሳ ኡባስ ቃታና። ታ ጌሻ ሱንꬃስ ምሸታዳ ጫየቶና መላ ኦꬃና። 26 ኤንታ ያሽያባይ ባይና፥ ባንታ ቢታን ሳሮ ዱሱ ዶምያ ዎደ ካሰ ባንታ ዬላነ ታዉ አማነቶና እፅዳይሳ ዶጋና። 27 ታኒ ኤንታ ካዎተꬃታ ኡባ ግዶፈ ዛራዳ ኤሀና፤ ሞርከታ ቢታፈ ኤንታ ሺሻና። ሄሳዳ ኦꬃዳ፥ ታኒ ጌሽ ግደይሳ ኤንታ ባጋራ ካዎተꬃታ ኡባ በሳና። 28 ኤንቲ ድኤትድ ባና መላ ኦꬅዳይ ታና ግድያ ግሾነ ኤንታ ሺሻዳ፥ ኤንታ ቢታ ዛርዳ ግሾ፥ ታኒ ጎዳ ኤንታ ፆሳ ግደይሳ ኤንቲ ኤራና። ታኒ ኤንታፈ እሱዋካ ካዎተꬃታ ግዶን አግከ። 29 ታኒ ታ አያና እስራኤለ አሳ ቦላ ጉሳና፤ ዛራዳ ታ ሶምኡዋ ኤንታፈ ገንꬅከ” ያጌስ ኡባ ሃርያ ጎዳይ።