1 ሄሳፈ ጉየ፥ ሄ ኡራይ ታና ፆሳ ኬꬃን ደእያ ጌሻ በሳ ገልስስ። ሄ ጌሻ በሳ ግዶራ አꬅያ ኦግያ ልክን ኡሱፑን ዋꬋ ግድስ። 2 ጎምፓይ ታሙ ዋꬋ ግድስ። ሀድርሳራነ ኡሻቻራ ደእያ ጎዳታ ጎምፓይ እቻሹ ዋꬋ። እ ጌሻ በሳ ዋꬍን አዱሳተꬃይ ኦይታሙ ዋꬋ፥ ጎምፓይ ላታሙ ዋꬋ ግድስ።

3 ሄሳፈ ጉየ፥ ቆልአ ገልስ። ቆልአ ገልያ ኦግያ ዋꬍን፥ ናምኡ ዋꬋ ግድስ፤ ጎምፓይ ኡሱፑን ዋꬋ ግድስ፤ ሀድርሳራነ ኡሻቻራ ደእያ ጎዳታ ጎምፓይ ላፑን ዋꬋ ግድስ። 4 እ ቆልአ ዋꬍን፥ አዱሳተꬃይ ላታሙ ዋꬋ፥ ዳልጋተꬃይ ላታሙ ዋꬋ ግድስ። ሄሳፈ ጉየ፥ “ሀይስ ኡባፈ ጌሻ በሳ” ያግስ።

5 ሄ ኡራይ ፆሳ ኬꬃ ጎዳ ዋꬍን፥ ኦርደተꬃይ ኡሱፑን ዋꬋ ግድስ። ሄ ጎዳራ ኦይከትድ፥ ፆሳ ኬꬃ ግዶ ባጋ ዩሹዋን ኬፀትዳ ኦይዱ ኦይዱ ዋꬋ ዳልግያ ዳሮ ክፍለት ደኦሶና። 6 ሄ ክፍለት እሶይ እሱዋ ቦላ ኬፀትዳ ሄꬑ ፖቀ ግድን፥ እስ እስ ፖቅያ ቦላ ሀስታሙ ክፍለት ደኦሶና። ግምብያ ዩሾን ደእያ ክፍለታ ቶክያ ቱቀት ደኦሶና። ሽን ሄ ቱቀት ግምብያ ግዶ ኩመꬅ ገልቦኮና። 7 ፆሳ ኬꬃ ዩሾን ደእያ ክፍለታ ዳልጋተꬃይ ፖቀይ ጉጅያ ዎደ ጉጄስ። ፆሳ ኬꬃ ዩሾን ደእያ ኬꬃ ኦሶይ ጋርሳፈ ፑደ ዳልግሸ ብያ ግሾ ኬꬃይ ፑደ ጉዠትዳ ዎደ ኡባን ክፍለታ ዳልጋተꬃይ ጉጅሸ ቤስ። ግዶ ፖቅያራ ካንꬅድ፥ ቆሞ ዉርሰꬃ ፖቅያ ጋካናዉ ኤፍያ ደꬃት ደኦሶና።

8 ፆሳ ኬꬃ ዩሾን ꬎቁ ግዳ ባሶይ ደኤይሳ በአስ። እያ ዩሹዋን ደእያ ክፍለት ሄ ባሱዋ ቦላ ኬፀትዶሶና፤ ሄ ባሶይ ግዶ ዳባባፐ ኡሱፑን ዋꬋ ꬎቄስ። 9 ሄ ክፍለታ ካረ ባጋ ጎዳ ኦርደተꬃይ እቻሹ ዋꬋ። ካይሳ በሳይ ፆሳ ኬꬃፈነ፥ 10 ካህነታ ክፍልያፐ ግዶን ደኤስ፤ እያ ኦርደተꬃይ ላታሙ ዋꬋ። 11 ካይሳ በሳፈ ኡሻቻንነ ሀድርሳ ባጋን ደእያ ክፍለታ ገልስያ ፐንገት ደኦሶና። ሄ ፐንገት እሶይ ቆሞ ባጋራ፥ እሶይ ቃስ ጋርሳ ባጋራ ደኤስ። ካይሳ በሳ ዩሹዋ ጋሰꬅያ ባሱዋ ዳልጋተꬃይ እቻሹ ዋꬋ።

12 ፆሳ ኬꬃፈ ዉሎሀ ባጋራ ደእያ ካይሳ በሳፈ ስንꬃ ባጋራ እስ ኬꬅ ደኤስ። ሄ ኬꬃ አዱሳተꬃይ ኡዱፉን ታሙ ዋꬋ፤ ጎምፓይ ላፑን ታሙ ዋꬋ። ሄ ኬꬃ ጎዳ ኦርደተꬃይ እቻሹ ዋꬋ።

13 ሄ ኡራይ ፆሳ ኬꬃ ካረ ባጋ ዋꬍን፥ አዱሳተꬃይ ፄቱ ዋꬋ። ፆሳ ኬꬃፈ ጉየ ባጋራ ደእያ ካይሳ በሳ ካንꬅድ ዉሎሀ ባጋ ኬꬃ ጋካናዉ ደእያ በሳ ዋꬍን ፄቱ ዋꬋ ግድስ። 14 ዶሎሀ ባጋራ ደእያ ፆሳ ኬꬃ ጎምፓይ ናምኡ ካይሳ በሳታ ጉጅድ ዋꬍን ፄቱ ዋꬋ ግድስ። 15 ናምኡ ባጋራ ደእያ አꬍያ በሳታ ጉጅድ፥ ዉሎሀ ባጋራ ደእያ ኬꬃ አዱሳተꬃ ዋꬍን፥ ፄቱ ዋꬋ ግድስ።

ፆሳ ኬꬃ ጌሻ በሳይ፥ እያ ቆልአይነ እያ ባራንዳይ 16 ዉይገፐ ብድ፥ ማስኮተታ ጋካናዉ ደእያ በሳይ ምꬃን ልጨትድ ኡትስ፤ ማስኮተትካ ምꬃን ልጨትድ ኡትዶሶና። 17 ፆሳ ኬꬃ ሶ ባጋ ክፍለታ ጎዳይ፥ ፐንገታፐ ቦላ አꬋና ጋካናዉ አሌቀትድ ኡትስ። 18 ክፍለታ ዩሾን፥ ዛምባ ምꬃንነ ክሩበታ ምስለይ አሌቀትስ። ሄ ዛምባ ምꬃ ምስለት አሌቀትዳይ ናምኡ ክሩበታፐ ግዶና። ክሩበታስ ናምኡ ናምኡ ሶምኦይ ደኤስ። 19 እስ ባጋራ አሳ ሶምኦ ዳንያ ሶምኦይ ዛምባ ምስልያ ፄሌስ፤ ሀንኮ ባጋራ ጋሞ ሶምኦ ዳንያ ሶምኦይ ዛምባ ምስልያ ፄሌስ። 20 ጌሻ በሲ ዉይገፐ ብድ፥ ፐንገታፐ ቦላ ባጋን ደእያ በሳ ጋካናዉ፥ ጎዳ ዩሾ ኡባይ ሄሳዳ አሌቀትስ። 21 ፆሳ ኬꬃ ፐንገ ፃንገት ኡባይ ኦይዱ ማዛነይ ደእያ ኡባይ እስ ልከ።

ኡባፈ ጌሻ በሳ ገልያ በሳ ስንꬃን 22 ምꬃፈ ኦሰትዳ ያርሾ በሲ ዳንያ በሲ በንቴስ። እካ ኦይዱ ማዛነይ ግድድ፥ ዳልጋተꬃይነ አዱሳተꬃይ እስ ግና፤ እሶይ እሶይ ናምኡ ዋꬋ፤ አዱሳተꬃይ ሄꬑ ዋꬋ። ማዛነታ ቱሳት፥ ባሶትነ ምየ ባጋን ደእያ ሳንቃት ኡባይ ምꬃፈ ኦሰትዶሶና። ሄ ኡራይ ታኮ፥ “ሀይስ ጎዳ ስንꬃን ደእያ ፃርጴዛ” ያግስ።

23 ጌሻ በሳ ገልስያ እስ ፐንገይ ደኤስ፤ ኡባፈ ጌሻ በሳ ገልስያ እስ ፐንገይ ደኤስ። 24 እስ እስ ፐንግያስ ግዶን ዳኮትድ ዶየትያ ናምኡ ሳንቃት ደኦሶና። 25 ጎዳታ ቦላ መትዳይሳዳ ጌሻ በሳ ፐንገታ ሳንቃታ ቦላ ክሩበታነ ዛምባታ ምስለይ መትድ ኡትስ። ጋꬅ ገልያ ክፍልያ ስንꬃን፥ ካረ ባጋራ ምꬃፈ ኦሰትዳ ካም ደኤስ። 26 ሄ ክፍልያ ገልያ ጎዳታ ምየን ማስኮተት ደኦሶና። ጎዳት ዛምባ ምስለን አሌቀትዶሶና። ሄ ክፍልያ ገልያ ኡሻቻንነ ሀድርሳን ደእያ ክፍለታ ደꬃ ባጋራ ካምያ ካር ደኤስ።