1 ዳሮ ዎደፐ ጉየ፥ ፋርሰ ካዉአ አርፀክስስ ካዎትዳ ዎደ እዝራ ጌተትያ እስ አስ ደእስ። እዝር ሳራያ ናአ፤ አዛራ ናአ፤ ካልቀ ናአ፤ 2 ሳሉማ ናአ፤ ሳዶቃ ናአ፤ አክፁባ ናአ፤ 3 አማረ ናአ፤ አዛራ ናአ፤ ማራዮታ ናአ፤ 4 ዛራሀ ናአ፤ ኦዛ ናአ፤ ቡቃ ናአ፤ 5 አብሱ ናአ፤ ፍንሃሳ ናአ፤ ፍንሃስ አላዛራ ናአ፤ ካህነ ሀላቃ አሮና ናአ።

6 ሀይስ እዝር ባብሎነፐ ብስ። ጎዳይ፥ እስራኤለ ፆሳይ እምዳ ሙሰ ህግያ ኤርያ አስ። ጎዳ፥ ፆሳ ኩሸይ እያ ቦላ ደእያ ግሾ፥ እ ኦይችዳባ ኡባ ካዎይ እያዉ እሚስ። 7 ካዎይ አርፀክስስ ካዎትዳ ላፑንꬃ ላይꬃን እስራኤለ አሳፐ ጉꬃታራ፥ ካህነት፥ ሌወት፥ ዛማረት፥ ፐንገ ናገይሳትነ ፆሳ ኬꬃ ኦሳንቾት እዝራራ እስፈ የሩሳላመ ብዶሶና። 8 ካዎይ ካዎትዳ ላፑንꬃ ላይꬃን እቻሻንꬆ አጌናን እዝር የሩሳላመ ጋክስ። 9 ፆሳ ሎኦ ኩሸይ እያ ቦላ ደእያ ግሾ ኮይሮ አጌናን ኮይሮ ጋላስ ባብሎነፐ ከይድ፥ እቻሻንꬆ አጌናን ኮይሮ ጋላስ የሩሳላመ ጋክስ። 10 እዝር ጎዳ ህግያ ፃናኦን፥ ኦሶ ቦላ ፔሾንነ እስራኤለ አሳ እያ ዎጋነ እያ ህግያ ታማርሳናዉ ባ ዎዛና ጊግስስ።

11 ጎዳይ እስራኤለስ እምዳ ህግያነ ዎጋ፥ ሎይꬅ ኤርያ ካህነነ ፃፈ ግድዳ እዝራስ ካዎይ አርፀክስስ ፃፍዳ ዳብዳበይ ሀይሳ።

12 “ካዎታ ካዋ አርፀክስሳፐ፥ ካህነነ ሳሎ ፆሳ ህገ ሎይꬅ ኤርያ እዝራስ፥ ሳሮይ ነዉ ግዶ!

13 “ታ ካዎተꬃ ግዶን ደእያ እስራኤለ አሳፐ ኦንካ፥ ካህነ ዎይኮ ሌወ ግድን፥ የሩሳላመ ባናዉ ኮይያ አሳይ ኔራ ባና መላ ታኒ ኪታስ። 14 ታንነ ታራ ዞረትያ ላፑን አሳት እስፈ ግድድ፥ ነ ኩሸን ደእያ ፆሳ ህግያዳ፥ ባዳ ይሁዳንነ የሩሳላመን ደእያ ሀኖተꬃይ አይ መለኮ ኦይቻና መላ ነና ኪቶስ። 15 የሩሳላመን ደእያ እስራኤለ ፆሳስ፥ ታንነ ታራ ዞረትያ አሳት ኑ ዶሳን እምዳ ዎርቃነ ብራ እሞታ ኤካዳ ባ። 16 ሄሳ ቦላ ቃስ ኔኒ ባብሎነ ቢታ ኩመꬃፈ ደምዳ ብራነ ዎርቃ ኡባ፥ ቃስ እስራኤለ አሳይነ ካህነት የሩሳላመን ደእያ ባንታ ፆሳ ኬꬃስ ዶሳን እምዳ እሞታ ኤካዳ ባ። 17 ሀ ሚሽያን ኮርማታ፥ ማራዘታ፥ ዶርሳ ኡርገታነ፥ ካꬃ ያርሾስነ ኡሻ ያርሾስ ኮሽያባ ሻማዳ፥ የሩሳላመን ደእያ ህንተ ፆሳ ኬꬃን ያርሾ በሳን ያርሻ።

18 “ሄሳፈ ፓላህዳ ብራነ ዎርቃ ኔንነ ኔራ ደእያ አይሁደ ግድዳ ነ እሻት ህንተ ፆሳ ሸነን፥ ህንተ ኦꬃናዉ ኮያባ ኦꬅተ። 19 ቃስ ኑኒ ህንተ ፆሳ ኬꬃስ፥ እምዳ ሚሸታ ኡባ የሩሳላመ ፆሳ ስንꬃን ሺሻ። 20 ሄሳፈ ሀራባይ ፆሳ ኬꬃስ ኮሽያባይ አይብካ ደእኮ፥ ካዎ ሚሸ ምንጅያ ኬꬃፈ ኤካናዉ ዳንዳኣሳ።

21 “ታኒ ካዎይ አርፀክስስ ኤፍራፂሳ ሻፋፐ ሄፍንꬃን ቢታን ደእያ ሚሸ ኬꬃን አዋተꬃይ ደእያ ኡባታስ ሀ ኪታ እማስ። ካህነነ ሳሎ ፆሳ ህግያ ሎይꬅ ኤርያ እዝር ህንተና ኦይችያባይ አይባ ግድኮካ እያዉ እምተ። 22 ሄꬑ ሙኩሉነ ኦይዱ ፄቱ ክሎ ግራመ ብራ፥ እስ ፄቱ ኩንታለ ግስተ፥ ናምኡ ሙኩሉ ልትሮ ዎይነ ኡሽ፥ ናምኡ ሙኩሉ ልትሮ ሻማሆ ዛይተነ ኮሽያ መላ ማፅነ እያዉ እምተ። 23 ካዋ ቦላነ ካዋ ናይታ ካዎተꬃ ቦላ ሀንቆይ ዮና መላ ሳሎ ፆሳይ ባ ኬꬃስ ኮይያባ ኡባ እምተ። 24 ካህነታፐ፥ ሌወታፐ፥ ዛማረታፐ ፐንገ ናገይሳታፐ፥ ፆሳ ኬꬃ ኦሳንቾታፐነ ፆሳ ኬꬃ ግዶን ዱማ ዱማ ኦሶ ኦꬅያ አሳፐ ህንተ ጊራነ ቃራፃ ኤካናዉ ህንተዉ ማት ባዋ።

25 “ላ እዝራ፥ ኔኒ፥ ነዉ ፆሳይ እምዳ ጭንጫተꬃን ኤፍራፂሳ ሻፋፐ ሄፍንꬃ ቢታን ደእያ ነ ፆሳ ህግያ ኤርያ አሳ ቦላ ፕርዳና መላ ዳይናታነ አይሰይሳታ ሹማ። ህግያ ኤሮና አስ ደእኮ ኔኒ ኤንታ ታማርሳ። 26 ነ ፆሳ ህግያነ ካዋ ህግያ ኪተቶና ኦንካ ደእኮ፥ እ ቃይ ባይና ሀይቆ ዎይኮ ጋደፐ ጎደቶ ዎይኮ እያ ሻሎይ ቦንቀቶ ዎይኮ ቃሾን ሴረቶ” ያግስ።

27 የሩሳላመን ደእያ ፆሳ ኬꬃ ሀይሳዳ ቦንቸታና መላ ካዋ ዎዛናን ሀ ቆፋ ዎꬅዳ ጎዳ፥ ኑ አዋታ ፆሳ ጋላት ጋኮ! 28 ካዋ፥ ካዉዋራ ዞረተይሳታነ እያራ ኦꬅያ ዎልቃማ ሀላቃታ ስንꬃን ባ ቴማ ታዉ እምዳ ፆሳስ ጋላት ግዶ! ጎዳ፥ ታ ፆሳ ኩሸይ ታራ ደእያ ግሾ፥ እስራኤለ ሀላቃታፐ ኤረትዳይሳታ ዶራዳ የሩሳላመ ኤካ ባና መላ እ ታዉ ምኖተꬅ ግድስ።