1 ሄሳፈ ጉየ፥ ሄ ኡራይ ታና ፑደሀ ባጋ ፐንግያራ ካረ ዳባባኮ ካለꬅድ ፆሳ ኬꬃ ግዶ ዳባባ ግምብያራ ኦይከትዳ ኬꬃኮ ታና ኤህስ። 2 ሄ ኬꬃ ዉላይ ፑደሀ ባጋ ስምስ። ሀ ኬꬃይ ፄቱ ዋꬋ አዱሰነ እሻታሙ ዋꬋ ዳልጋ። 3 ግዶ ዳባባፐ ላታሙ ዋꬋ ሃክድ፥ ቃስ ስንꬃ ባጋራ ካረ ዳባባን ደእያ ሂፀትዳ ሹቻፈ ስንꬃ ባጋራ ዎልኮ ስምዳ ሄꬑ ደꬅ ደእያ ፖቀይ ደኤስ። 4 ሄ ክፍለታ ፐንገት ፑደ ፄሎሶና። ኤንታፈ ስንꬃ ባጋራ ታሙ ዋꬋ ዳልጋነ ፄቱ ዋꬋ አዱሰ ግድዳ ግዶራ አꬅያ ኦገይ ደኤስ። 5 ሄ ኬꬃስ ቦላ ሄꬓንꬆ ፖቀይ ናምአንꬆ ፖቅያፐ ፁሜስ፤ ናምአንꬆይ ኮይሩዋፐ ፁሜስ። ሄስ ሀንዳይ ኤንቲ እሶይ እሱዋፈ ጉየ ሺቅድ ግምበትዳ ግሾሳ። 6 ሄ ፖቅያስ ቦላ ባጋ ክፍለት ግዶ ክፍለታፐነ ጋርሳ ባጋ ክፍለታፐ ፁምያ ግሾ፥ ካረ ዳባባን ደእያ ሀራ ኬꬃታዳ ኤንታዉ ቱስ ባዋ። 7 ሄ ክፍለታፐ ስንꬃ ባጋራ እሻታሙ ዋꬋ አዱቅያ ካረ ዳባባ ባጋራ ደእያ እስ ግምበይ ደኤስ። 8 ካረ ዳባባ ባጋራ ደእያ ክፍለታ አዱሳተꬃይ እሻታሙ ዋꬋ ግድሽን፥ ፆሳ ኬꬃ ስንꬃን ደእያ ክፍለታ አዱሳተꬃይ ፄቱ ዋꬋ። 9 ካረ ዳባባፐ ጋꬅ ገልያ ዎደ ዶሎሀ ባጋራ ጋርሳ ክፍለታ ገልያ ፐንገይ ደኤስ።

10 ዱገሀ ባጋራ ካረ ዳባባ ካልድ ፆሳ ኬꬃ ዳባባራ ኦይከትድ ኬፀትዳ ካረ ዳባባኮ ስምዳ ክፍለይ ደኤስ። 11 ሄ ኬꬃ ክፍለታ ስንꬃን ኦገይ ደኤስ። ሄ ኬꬃይ ቆሞ ባጋን ደእያ ኬꬃራ እስ ግና፤ አዱሳተꬃይ፥ ዳልጋተꬃይ፥ ክፍለትነ ፐንገት ኡባይ እስ ግና። 12 ድርሳ ግምበይ ዉርያ ዶሎሀ ባጋ ጋፃ ዶምድ ግምብያስ ዱገሀ ባጋራ ደእያ ክፍለታ ገልያ ፐንገይ ደኤስ።

13 ሄ ኡራይ ታኮ፥ “ፆሳ ኬꬃ ዳባባ ስንꬃን፥ ፑደሀ ባጋንነ ዱገሀ ባጋን ደእያ ክፍለት ካህነታሳ። ሄ ክፍለታ ግዶን ጎዳ ስንꬃን ኦꬅያ ካህነት ኡባፈ ጌሻ ካꬃ ማና። ሄ ክፍለት ጌሽ ግድያ ግሾ፥ ኡባፈ ጌሻ እሞታ፥ ሄስካ ካꬃ ያርሾ፥ ናጋራ ያርሾነ ናቆ ያርሾ ኤንቲ ያን ዎꬃና። 14 ካህነት እስ ቶሆ ኡባፈ ጌሻ በሳ ገልዳፐ ጉየ፥ ፆሳስ ኦꬅያ ዎደ ማእያ ማኦት ጌሽ ግድያ ግሾ፥ ባንታ ኦሶ ማኡዋ ላሞናሽን ካረ ዳባባ ከያናዉ ዳንዳኦኮና። ኤንቲ አሳኮ ካረ ከይሸ ካሰ ማእያ ሀራ ማኦታ ማእድ ከያናዉ ኮሼስ” ያግስ።

15 ሄ ኡራይ ፆሳ ኬꬃ ጋꬃ ባጋ ዋꬍድ ዉርስዳፐ ጉየ ዶሎሀ ባጋ ድርሳ ፐንግያራ ታና ካረ ከስድ፥ ፆሳ ኬꬃ ካረ ባጋ ዩሹዋ ኡባ ዋꬍስ። 16 ዋꬋ ፃምአ ኤክድ፥ ዶሎሀ ባጋ ዋꬍን፥ እቻሹ ፄቱ ዋꬋ ግድስ። 17 ፑደሀ ባጋ ሄ ፃምአን ዋꬍን፥ እቻሹ ፄቱ ዋꬋ ግድስ። 18 ዱገሀ ባጋ ዋꬍን፥ እቻሹ ፄቱ ዋꬋ ግድስ። 19 ዉሎሀ ባጋ ዋꬍን፥ እቻሹ ፄቱ ዋꬋ ግድስ። 20 ሄሳዳ ኦꬅድ፥ እ ኦይዱ ባጋ ኡባ ዋꬍስ። እያ ዩሹዋን እቻሹ ፄቱ ዋꬋ አዱቅያ፥ ቃስ እቻሹ ፄቱ ዋꬋ ዳልግያ ድርሳ ግምበይ ደኤስ። ሄ ግምበይ ጌሻ በሳነ ጮ በሳ ሻካናሳ።