1 ይሁዳስነ ብንያመስ ሞርከ ግድዳ አሳይ፥ ድኦፐ ስምዳይሳት ጎዳስ፥ እስራኤለ ፆሳስ ኬ ኬፀይሳ ስእዶሶና። 2 ዛሩባበላኮነ እስራኤለ ያራ ሀላቃታኮ ይድ፥ “አሶረ ካዎይ አስራዶን ኑና ሀ በሳ ኤህዳ ጋላሳፐ ዶምድ፥ ኑካ ህንተ ፆሳ ጎይኖስ፥ እያዉ ያርሾስ። ሄሳ ግሾ፥ ኑካ ህንተራ ኬፃና” ያግዶሶና።

3 ሽን ዛሩባበል፥ እያሱይነ እስራኤለ ያራ ሀላቃት፥ “ኑ ፆሳ ኬꬃ ኬፃናዉ ኑስነ ህንተዉ ግሾይ ባዋ። ሽን ፋርሰ ካዎይ ቅሮስ ኪትዳይሳዳ ጎዳ፥ እስራኤለ ፆሳ ኬꬃ ኑኒ ኑ ፃላላ ኬፃና” ያግዶሶና።

4 ሄሳፈ ጉየ፥ ሄ ቢታን ደእያ አሳይ፥ ይሁዳ አሳይ ፆሳ ኬꬃ ኬፆና መላ ኡፋይስ ቃንፅሳናዉነ ያሽሳናዉ ደንድዶሶና። 5 ፋርሰ ካዋ ቅሮሳ ላይꬃፈ ብድ ዳርዮሳ ካዎተꬃ ጋካናዉ ኤንቲ ይሁዳ አሳ ዞረታ ላላና መላ አሰ ሻምዶሶና።

6 አርፀክስስ ካዎትዳ ዎደ ይሁዳነ የሩሳላመ አሳ ሞታናዉ ፓይለ ዶይዶሶና።

7 አርፀክስሳ ካዎተꬃ ላይꬃን፥ ብሽላም፥ ምትርዳት፥ ፃቤልነ ኤንታ ባጋ ግድድ፥ ፋርሰ ካዋ አርፀክስሳስ ዳብዳበ ፃፍዶሶና፤ ሄ ዳብዳበይ አራምከ ፕዳለንነ ዶናን ፃፈትስ።

8 ቢታ አይስያ ረሁምነ ፃፈይ ስምሳይ የሩሳላመባ ሀይሳዳ ያግድ፥ ካዋ አርፀክስሳስ ዳብዳበ ፃፍዶሶና፤ 9 “ሀ ዳብዳበይ ቢታ አይስያ ረሁማፐ፥ ፃፍያ ስምሳያፐ፥ በተራፕለሳፐ፥ ፋርሰፐ፥ አርካፈ፥ ባብሎነፐ ሱሳፐነ ኤላማ ቢታን ደእያ ዳይናታፐነ ቢታ አይሰይሳፈ፥ 10 ቃስ ግታነ ቦንቸትዳ ካዋ አስናፋር ድእድ ሳማረንነ ኤፍራፂሳ ሻፋፐ ሄፍንꬃን ዎꬅዳ አሳ ኡባፈ ፃፈትስ” ያግዶሶና።

11 ኤንታ ዳብዳበይ ሀይሳዳ ያጌስ፤ “ካዋ አርፀክስሳስ፥ ኤፍራፂሳ ሻፋፐ ሄፍንꬃን ደእያ ነ ሞርናታፐ የደትዳ ዳብዳበ።

12 “ካዋዉ፥ ነ ማታፐ ኑኮ ይዳ አይሁደት የሩሳላመ ይድ፥ ሀ ማካላነ ኢታ ካታምዉ ዛሪድ ኬፆ ቦላ ደኤይሳ ኤራ። እ ግምበ ድርሳ ኦራꬆሶና፤ እ ባሱዋ የጎሶና፤ እ ፃጱዋ ምንꬆሶና። 13 ሄሳ ቦላ ቃስ፥ ሀ ካታምያ ኬፀትኮነ እ ድርሳ ግምበይ ኦራፅኮ ኤንቲ ጊራነ ቃራፃ ቃንፆናይሳ ኤራ፤ ካዎ ኬꬅ ገልያ ሚሸይ ጉፃናይሳ አኬካ። 14 ኑኒ ካዎይ ሹምን ኦይሳታ ግድያ ግሾነ ካዎይ ካዉይሽን በአናዉ ኮዮና ግሾ ሀይሳ ነ ኤራና መላ ግድ ኦዶስ። 15 ሄሳ ግሾ፥ ካሰ ነ አዋታ ታርከ ማፃፋይ ኮየትድ ፄለቶ፤ ሄ ፃፈትዳባፐ ሀ ካታምያ ማካላነ ካዎታስነ ቢታታስ መቶ መꬋሸ ደእዳይሳ ኤራናዉ ዳንዳኣሳ፤ ሄሳ ጋሶን እያ ላለታሱ። 16 ሀ ካታምያ ኬፀትያነ እ ድርሳ ግምበይ ኦራፅያባ ግድኮ፥ ኤፍራፂሳ ሻፋፐ ሄፍንꬃን ደእያ ቢታይ ነ ኩሸፐ ከይዳይሳ ኤራ” ያግዶሶና።

17 ካዎይ ሀይሳዳ ግያ ዛሮ ኤንታዉ የድስ፤ “ቢታ አይስያ ረሁማ፥ ፃፍያ ስምሳያ፥ ሳማረንነ ኤፍራፂሳ ሻፋፐ ሄፍንꬃን ደእያ ኤንታራ እስፍዳ አሳ ሳሮ ጋይስ። 18 ህንተ ታዉ የድዳ ዳብዳበይ ብርሸትድ ናባበትን ስአስ። 19 ታ ኪታን፥ ካሰ ታርከይ ኮየትድ ፄለትያ ዎደ፥ ሀ ካታምያ በንፐካ ካዎታስ ማካላነ መቶ መꬋሸ ደእያ ቢታ ግደይስ ኤረትስ። 20 የሩሳላመን ዎልቃማ ካዎት ካዎትዶሶና፤ ኤፍራፂሳ ሻፋፐ ሄፍንꬃን ደእያ ቢታፈካ ሄ ካዎት ጊራነ ቃራፃ ኤክዶሶና። 21 ሄሳ ግሾ፥ ታኒ ኤንታዉ ሀ ኪታ እማና ጋካናዉ፥ ሀ አሳት ሄ ካታምዉ ኬፀይሳ ኤሳና መላ ኦድተ። 22 ህንተ ሀ ኦዳ ቀል ጎና መላ ናገትተ፤ ካዎታስ መቶ ዳርሳናዉ ኮሸና” ያግድ ኪትስ።

23 ካዋ አርፀክስሳ ዳብዳበይ ረሁማስ፥ ፃፍያ ስምሳያስነ ኤንታራ ደእያ ኡባስ ናባበትዳ ዎደ የሩሳላመን ደእያ አይሁደታኮ ኤለስ ብድ፥ ኤንቲ ኬፀይሳ ዎልቃን ኤስዶሶና።

24 ሄ ዎደፐ ዶምድ የሩሳላመን ደእያ ፆሳ ኬꬃ ኦሶይ ዳርዮስ ካዎትዳ ናምአንꬆ ላይꬅ ጋካናዉ ኤቅስ።