1 ሄ ዎደ ናምኡ ናበት ሀገይነ ዛካርያስ ይሁዳንነ የሩሳላመን ደእያ አይሁደ አሳስ እስራኤለ ፆሳ ሱንꬃን ትንብተ ኦድዶሶና። 2 ሳላትያላ ናአይ ዛሩባበልነ እዮሳደቃ ናአይ እያሱይ ደንድድ፥ የሩሳላመን ደእያ ጎዳ ኬꬃ ዛሪድ ኬፃናዉ ዶምዶሶና። ፆሳ ናበትካ ኤንታ ማድሸ ኤንታራ ደእዶሶና።

3 ሄ ዎደ ኤፍራፂሳ ሻፋፐ ሄፍንꬃን ደእያ ቢታ አይስያ ታንታን፥ ሳታርቡዛንነ ኤንታራ ደኤይሳት የሩሳላመ ይድ፥ “ሀ ኬꬃ ህንተ ኬፃና ማላ ህንተዉ ማታ እምዳይ ኦኔ?” ያግድ ኦይችዶሶና። 4 ቃስ፥ “ሀ ኬꬃ ኬፅያ አሳታ ሱንꬃይ ኦኔ?” ያግድ ኦይችዶሶና። 5 ሽን ፆሳ አይፈይ ይሁዳ ጭማታ ቦላ ደእያ ግሾ፥ ሀ ኦዳይ ዳርዮሳኮ ጋክን፥ ዳብዳበይ ያና ጋካናዉ ኤንታ ኦንካ ኦሶ ድግበና።

6 ኤፍራፂሳ ሻፋፐ ሄፍንꬃ ቢታ አይስያ ታንታናያ፥ ሳታርቡዛንነ ኤንታራ ኦꬅያ ካዋ ዳርዮሳስ ፃፍዳ ዳብዳበይ ሀይሳ። 7 ኤንቲ እያዉ የድዳ ዳብዳበይ ሀይሳዳ ያግድ ናባበቴስ።

ካዋ ዳርዮሳ፥ ሳሮይ ነዉ ግዶ።

8 ኑኒ ይሁዳ ቢታን ደእያ ግታ ፆሳ ኬꬃ ብድ በእዳይሳ ካዎይ ኤሮ። ሄ ፆሳ ኬꬃይ ግታ ሹቻን ኬፀትስ፤ ግምበ ቱሳት ከይዶሶና፤ ኦሶይካ ግታ አኬካንነ ኤሶን ኦሰትሸ ደኤስ።

9 “ኑኒ፥ ሀ ኬꬃ ኬፃና ማላ ህንተዉ ማታ እምዳይ ኦኔ?” ያግድ ጭማታ ኦይችዳ። 10 ቃስ ኤንታና ካለꬅያ አሳታ ሱንꬃይ ኦነኮ ፃፍድ ነና ኤርሳናዉ ኤንታ ኦይችዳ።

11 ኤንቲ ሀይሳዳ ያግድ ዛርዶሶና፦

“ኑኒ ሳሎነ ሳአ ፆሳ አይለታ፤ ኑኒ ዳሮ ላይꬃፈ ካሰ ግታ እስራኤለ ካዎይ ኬፅድ ፖልዳ ኬꬃ ዛሪድ ኬፆስ። 12 ኑ አዋት ሳሎ ፆሳ ሀንቀꬅዳ ግሾ፥ እ ኤንታ ባብሎነ ካዋ ናቡካዳናፆራ ኩሸን አꬅድ እሚስ። እ ሀ ኬꬃ ላልስ፤ አሳ ድእድ ባብሎነ ቢታ ኤፍስ።”

13 “ሽን ባብሎነ ካዎይ ቅሮስ ባ ካዎትዳ ኮይሮ ላይꬃን፥ ፆሳ ኬꬃ ዛር ኬፃና መላ አዋጆ ከስስ። 14 ናቡካዳናፆር የሩሳላመን ደእያ ፆሳ ኬꬃፈ ኤክ ኤፍድ፥ ባብሎነ ቢታን ደእያ ባ ካዎ ጋꬎን ዎꬅዳ ዎርቃነ ብራ ሚሸታካ ቅሮስ ዛሪድ የድስ። ሄ ሚሸት ካዎይ ቅሮስ ይሁዳ ቢታ አይሳና መላ ዶርዳ ሰሳብሳራ ኩሸን እመትስ። 15 ካዎይ፥ ‘ሀ ሚሸታ ኤካ ኤፋዳ የሩሳላመን ደእያ ፆሳ ኬꬃን ዎꬃ፤ ፆሳ ኬꬃይካ ካሰ ደእያ በሳን ኬፀቶ’ ያግን፥ 16 ሰሳብሳር ይድ፥ ‘ፆሳ ኬꬃ ኬፅያ በሳን የሩሳላመን ባስስ። እ ሀእ ጋካናዉ ዉርቤና፤ ሄ ዎደፐ ዶምድ፥ ኬፀትሸ ደኤስ’ ” ያግዶሶና።