1 ኑኒ ድኤትዳ ላታማነ እቻሻንꬆ ላይꬃን፥ የሩሳላመይ ፆነትዳ ታማነ ኦይዳንꬆ ላይꬃን፥ ኮይሮ አጌናን፥ ታማንꬆ ጋላሳን ጎዳ ኩሸይ ታ ቦላ ደኤስ። እ ታና ደንꬅድ የሩሳላመ ኤፍስ። 2 ፆሳይ ታና ቆንጨꬃን እስራኤለ ቢታ ኤፍድ፥ እስ ዙማ ቦላ ኤስስ። ሄ ዙማፐ ዱገሀ ባጋራ ዳሮ ኬꬅ ኬፀትዳ ካታማ ዳንያባ በአስ። 3 እ ታና ያ ኤፍን ታኒ ናሰ ብራታዳ ጶልያ እስ አድያ በአስ። ሄ ኡራይ ሊኖፐ ኦሰትዳ ዎዶሮነ ዋꬋ ፃምአ ኦይክድ፥ ድርሳ ፐንግያ ማታን ኤቅስ። 4 እ ታኮ፥ “አሳ ናአዉ፥ ታ ነና ሀ በሳ ኤህዳይ ታ ነና በሲያባ ኡባ ነ ምንꬃ አኬካና መላሳ። ሄሳ ግሾ፥ ነ አይፍያን ፄላ፤ ነ ሀይꬃን ስአ፤ ነ ዎዛናን ዎꬃ። ነ በእያባ ኡባ እስራኤለ አሳስ ኦዳ” ያግስ።

5 ታኒ ፆሳ ኬꬃ ዩይ አꬍዳ ድርሳ ግምብያ በአስ። ሄ አድያ ኩሸን ኡሱፑን ዋꬋ አዱሰ ግድዳ ፃምእ ደኤስ። እስ አዱሳ ዋꬋይ እስ ዋꬎ ቦላ ኦይዱ ብራታ ጉጃ ግዴስ። ድርሳ ግምብያ ልክያ ዎደ ዳልጋተꬃይ እስ ዋꬋነ ታካꬎ፤ ጎምፓይነ አዱሳተꬃይ ኡሱፑን ዋꬋ።

6 ሄሳፈ ጉየ፥ ዶሎሀ ባጋራ ደእያ ድርሳ ፐንግያኮ ብስ። ደꬃ ከይድ፥ ገልያ ፐንግያ ዋꬍያ ዎደ ኡሱፑን ዋꬋ ግድስ። 7 ያራ አꬍያ ዎደ ኡሻቻራነ ሀድርሳራ ፐንገ ናገይሳት ኤቅያ ሄꬑ ሄꬑ ክፍለት ደኦሶና። እስ እስ ክፍለይ ኡሱፑን ዋꬋ አዱሰነ ኡሱፑን ዋꬋ ዳልጋ። ኤንታ ግዶን ደእያ ጎዳት እቻሹ ዋꬋ ኦርደ። ፐንግያ ናገይሳታ ክፍለታፐ ያ ባጋራ፥ ፆሳ ኬꬃኮ ስምዳ ኡሱፑን ዋꬋ ባራንድ ደኤስ።

8 ሄ ኡራይ ገልያ በሳ ባራንዳ ዋꬍን፥ ሆስፑን ዋꬋ ግድስ። 9 ፆሳ ኬꬃኮ ስምዳ ፐንገይ ዉርሰꬃን ደኤስ። ሄ ባራንዳ ቱቀታ ኦርደተꬃይ ናምኡ ዋꬋ። 10 ዶሎሀ ባጋ ፐንግያን ኡሻቻንነ ሀድርሳ ባጋን እስ ግና ግድዳ ሄꬑ ናጎ ኬꬅ ደኤስ።

11 ሄ ኡራይ ድርሳ ፐንግያ ዋꬍያ ዎደ ዳልጋተꬃይ ታሙ ዋꬋ፥ አዱሳተꬃይ ታማነ ሄꬑ ዋꬋ። 12 እስ እስ ፐንገ ናገይሳታ ክፍልያ ስንꬃን አዱሳተꬃይ እስ ዋꬋ፥ ዳልጋተꬃይ እስ ዋꬋ ግድዳ ጎድ ደኤስ፤ ናገይሳታ ክፍለት ናምኡ ባጋራ ኡሱፑን ኡሱፑን ዋꬋ።

13 ሀፍንꬃን ደእያ ናገይሳታ ክፍለት ጉየ ባጋፈ ሄፍንꬃን ደእያ ናገይሳታ ክፍለታ ጉየ ባጋ ጋካናዉ ደእያ በሳይ ላታማነ እቻሹ ዋꬋ ግድስ። 14 ሄ ኡራይ ዳባባ ስንꬃን ደእያ ዉርሰꬃ ክፍልያ ዋꬍን፥ ላታሙ ዋꬋ ግድስ። 15 ፐንግያ ገልያ በሳፈ ብድ፥ ዉርሰꬃን ደእያ እያ ባራንዳ ጋካናዉ ደእያ ፐንግያ አዱሳተꬃይ እሻታሙ ዋꬋ። 16 ክፍለታ ኡባስ ካረ ባጋ ስምዳ ጉꬃ ማስኮተት ደኦሶና፤ ክፍለታፐ ግዶን ደእያ ጎዳታስ ማስኮተት ደኦሶና። ያነ ሃነ ሻክያ ጎዳታ ቦላ ዛምባ ምስለይ ደኤስ።

17 ሄ ኡራይ ታና ካረ ዳባባኮ ኤፍስ። ያን ታኒ ዳባባ ዩሾን ደእያ ሹች ሂፀትዳ ባሱዋነ ሄ ባሱዋ ኬፀትዳ ሀስታሙ ክፍለታ በአስ። 18 ሹቻይ ሂፀትዳ ባሶይ ዳባባ ዩሾ ኡባ ጋክስ፤ ካረ ዳባባይ ግዶ ዳባባፐ ዝቄስ። 19 ግዶ ዳባባ ጋꬅያ፥ ꬎቃን ኦሰትዳ፥ ድርሳ ፐንገይ ደኤስ። ሄ ኡራይ ናምኡ ፐንገታፐ ግዶን ደእያ በሳ ዋꬍን፥ ጎምፓይ ዉሎሀ ባጋ ፄቱ ዋꬋ ዶሎሀ ባጋይ ፄቱ ዋꬋ ግድስ።

20 ሄ ኡራይ ታና ቆሞ ባጋ ኤፍድ፥ ካረ ባጋ ዳባባ ስንꬃን ደእያ ድርሳ ፐንግያ ዋꬍስ። 21 ዉሎሀፐ ኡሻቻንነ ሀድርሳ ባጋራ ደእያ ሄꬑ ናገይሳታ ክፍለት፥ ኤንታፈ ግዶን ደእያ ጎዳትነ እያ ባራንዳይ ኮይሮ ዶሎሀ ፐንግያ ባጋን ዋꬍን እስ ግና ግድዶሶና። ድርሳ ፐንገ አዱሳተꬃይ እቻሹ ዋꬋ፤ ዳልጋተꬃይ ላታማነ እቻሹ ዋꬋ። 22 ባራንዳይ፥ ማስኮተትነ ዛምባ ምስለይ ካሰ ዶሎሀ ፐንግያ ባጋን በእዳይሳዳ እስ ግና። ያ ጋꬅያ ላፑን ደꬃት ደኦሶና። ባራንዳይ ዳባባ ስንꬃ ባጋራ ደኤስ። 23 ዶሎሀ ባጋን፥ ቆሞ ባጋ ግዶ ዳባባስ ሀራ ፐንገይ ደኤስ። ሄ ኡራይ ሀ ናምኡ ድርሳ ፐንገታፐ ግዶን ደእያ በሳ ዋꬍን፥ ፄቱ ዋꬋ ግድስ።

24 ሄ ኡራይ ታና ጋርሳ ባጋ ድርሳ ፐንግያኮ ካለꬅን፥ ያን ሀራ ድርሳ ፐንገ በአስ። እ ቱቀታነ ግዶ ክፍለታ ዋꬍያ ዎደ ሀራታራ ግና ግድስ። 25 ሄ ድርሳ ፐንግያ ማታን ደእያ ክፍለታ ኡባስ ማስኮተት ደኦሶና። ድርሳ ፐንግያ አዱሳተꬃይ እሻታሙ ዋꬋ፤ ዳልጋተꬃይ ላታማነ እቻሹ ዋꬋ። 26 ያ ጋꬅያ ላፑን ደꬃት ደኦሶና። ባራንዳይ ዳባባ ስንꬃን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። 27 ግዶ ዳባባስ ሀራ ፐንገይ ደኤስ። ሄ ኡራይ ሀ ናምኡ ድርሳ ፐንገታፐ ግዶን ደእያ በሳ ዋꬍን፥ ፄቱ ዋꬋ ግድስ።

28 ሄ ኡራይ ታና ጋርሳ ድርሳ ፐንግያ ባጋራ ግዶ ዳባባኮ ኤፍስ። እ ድርሳ ፐንግያ ዋꬍን፥ ሀራ ፐንገታራ ግና ግድስ። 29 ናገይሳታ ክፍለት፥ ጎዳትነ ባራንዳት ኡባይ ሀራ ድርሳ ፐንገታራ እስ ግና። ሄ ድርሳ ፐንግያ ዩሾን ደእያ ክፍለታ ኡባስ ማስኮተት ደኦሶና። ሀ ፐንግያ አዱሳተꬃይ እሻታሙ ዋꬋ፤ ጎምፓይ ላታማነ እቻሹ ዋꬋ። 30 ሄ ድርሳ ፐንገይ ዩሹዋን ባራንዳት ደኦሶና፤ ኤንታ አዱሳተꬃይ ላታማነ እቻሹ ዋꬋ፤ ጎምፓይ እቻሹ ዋꬋ። 31 ሄ ባራንዳት ካረ ባጋ ዳባባ ስንꬃን ደኦሶና። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋꬅያ ሆስፑን ደꬃት ደኦሶና።

32 ሄ ኡራይ ታና ዶሎሀ ባጋ ድርሳ ፐንግያራ ግዶ ዳባባኮ ኤፍስ። እ ሄ ድርሳ ፐንግያ ዋꬍን፥ ሀራ ፐንገታራ ግና ግድስ። 33 ናገይሳታ ክፍለት፥ ጎዳትነ ባራንዳይ ሀንኮ ድርሳ ፐንገታራ እስ ግና። ሄ ድርሳ ፐንግያ ዩሾን ደእያ ክፍለታ ኡባስ ማስኮተት ደኦሶና። ሄ ፐንግያ አዱሳተꬃይ እሻታሙ ዋꬋ፤ ጎምፓይ ላታማነ እቻሹ ዋꬋ። 34 ባራንዳይ ካረ ባጋ ዳባባ ስንꬃን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋꬅያ ሆስፑን ደꬃት ደኦሶና።

35 ሄ ኡራይ ታና ፑደሀ ባጋ ድርሳ ፐንግያኮ ኤፍስ። እ ሄ ድርሳ ፐንግያ ዋꬍን፥ ሀንኮ ፐንገታራ እስ ግና ግድስ። 36 ናገይሳታ ክፍለት፥ ጎዳትነ ባራንዳይ ሀንኮ ድርሳ ፐንገታራ እስ ግና። ሄ ድርሳ ፐንግያ ዩሾን ማስኮተት ደኦሶና። ሄ ፐንግያ አዱሳተꬃይ እሻታሙ ዋꬋ፤ ጎምፓይ ላታማነ እቻሹ ዋꬋ። 37 ባራንዳይ ካረ ባጋ ዳባባ ስንꬃን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋꬅያ ሆስፑን ደꬃት ደኦሶና።

38 ካረ ዳባባ ቆሞ ባጋራ፥ ግዶ ድርሳ ፐንግያ ባራንዳራ ኦይከትድ፥ ሀራ ክፍለይ ደኤስ። ፁሳ ያርሾ ኤህያ መሄ አሾይ ሜጨተይ ሄ ክፍልያና። 39 ሄ ባራንዳን ሀ ባጋራ ናምኡ ፃርጴዛት፥ ያ ባጋራ ናምኡ ፃርጴዛት ደኦሶና፤ ፁሳ ያርሾስ፥ ናጋራ ያርሾስነ ናቆ ያርሾስ መሄ ኡባይ ሹከትያ ሄ ፃርጴዛታ ቦላና። 40 ባራንዳፈ ካረ ባጋራ ቆሞ ድርሳ ፐንግያ ማታን ናምኡ ፃርጴዛት ሀ ባጋራ፥ ናምኡ ፃርጴዛት ያ ባጋራ ደኦሶና። 41 ሄሳ ግሾ፥ ያርሾስ ሺቅዳ መሄይ ሹከትያ ሆስፑን ፃርጴዛት ደኦሶና፤ ኤንታፈ ኦይዳት ባራንዳን ደኦሶና፤ ኦይዳት ካረ ዳባባን ደኦሶና። 42 ፁሳ ያርሾ ዎꬃናዉ ጊግስዳ፥ ሹቻፈ ማሰትድ ኦሰትዳ ኦይዱ ፃርጴዛት ደኦሶና። ኤንታዉ አዱሳተꬃይ እስ ዋꬋነ ታካꬎ፤ እስ ዋꬋነ ታካꬎ፤ ዳልጋተꬃይ እስ ዋꬋነ ታካꬎ። ፁሳ ያርሾነ ሀራ ያርሾ ኡባ ሹክያ ሚሸት ሄ ፃርጴዛታ ቦላ ኡቶሶና። 43 ኦይዱ ብራ አዱቅያ ካቆታ ጎዳ ቦላ ዩይ አꬍድ ꬍሸትድ ኡትዶሶና። ያርሾስ ሺሽያ አሾ ኡባይ ሄ ፃርጴዛታ ቦላ ኡቴስ።

44 ሄ ኡራይ ታና ግዶ ዳባባ ገልስስ። ያን ፐንገት ግዶ ዳባባኮ ዶየትያ ናምኡ ክፍለት ደኦሶና። ኤንታፈ እስ ክፍለይ ቆሞ ድርሳ ፐንግያ ማታራ ጋርሳ ባጋ ስምስ፤ ናምአንꬆይ ጋርሳ ድርሳ ፐንግያ ማታራ ቆሞ ባጋ ስምስ። 45 ሄ ኡራይ፥ “ዱገሀ ባጋ ስምዳ ክፍለይ ፆሳ ኬꬃን ኦꬅያ ካህነታባ። 46 ቆሞ ባጋ ስምዳ ክፍለይ ያርሾ በሳን ኦꬅያ ካህነታባ። ካህነት ኡባይ ሳዶቃ ያራፐ የለትዳ ሌወታ፤ ጎዳ ስንꬃን ኤቅድ ኦꬃናዉ በሰይሳት ሀይሳታ ፃላላ” ያግስ።

47 ሄ ኡራይ ዳባባ ዋꬍን፥ አዱሳተꬃይ ፄቱ ዋꬋ፥ ዳልጋተꬃይ ፄቱ ዋꬋ ግድስ። ዳባባን ፆሳ ኬꬃፈ ስንꬃ ባጋራ እስ ያርሾ በሲ ደኤስ። 48 እ ታና ፆሳ ኬꬃ ባራንዳኮ ኤፍስ። ባራንዳ ገልያ በሳን ኤቅዳ ጎባነታ ዋꬍን፥ አዱሳተꬃይ እቻሹ ዋꬋ፤ ዳልጋተꬃይ ታማነ ኦይዱ ዋꬋ። ሀድርሳራነ ኡሻቻራ ደእያ ጎዳታ ኦርደተꬃይ ሄꬑ ዋꬋ ግድስ። 49 ባራንዳ አዱሳተꬃይ ላታሙ ዋꬋ፤ ጎምፓይ ታሙ ዋꬋ። ያ ጋꬅያ ታሙ ደꬃት ደኦሶና። ገልያ በሳን ኡሻቻራነ ሀድርሳራ ኤቅዳ ናምኡ ቱቀት ደኦሶና።